கவின் ஆணவக் கொலை வழக்கில் திடீர் திருப்பம்... சுர்ஜித் பெற்றோர் மீதான குற்றப்பத்திரிகை ரத்து..! கோர்ட் அதிரடி உத்தரவு..!

நெல்லை கவின் ஆணவப் படுகொலை வழக்கில் திடீர் திருப்பம் ஏற்பட்டுள்ளது. உயர்நீதிமன்ற மதுரை கிளை, சுர்ஜித்தின் பெற்றோரான சரவணன் மற்றும் கிருஷ்ணகுமாரி ஆகியோர் மீதான குற்றப்பத்திரிகையை ரத்து செய்து உத்தரவிட்டுள்ளது. இருவரும் தாக்கல் செய்த மனுக்களை விசாரித்த நீதிமன்றம் இந்த முடிவை எடுத்துள்ளது. அதேநேரம் உறவினர் ஜெயபால் மீதான குற்றப்பத்திரிகையை ரத்து செய்ய மறுத்துவிட்டது.தூத்துக்குடி மாவட்டம் ஆறுமுகமங்கலம் பகுதியைச் சேர்ந்த மென்பொருள் பொறியாளர் கவின் செல்வகணேஷ், 2025 ஆம் ஆண்டு ஜூலை 27 ஆம் தேதி திருநெல்வேலி கேடிசி நகரில் படுகொலை செய்யப்பட்டார்.

அவர் வேறு சமூகத்தைச் சேர்ந்த பெண்ணைக் காதலித்ததால் நடந்த ஆணவக் கொலை இது. காதலி சுபாஷினியின் சகோதரர் சுர்ஜித், கவினை வெட்டிக் கொலை செய்தார். சம்பவம் நடந்த அன்றே சுர்ஜித் காவல் நிலையத்தில் சரணடைந்தார்.விசாரணையில் சுர்ஜித்தின் பெற்றோர் இருவரும் காவல் துறையில் உதவி ஆய்வாளர்களாகப் பணியாற்றி வந்தது தெரியவந்தது. கவினின் குடும்பத்தினர் பெற்றோரையும் கைது செய்யக் கோரி போராட்டம் நடத்தினர். அதையடுத்து சுர்ஜித்தின் தந்தை சரவணன் கைது செய்யப்பட்டார். பின்னர் உறவினர் ஜெயபாலும் கைது செய்யப்பட்டார்.

வழக்கு சிபிசிஐடி விசாரணைக்கு மாற்றப்பட்டது. விரிவான விசாரணைக்குப் பிறகு குற்றப்பத்திரிகை தாக்கல் செய்யப்பட்டது. அதில் சுர்ஜித், சரவணன், கிருஷ்ணகுமாரி, ஜெயபால் ஆகியோர் குற்றவாளிகளாகச் சேர்க்கப்பட்டனர். தாய் கிருஷ்ணகுமாரி நீண்ட நாட்கள் தலைமறைவாக இருந்தார். பின்னர் அவர் கைது செய்யப்பட்டார். குற்றப்பத்திரிகையில் பெற்றோர் மற்றும் ஜெயபால் மீது சதித்திட்டம், உதவி செய்தல், ஆதாரங்களை மறைத்தல் போன்ற குற்றச்சாட்டுகள் சுமத்தப்பட்டிருந்தன. இதை எதிர்த்து அவர்கள் உயர்நீதிமன்ற மதுரை கிளையில் மனுக்கள் தாக்கல் செய்தனர். குற்றப்பத்திரிகையை ரத்து செய்யக் கோரினர். விசாரணையில் சிசிடிவி காட்சிகள் உள்ளிட்ட ஆதாரங்கள் குறித்து விவாதங்கள் நடந்தன. நீதிமன்றம் சில இடைக்கால உத்தரவுகளைப் பிறப்பித்திருந்தது.

இதையும் படிங்க: விடிந்ததுமே அதிர்ந்த தலைநகரம்... இளைஞர் உயிரைக் குடித்த ‘கேங் வார்?’... கொடூரமாக வெட்டிக்கொலை...!

சமீபத்தில் நடந்த விசாரணையில் நீதிமன்றம் பெற்றோர் மீதான குற்றப்பத்திரிகையை ரத்து செய்துள்ளது. ஆனால் ஜெயபால் மீதானதைத் தொடர அனுமதித்துள்ளது. இதனால் வழக்கில் முக்கிய திருப்பம் ஏற்பட்டுள்ளது. சுர்ஜித் மீதான வழக்கு தொடர்கிறது. நெல்லை வன்கொடுமை தடுப்பு சிறப்பு நீதிமன்றத்தில் விசாரணை நடைபெற்று வருகிறது.இந்த வழக்கு தமிழகம் முழுவதும் பெரும் அதிர்ச்சியை ஏற்படுத்தியது. சாதி மறுப்புக் காதல் காரணமாக நடந்த ஆணவக் கொலையாக இது பார்க்கப்பட்டது. கவினின் குடும்பத்தினர் நீதி கோரி தொடர்ந்து போராடி வந்தனர். சிபிசிஐடி விசாரணை மற்றும் நீதிமன்ற நடவடிக்கைகள் பல கட்டங்களைக் கடந்துள்ளன. பெற்றோர் மீதான குற்றப்பத்திரிகை ரத்து செய்யப்பட்டது வழக்கின் இது போக்கை மாற்றியுள்ளது. 

இதையும் படிங்க: சேலத்தில் பயங்கரம்... தோண்டி எடுக்கப்பட்ட ஆண் உடல்... மனைவியும் மகனுமே சேர்ந்து அரங்கேற்றிய கொடூரம்...!