உதயநிதி வியூக வகுப்பாளர் விலகல்! தவெக + காங்., கூட்டணிக்கு தாவல்! விஜய்க்கு ஆதரவாக பணியாற்ற முடிவு!

சென்னை: தி.மு.க. இளைஞரணி செயலர் உதயநிதி ஸ்டாலினின் தனிப்பட்ட அரசியல் வியூக வகுப்பாளராக செயல்பட்டு வந்த சுனில், தனது பொறுப்பிலிருந்து விலகியுள்ளார். இந்த விலகல் தி.மு.க. உள்ளே பெரும் பரபரப்பை ஏற்படுத்தியுள்ளது.

தி.மு.க. தலைவர் ஸ்டாலினின் மருமகன் சபரீசன் தலைமையிலான 'பென்' (Populus Empowerment Network) நிறுவனம் கட்சியின் முக்கிய தேர்தல் வியூக அமைப்பாகச் செயல்பட்டு வருகிறது. ஆனால் உதயநிதி, 'பென்' நிறுவனத்தை முழுமையாக நம்பாமல், கர்நாடகாவைச் சேர்ந்த சுனில் கன்கோலுவை (Sunil Kanugolu) தனது தனிப்பட்ட வியூக ஆலோசகராக 2022 முதல் நியமித்திருந்தார். 

தெலுங்கானா, கர்நாடகா தேர்தல்களில் காங்கிரசுக்காக வேலை செய்த அனுபவம் கொண்ட சுனில், 2021 தமிழக சட்டமன்றத் தேர்தலில் அ.தி.மு.க.வுக்காகவும் பணியாற்றியவர். உதயநிதியுடனான நெருக்கமான உறவின் காரணமாக அவர் தொடர்ந்து அவருடன் இணைந்திருந்தார்.

இதையும் படிங்க: உதயநிதியை களத்தில் இறக்குங்க! மூத்த நிர்வாகிகளுக்கு ஓய்வு கொடுங்க! திமுகவில் திடீர் அதிகாரப்போர்!

தமிழக வெற்றிக் கழகத்தை (த.வெ.க.) நடிகர் விஜய் தொடங்கிய பிறகு, அக்கட்சிக்கு மக்கள் மத்தியில் அதிகரித்து வரும் செல்வாக்கை சுட்டிக்காட்டி, அதை தீவிரமாக விமர்சிக்க வேண்டும் என சுனில் உதயநிதிக்கு அறிவுறுத்தி வந்ததாகக் கூறப்படுகிறது. இருப்பினும், 'விஜய்க்கு பெரிய செல்வாக்கு இல்லை; அவரைப் பற்றி பேசாமல் இருந்தாலே போதும்' என 'பென்' தரப்பில் கருத்து தெரிவிக்கப்பட்டது. கட்சிக்குள் 'பென்' நிறுவனத்தின் செல்வாக்கு அதிகமாக இருந்ததால் சுனிலின் ஆலோசனைகள் பெரிதாக எடுபடவில்லை என்று தி.மு.க. இளைஞரணி நிர்வாகிகள் சிலர் தெரிவித்தனர்.

தொடர் சுற்றுப்பயணங்கள் மற்றும் தீவிர அரசியல் உத்திகளை சுனில் பரிந்துரைத்தபோதும் அவை உதயநிதியால் ஏற்றுக்கொள்ளப்படவில்லை. இதனால் இருவருக்கும் இடையே அடிக்கடி கருத்து வேறுபாடுகள் ஏற்பட்டன. இறுதியில், சுனில் தனது பதவியிலிருந்து விலகியுள்ளார். தற்போது அவர் மீண்டும் காங்கிரசுக்கு திரும்பியுள்ளதாகவும், த.வெ.க.வுக்குப் பின்னணியில் ஆதரவு அளிக்கவும் முடிவு செய்துள்ளதாகவும் தகவல்கள் வெளியாகியுள்ளன.

இந்த விலகல் தி.மு.க.வின் உள் இயக்கங்களில் புதிய விவாதங்களை ஏற்படுத்தியுள்ளது. வரும் காலங்களில் கட்சியின் வியூகங்கள் எப்படி மாறும் என்பதை நோக்கி அரசியல் வட்டாரங்கள் ஆவலுடன் காத்திருக்கின்றன.

இதையும் படிங்க: விஜய் பாணியில் அரசியல்! ரூட்டை மாற்றிய உதயநிதி!! இனி வாரம் ஒருநாள் மீட்டிங்! இரண்டு அறிக்கை மட்டுமே!