முரண்டு பிடிக்கும் சீமான்! ஓட்டுக்கள் சரிந்ததால் சங்க நிர்வாகிகளை சந்திக்க மறுப்பு!

தமிழக அரசியலில் தொடர்ந்து கவனம் பெற்று வரும் நாம் தமிழர் கட்சி, சமீபத்திய சட்டசபை தேர்தலுக்குப் பிறகு புதிய விவாதத்தில் சிக்கியுள்ளது. கட்சியின் வாக்கு சதவீதம் கணிசமாக குறைந்ததைத் தொடர்ந்து, பல்வேறு சங்க நிர்வாகிகளை சந்திப்பதை கட்சியின் தலைமை ஒருங்கிணைப்பாளர் சீமான் தவிர்த்து வருவதாக தகவல்கள் வெளியாகியுள்ளன.

சட்டசபை தேர்தலுக்கு முன்பு அரசு டாக்டர்கள், செவிலியர்கள், ஆசிரியர்கள் உள்ளிட்ட பல்வேறு சங்கங்களின் கோரிக்கைகளுக்கு ஆதரவாக சீமான் தொடர்ந்து குரல் கொடுத்து வந்தார். பல்வேறு பிரச்சினைகள் தொடர்பாக அறிக்கைகள் வெளியிட்டு, அரசின் கவனத்தை ஈர்க்கும் வகையில் செயல்பட்டார். இதன் காரணமாக பல சங்கங்கள் தங்களது கோரிக்கைகளுக்கு ஆதரவு பெற சீமானை நாடியதாக கூறப்படுகிறது.

அந்த காலகட்டத்தில் வெளியிடப்பட்ட பல அறிக்கைகள் மற்றும் போராட்டங்களுக்கு கிடைத்த அரசின் பதிலால், சங்கங்களுக்கும் சீமானுக்கும் இடையே நெருக்கம் அதிகரித்திருந்தது. இதனால் தேர்தலில் நாம் தமிழர் கட்சிக்கு கூடுதல் ஆதரவு கிடைக்கும் என அரசியல் வட்டாரங்களில் எதிர்பார்ப்பு நிலவியது.

இதையும் படிங்க: பாட்டுக்கே பயமா..? பாடகர் சங்கீத்சன் கைது..! வறுத்தெடுத்த சீமான்..!!

ஆனால் தேர்தல் முடிவுகள் வெளியானபோது, கட்சியின் வாக்கு சதவீதம் எதிர்பாராத அளவில் சரிந்தது. முந்தைய தேர்தலில் 8.22 சதவீதமாக இருந்த வாக்கு விகிதம், இந்த முறை சுமார் 4 சதவீதமாக குறைந்ததாக கூறப்படுகிறது. இதற்கு தமிழக வெற்றிக் கழகத்தின் வளர்ச்சி உள்ளிட்ட பல்வேறு காரணங்கள் சுட்டிக்காட்டப்பட்டாலும், சீமானின் ஆதரவை பெற்றதாக கருதப்பட்ட சில சங்கங்களின் ஆதரவு வாக்குகளாக மாறவில்லை என்பதும் முக்கிய காரணமாக பேசப்படுகிறது.

இதையடுத்து, தற்போது எந்த சங்க பிரதிநிதிகளும் சந்திக்க வரும்போது அவர்களை உடனடியாக சந்திப்பதில் சீமான் ஆர்வம் காட்டவில்லை என கூறப்படுகிறது. இது அரசியல் வட்டாரங்களில் பரபரப்பை ஏற்படுத்தியுள்ளது.

இதுகுறித்து நாம் தமிழர் கட்சியினர் கூறுகையில், அனைத்து தரப்பு மக்களின் பிரச்சினைகளுக்கும் குரல் கொடுத்த ஒரே தலைவர் சீமான் தான் என்றும், பல சங்கங்களின் கோரிக்கைகளுக்காக போராடிய போதிலும், தேர்தல் நேரத்தில் அந்த ஆதரவு வாக்குகளாக மாறவில்லை என்றும் தெரிவித்துள்ளனர். இதனால் கட்சிக்குள் பல்வேறு ஆலோசனைகள் நடைபெற்று வருவதாகவும், இனி மக்கள் மற்றும் கட்சி அமைப்பை நேரடியாக வலுப்படுத்தும் பணிகளில் கவனம் செலுத்தப்பட உள்ளதாகவும் கூறப்படுகிறது.

இதையும் படிங்க: தனித்துப்போட்டி இனி வேலைக்கு ஆகாது!! கூட்டணி கதவை திறக்க சீமான் ஆலோசனை! தம்பிகள் அதிர்ச்சி!