முதல்வர் விஜய் பாணியை பின்பற்றும் கேரளா முதலமைச்சர்!! கடுமையாக விமர்சித்துக் கொண்ட நிலையில் சந்திப்பு!

கேரளாவின் அடுத்த முதலமைச்சராக வி.டி. சதீசன் மே 18-ம் தேதி பதவியேற்க உள்ளார். காங்கிரஸ் தலைமையிலான யுடிஎஃப் கூட்டணி சட்டமன்றத் தேர்தலில் அமோக வெற்றி பெற்றதைத் தொடர்ந்து, புதிய அமைச்சரவை அமையவுள்ளது. 

சமீபத்தில் நடைபெற்ற கேரள சட்டமன்றத் தேர்தலில் யுடிஎஃப் கூட்டணி மொத்த இடங்களில் மூன்றில் இரண்டு பங்குக்கும் அதிகமான இடங்களை கைப்பற்றியது. இதில் காங்கிரஸ் கட்சி மட்டும் 63 இடங்களில் வெற்றி பெற்றது. முதலமைச்சர் தேர்வில் சில நாட்கள் இழுபறி நீடித்த நிலையில், காங்கிரஸ் உயர்மட்ட முடிவின்படி வி.டி. சதீசன் முதலமைச்சராக தேர்வு செய்யப்பட்டார். 

பதவியேற்பு விழாவுக்கு முன்னதாக, சதீசன் நேற்று முன்தினம் மறைந்த முன்னாள் முதலமைச்சர் உம்மன் சாண்டியின் இல்லத்துக்கு சென்று மரியாதை செலுத்தினார். அங்கு பேசிய அவர், “பதவியேற்பு விழாவுக்கு பல மாநில தலைவர்களையும், தேசிய காங்கிரஸ் தலைமையையும் அழைக்க உள்ளோம்” எனத் தெரிவித்தார்.

இதையும் படிங்க: கேரளாவிலும் முதல்வர் பிரச்னை ஓயல!! பதவியை பிடிக்க மல்லுக்கட்டும் வேணுகோபால் - சதீஷன்!

முக்கிய நிகழ்வாக, புதிய முதலமைச்சர் வி.டி. சதீசன், மார்க்சிஸ்ட் கம்யூனிஸ்ட் கட்சியின் முன்னாள் முதலமைச்சர் பினராயி விஜயனை நேரில் சந்தித்து வாழ்த்து பெற்றார். கடந்த ஐந்து ஆண்டுகளாக இரு தரப்பினரும் கடுமையாக விமர்சித்து வந்த நிலையில், இந்த சந்திப்பு கேரள அரசியலில் புதிய அத்தியாயத்தை தொடங்கியுள்ளது. தமிழக முதல்வர் விஜய் பாணியில் எதிர்க்கட்சித் தலைவரை சந்தித்து உரையாடியது அரசியல் வட்டாரத்தில் கவனம் பெற்றுள்ளது.

வரும் மே 18-ம் தேதி திருவனந்தபுரத்தில் நடக்கும் பதவியேற்பு விழாவில் தமிழ்நாடு முதலமைச்சர் விஜய் உள்பட பல மாநில காங்கிரஸ் முதலமைச்சர்கள் பங்கேற்க உள்ளதாக தகவல்கள் வெளியாகியுள்ளன. இது இரு மாநிலங்களுக்கும் இடையிலான உறவுகளை மேலும் வலுப்படுத்தும் என எதிர்பார்க்கப்படுகிறது.

கேரளாவில் யுடிஎஃப்-இன் தெளிவான வெற்றி, தேசிய அளவில் காங்கிரஸ் கட்சிக்கு பெரும் உற்சாகத்தை அளித்துள்ளது. புதிய அரசு பொறுப்பேற்கும் போது, மக்கள் பிரச்சினைகள், வளர்ச்சித் திட்டங்கள் மற்றும் மாநிலத்தின் பொருளாதார முன்னேற்றம் ஆகியவை முக்கிய இலக்குகளாக இருக்கும் என சதீசன் தரப்பு தெரிவித்துள்ளது.

கேரள அரசியலில் 5 ஆண்டுகால இடதுசாரி ஆட்சிக்குப் பிறகு மீண்டும் காங்கிரஸ் தலைமையிலான அரசு அமையவுள்ளது என்பது முக்கிய திருப்புமுனையாகப் பார்க்கப்படுகிறது. பதவியேற்பு விழா மிகப் பிரமாண்டமாக நடைபெறும் என எதிர்பார்க்கப்படுகிறது.

இதையும் படிங்க: கேரள முதல்வராகிறார் கே.சி.வேணுகோபால்! பதவியேற்பு விழாவில் பங்கேற்கிறாரா தவெக விஜய்?!