தவெக தலைவர் விஜய் நண்பருக்கு தேர்தலில் சீட்! தூத்துக்குடி வேட்பாளராக களம் இறங்கும் நடிகர் ஸ்ரீநாத்!

சென்னை நுங்கம்பாக்கத்தில் உள்ள தனியார் ஹோட்டலில் தமிழக வெற்றிக் கழகம் (த.வெ.க.) தலைவர் விஜய் இன்று (மார்ச் 29) தமிழகத்தின் 234 தொகுதிகள் மற்றும் புதுச்சேரியின் 30 தொகுதிகளுக்கான வேட்பாளர்களை அறிமுகம் செய்து வைத்தார்.

இந்த நிகழ்ச்சியில் முக்கிய ஈர்ப்பாக, தூத்துக்குடி தொகுதியில் விஜய்யின் நெருங்கிய நண்பரும், நடிகருமான ஸ்ரீநாத் வேட்பாளராக அறிவிக்கப்பட்டுள்ளார். வேட்பாளர்களை அறிமுகப்படுத்தும் போது விஜய், ஸ்ரீநாத்தை அன்புடன் “நண்பர்” என்று அழைத்து அவரை மேடைக்கு அழைத்தார். இது பலரின் கவனத்தை ஈர்த்தது.

விஜய்யுடன் ‘வேட்டைக்காரன்’ உள்ளிட்ட படங்களில் இணைந்து நடித்த ஸ்ரீநாத், தமிழக அரசியலில் முதல் முறையாக தேர்தல் களத்தில் இறங்குகிறார். தூத்துக்குடி தொகுதியில் அவருக்கு வாய்ப்பு அளித்திருப்பது த.வெ.க.வின் வேட்பாளர் தேர்வில் நட்பு மற்றும் நம்பிக்கைக்கு முக்கியத்துவம் அளிக்கப்படுவதை காட்டுகிறது.

இதையும் படிங்க: சவாலான தருணங்களை இந்தியா எதிர்கொள்கிறது! மேற்காசிய போர் குறித்து பிரதமர் மோடி ஓபன் டாக்!

இதேபோல், த.வெ.க. தலைவர் விஜய் தானே சென்னை பெரம்பூர் மற்றும் திருச்சி கிழக்கு தொகுதிகளில் போட்டியிடுகிறார். தமிழகத்தின் அனைத்து 234 தொகுதிகளிலும் தனித்து போட்டியிடும் முடிவை எடுத்துள்ள த.வெ.க., இன்று முழு வேட்பாளர் பட்டியலை வெளியிட்டதன் மூலம் தனது தேர்தல் தயாரிப்புகளை முழுமையாக்கியுள்ளது.

வேட்பாளர்கள் அறிமுக நிகழ்ச்சியில் விஜய், தி.மு.க. கூட்டணியை “ஒட்டுப்போட்ட கூட்டணி” என்று விமர்சித்தார். மேலும், இந்தத் தேர்தல் “ஊழலுக்கு எதிரானவர்களுக்கும், ஊழலில் ஊறிப்போனவர்களுக்கும் இடையிலான போட்டி” என்றும் அவர் கூறினார்.

த.வெ.க. வேட்பாளர்கள் அனைவரும் நாளை (மார்ச் 30) ஒரே நாளில் தங்கள் வேட்புமனுக்களை தாக்கல் செய்ய உள்ளனர். விஜய்யும் பெரம்பூர் தொகுதியில் நாளை மனு தாக்கல் செய்யத் திட்டமிட்டுள்ளார்.

தமிழக அரசியலில் புதிய சக்தியாக உருவெடுத்துள்ள த.வெ.க.வின் இந்த வேட்பாளர் அறிவிப்பு, குறிப்பாக நடிகர் ஸ்ரீநாத்துக்கு தூத்துக்குடியில் வாய்ப்பு அளித்திருப்பது, தேர்தல் களத்தில் பெரும் பேச்சாகியுள்ளது. தூத்துக்குடி தொகுதி வரலாற்றில் முதல் முறையாக ஒரு பிரபல நடிகர் போட்டியிடும் நிலை உருவாகியுள்ளது.

தேர்தல் நடத்தை விதிகள் அமலில் உள்ளதால், அனைத்து வேட்பாளர்களும் சரியான ஆவணங்களுடன் மனு தாக்கல் செய்ய தயாராகி வருகின்றனர். த.வெ.க.வின் இந்த அறிவிப்பு தமிழக அரசியல் களத்தில் புதிய எதிர்பார்ப்பையும், விவாதத்தையும் ஏற்படுத்தியுள்ளது. 

இதையும் படிங்க: தமிழ்நாடு மட்டுமல்ல!! புதுச்சேரிக்கும் தவெக வேட்பாளர் பட்டியல்!! விஜய் அறிவிப்பு!