பைக் ரேஸ் பின்னணியில் போதைப்பொருள் வலையமைப்பா..? சந்தேகத்தை கிளப்பிய வேல்முருகன்..!!

தமிழக வாழ்வுரிமைக் கட்சித் தலைவர் தி.வேல்முருகன், சென்னை நகரின் முக்கியச் சாலைகளில் நள்ளிரவு நேரத்தில் நடைபெற்ற பைக் ரேஸ் சம்பவம் குறித்து கடும் கண்டனம் தெரிவித்துள்ளார். பொதுமக்களின் உயிருக்கு அரசு தரும் உத்தரவாதம் என்ன என்றும், சாலைகள் பைக் ரேஸ் களமாக மாறிவிட்டதா என்றும் அவர் கேள்வி எழுப்பியுள்ளார்.சென்னை நகரின் முக்கியச் சாலைகளில், குறிப்பாக வள்ளுவர் கோட்டம் உள்ளிட்ட தலைநகரின் மையப் பகுதிகளில், நள்ளிரவு நேரத்தில் 50க்கும் மேற்பட்ட இளைஞர்கள் திரண்டு அதிவேகமாகப் பைக்குகளை ஓட்டியும், வீலிங் உள்ளிட்ட ஆபத்தான சாகசங்களில் ஈடுபட்டும் பொதுமக்களை அச்சுறுத்திய சம்பவம் அதிர்ச்சியளிப்பதாக வேல்முருகன் தெரிவித்தார்.

இத்தகைய அத்துமீறல்கள் நடைபெற்றபோது பொதுமக்களின் பாதுகாப்பை உறுதிசெய்ய வேண்டிய காவல்துறை எங்கே இருந்தது என்று அவர் கேட்டார்.மக்கள் தங்கள் உயிரைப் பாதுகாத்துக் கொள்ளத் தாங்களே சாலையில் தடுப்புகளை அமைக்கும் நிலை ஏற்பட்டிருப்பது சட்டம்-ஒழுங்கு நிர்வாகத்தின் தோல்வி என்று அவர் சுட்டிக்காட்டினார். இந்தச் சம்பவத்தில் இளைஞர் ஒருவர் உயிரிழந்ததாகத் தகவல் வெளியாகியிருப்பதையும் குறிப்பிட்ட அவர், பைக் சாகசங்கள் ஏற்கனவே உயிரிழப்புகளுக்குக் காரணமாகி வரும் நிலையில், இன்னும் எத்தனை உயிர்கள் பறிபோன பிறகுதான் அரசு விழித்துக் கொள்ளப் போகிறது என்று கேள்வி எழுப்பினார்.

கைது செய்யப்பட்டவர்களில் சிலரிடம் கஞ்சா பொட்டலங்கள் கைப்பற்றப்பட்டதாக வெளியாகியுள்ள தகவல் மிகுந்த கவலைக்குரியது என்று கூறிய வேல்முருகன், இது வெறும் பைக் ரேஸ் பிரச்சனையா, போதைப்பொருள் பழக்கமும் அதிவேகச் சாகசமும் ஒன்றோடொன்று இணைந்துள்ளதா, இளைஞர்களைக் குறிவைத்துச் செயல்படும் போதைப்பொருள் வலையமைப்பின் பின்னணி என்ன, பைக் ரேஸ் குழுக்களுக்கும் போதைப்பொருள் விற்பனையாளர்களுக்கும் தொடர்பு உள்ளதா என்று தொடர்ந்து கேள்விகளை எழுப்பினார். இந்தக் கேள்விகளுக்குக் காவல்துறை வெறும் கைது நடவடிக்கைகளால் மட்டும் பதிலளித்துவிட முடியாது. இந்தச் சம்பவத்தின் பின்னணியில் உள்ள முழு வலையமைப்பையும் கண்டறிந்து, அதன் மூலத்தை முற்றிலுமாகத் துண்டிக்க வேண்டும் என்று அவர் வலியுறுத்தினார்.

இதையும் படிங்க: "சிக்குனா அவ்ளோ தான்"..! பைக் ரேஸ், விபத்துகளை தடுக்க 13 தனிப்படைகள்... தீவிர கண்காணிப்பு..!!

சாலைகள் சாகசக் காட்சிகளுக்கான அரங்கமாக மாறிவிட்டதா, பொதுமக்கள் உயிருக்கு உத்தரவாதம் அளிக்க முடியாத அளவுக்கு இரவு நேரக் கண்காணிப்பு பலவீனமாகிவிட்டதா, பைக் ரேஸ் நடைபெறுவது தெரிந்தும் முன்கூட்டியே தடுக்காதது ஏன் என்றும் அவர் கேள்வி எழுப்பினார்.தமிழ்நாடு அரசு, குறிப்பாகச் சென்னை மாநகரக் காவல்துறை, இதை ஒரு சாதாரணப் போக்குவரத்து விதிமீறலாகக் கருதாமல், இளைஞர்களின் உயிர், பொதுமக்களின் பாதுகாப்பு, போதைப்பொருள் தடுப்பு, சட்டம்-ஒழுங்கு ஆகிய அனைத்தையும் உள்ளடக்கிய தீவிரப் பிரச்சனையாக அணுக வேண்டும் என்று வேல்முருகன் வலியுறுத்தினார். பைக் ரேஸில் ஈடுபடுபவர்கள் மட்டுமல்லாது, அவர்களை ஒருங்கிணைப்பவர்கள், ஊக்குவிப்பவர்கள், வாகனங்களை ஏற்பாடு செய்பவர்கள், போதைப்பொருள் வழங்குபவர்கள் என முழுச் சங்கிலியையும் கண்டறிந்து சட்டத்தின் முன் நிறுத்த வேண்டும் என தமிழக வாழ்வுரிமைக் கட்சியின் சார்பில் அவர் கேட்டுக் கொண்டார்.

இதையும் படிங்க: "தமிழ்நாட்டுக்கே பெருமை"..! பைக் ரேசிங் சாதனை... வீராங்கனை ஜெகதீஶ்ரீக்கு கனிமொழி MP வாழ்த்து..!!