நீங்கள் அவதூறாக பேசப் பேச, மக்கள் உங்களைப் பின்னுக்குத் தள்ளுவார்கள்!! உதயநிதிக்கு அமைச்சர் வார்னிங்!

தாராபுரம் இடைத்தேர்தல் பிரசாரம் சூடுபிடித்துள்ள நிலையில், எதிர்க்கட்சித் தலைவர் உதயநிதி ஸ்டாலின் முதலமைச்சர் விஜய்யை விமர்சித்து பேசியதற்கு வேளாண்மைத் துறை அமைச்சர் வினோத் பதிலடி அளித்துள்ளார். இரு தரப்பினரின் கருத்துகளும் தற்போது அரசியல் வட்டாரத்தில் கவனம் பெற்றுள்ளன.

திருப்பூர் மாவட்டம் தாராபுரம் சட்டப்பேரவை தொகுதியில் அக்டோபர் 6-ம் தேதி இடைத்தேர்தல் நடைபெற உள்ளது. இதையொட்டி திமுக வேட்பாளர் சுகன்யாவை ஆதரித்து உதயநிதி ஸ்டாலின் நத்தப்பாளையம், மூலனூர் உள்ளிட்ட பகுதிகளில் நேற்று பிரசாரம் மேற்கொண்டார். அப்போது ஆளும் கட்சி மற்றும் முதலமைச்சர் விஜய் குறித்து பல்வேறு விமர்சனங்களை முன்வைத்தார்.

சட்டப்பேரவையில் மக்கள் பிரச்சினைகள் குறித்து ஆளுங்கட்சி உறுப்பினர்கள் போதிய அளவில் பேசவில்லை என்றும், அரசு அளித்ததாக கூறப்படும் பல்வேறு தேர்தல் வாக்குறுதிகள் நிறைவேற்றப்படவில்லை என்றும் உதயநிதி குற்றம்சாட்டினார். மேலும், ஆளுங்கட்சி எம்.எல்.ஏ.க்கள் தொடர்பாகவும் அவர் பல்வேறு விமர்சனங்களை தெரிவித்தார்.

இதையும் படிங்க: சட்டசபையை கட் அடிக்கும் உதயநிதி!! மு.க.ஸ்டாலின் தோற்க இதுதான் காரணம்!! அமைச்சர் ரமேஷ் அதிரடி!

இந்த நிலையில் உதயநிதியின் பேச்சுக்கு பதிலளித்து அமைச்சர் வினோத் வெளியிட்ட அறிக்கையில், முதலமைச்சர் விஜய்யை விமர்சிப்பதன் மூலம் மக்கள் மனதை மாற்றிவிடலாம் என்று நினைக்க வேண்டாம் என தெரிவித்துள்ளார்.

“முதலமைச்சரைப் பற்றி அவதூறாக பேசப் பேச மக்கள் உங்களை பின்னுக்குத் தள்ளுவார்கள்” என்று அவர் கூறியுள்ளார். மேலும், மக்கள் அனைத்து அரசியல் பேச்சுகளையும் கவனித்துக் கொண்டிருப்பதாகவும், அரசியல் தலைவர்கள் பேசும் ஒவ்வொரு வார்த்தைக்கும் தேர்தலில் மக்கள் தங்களது வாக்கின் மூலம் பதிலளிப்பார்கள் என்றும் அமைச்சர் தெரிவித்துள்ளார்.

தாராபுரம் தொகுதியில் திமுக வேட்பாளர் சுகன்யா, தவெக வேட்பாளர் சத்தியபாமா உள்ளிட்ட வேட்பாளர்கள் களத்தில் உள்ளனர். தேர்தல் தேதி நெருங்கி வரும் நிலையில், முக்கிய கட்சிகளின் தலைவர்கள் தீவிர பிரசாரத்தில் ஈடுபட்டு வருகின்றனர்.

இதனால் தாராபுரம் இடைத்தேர்தல் பிரசாரத்தில் ஆளும் தரப்புக்கும் எதிர்க்கட்சிக்கும் இடையிலான வார்த்தைப் போர் மேலும் தீவிரமடைந்துள்ளது. தேர்தல் முடிவில் வாக்காளர்கள் அளிக்கும் தீர்ப்பே இந்த அரசியல் போட்டியின் அடுத்த கட்டத்தை தீர்மானிக்கும்.

இதையும் படிங்க: திமுகவில் மாவட்டச் செயலாளர் பதவிக்கு கடும் போட்டி! உதயநிதி ஆதரவாளர்கள் புகைச்சல்!