இப்போதைக்கு வேண்டாமே! ராகுல்காந்திக்கு நோ சொன்ன விஜய்! பாஜகவை எதிர்க்க நேரம் வரும்! தவெக நம்பிக்கை!

தேசிய அரசியலில் முக்கிய திருப்பமாக பார்க்கப்படும் நிலையில், ‘I.N.D.I.A’ கூட்டணியில் தற்போது இணைய வேண்டாம் என்ற நிலைப்பாட்டில் தமிழக வெற்றிக் கழக தலைவர் மற்றும் தமிழக முதல்வர் விஜய் இருப்பதாக அரசியல் வட்டாரங்களில் தகவல் வெளியாகியுள்ளது. இந்த தகவல் தமிழக அரசியல் களத்தில் பரபரப்பை ஏற்படுத்தியுள்ளது.

கடந்த மக்களவைத் தேர்தலில் பா.ஜ.,வுக்கு எதிராக காங்கிரஸ் தலைமையில் உருவான ‘I.N.D.I.A’ கூட்டணியில் பல்வேறு எதிர்க்கட்சிகள் இணைந்திருந்தன. தமிழகத்தில் தி.மு.க. முக்கிய பங்காற்றிய இந்த கூட்டணி, தேசிய அரசியலில் குறிப்பிடத்தக்க தாக்கத்தை ஏற்படுத்தியது. ஆனால், தமிழக சட்டசபைத் தேர்தலுக்குப் பிறகு அரசியல் சூழல் மாறியதாக கூறப்படுகிறது.

தற்போது காங்கிரஸ் உள்ளிட்ட சில கட்சிகள் தி.மு.க. கூட்டணியில் இருந்து விலகி, விஜய் தலைமையிலான தமிழக வெற்றிக் கழக அரசுக்கு ஆதரவு அளித்து வருகின்றன. மேலும், காங்கிரஸ் கட்சிக்கு அமைச்சரவையிலும் இடம் வழங்கப்பட்டதாக கூறப்படுவதால், தி.மு.க. மற்றும் காங்கிரஸ் இடையே அரசியல் விரிசல் ஏற்பட்டுள்ளதாக தகவல்கள் வெளியாகியுள்ளன.

இதையும் படிங்க: "அதே டெய்லர்... அதே வாடகை"..! ஊடகங்களை முடக்குவதா..? அண்ணாமலை சரமாரி கேள்வி..!

இதற்கிடையில் டெல்லியில் நடைபெற்ற ‘I.N.D.I.A’ கூட்டணி ஆலோசனைக் கூட்டத்திற்கு தமிழக வெற்றிக் கழகத்திற்கும் அழைப்பு சென்றதாக கூறப்படுகிறது. இருப்பினும், அந்த கூட்டணியில் உடனடியாக இணைய வேண்டாம் என்ற முடிவில் விஜய் இருப்பதாக கட்சி வட்டாரங்கள் தெரிவிக்கின்றன.

மத்திய அரசுடன் நேரடி மோதல் அரசியலை தற்போது தவிர்த்து, தமிழக வளர்ச்சிக்குத் தேவையான நிதி மற்றும் திட்டங்களை பெறுவதில் கவனம் செலுத்த வேண்டும் என்பதே விஜயின் அணுகுமுறையாக இருப்பதாக கூறப்படுகிறது. அதேசமயம், 2029 மக்களவைத் தேர்தல் நெருங்கும் காலகட்டத்தில் தேசிய அரசியல் நிலவரத்தை கருத்தில் கொண்டு முடிவெடுக்கலாம் என்ற எண்ணமும் இருப்பதாக தகவல் வெளியாகியுள்ளது.

அரசியல் பார்வையாளர்களின் கருத்துப்படி, தேசிய கூட்டணிகளில் அவசரமாக இணைவதை விட மாநில அரசின் நிர்வாக செயல்பாடுகள் மற்றும் கூட்டணி விரிவாக்கத்தில் கவனம் செலுத்தும் முயற்சியாக இதை பார்க்கலாம். மேலும், தமிழகத்தில் தற்போது உருவாகியுள்ள புதிய கூட்டணிக்கு தனி பெயர் வழங்கி அரசியல் நடவடிக்கைகளை முன்னெடுக்கவும் திட்டமிடப்பட்டுள்ளதாக கூறப்படுகிறது.

இதனால், விஜயின் அடுத்தகட்ட தேசிய அரசியல் நகர்வு என்னவாக இருக்கும் என்ற எதிர்பார்ப்பு அரசியல் வட்டாரங்களில் அதிகரித்துள்ளது.

இதையும் படிங்க: “Mr.விஜய் சட்டப்பேரவைக்கு வாங்க வச்சிக்கிறேன்...” - முதலமைச்சருக்கு நேரடி சவால் விட்ட திமுக Ex. அமைச்சர்...!