தவெக எம்.எல்.ஏ.விடம் பேர விவகாரத்தில் அதிரடி திருப்பம்... மேலும் இருவர் கைது... ரூ.54 லட்சம் பறிமுதல்...!

தமிழக வெற்றிக் கழக ஆட்சியைக் கவிழ்க்கும் நோக்கில் குதிரை பேரம் நடைபெற்றதாக தொடரப்பட்ட வழக்கில், மேலும் இரு மருத்துவர்களை சென்னை திருவல்லிக்கேணி போலீசார் கைது செய்து விசாரணை நடத்தி வருகின்றனர்.

சென்னை சட்டப்பேரவையில் சபாநாயகருக்கு எதிரான நம்பிக்கையில்லா தீர்மானத்திற்கு ஆதரவு அளிக்கும்படி, தமிழக வெற்றிக் கழகத்தைச் சேர்ந்த எம்.எல்.ஏ.க்களிடம் பேரம் பேசப்பட்டதாக குற்றச்சாட்டு எழுந்தது.

இந்த விவகாரத்தில், ஊத்தங்கரை தொகுதி எம்.எல்.ஏ. இளையராஜாவிடம் பேரம் பேசியதாக கூறப்பட்ட நிலையில், அவர் திருவல்லிக்கேணி காவல் நிலையத்தில் புகார் அளித்தார். அந்தப் புகாரின் அடிப்படையில் இதுவரை 9 பேர் கைது செய்யப்பட்டு, அவர்களிடம் தொடர்ந்து விசாரணை நடத்தப்பட்டு வந்தது.

இதையும் படிங்க: பள்ளிக்குள் அரசியல் புகுந்தால் அதிரடி ஆக்ஷன்! அமைச்சர் ராஜ்மோகன் வெளியிட்ட அறிக்கை!

இந்த நிலையில், வழக்கில் தொடர்புடைய மேலும் இரு மருத்துவர்களை நேற்று இரவு திருவல்லிக்கேணி போலீசார் கைது செய்து சென்னைக்கு அழைத்து வந்து விசாரணை மேற்கொண்டனர்.

அவர்களிடமிருந்து ரூ.56 லட்சத்து 40 ஆயிரம் ரொக்கப் பணம் பறிமுதல் செய்யப்பட்டுள்ளதாக போலீசார் தெரிவித்துள்ளனர்.

விசாரணையில், கைது செய்யப்பட்டவர்கள் திருப்பூர் மாவட்டம் காங்கேயம் பகுதியைச் சேர்ந்த மருத்துவர் ராஜசேகர் மற்றும் நாமக்கல் மாவட்டம் மோகனூர் பகுதியைச் சேர்ந்த மருத்துவர் ரமேஷ்குமார் என்பது தெரியவந்துள்ளது.

இருவரும் பெங்களூருவில் பதுங்கியிருப்பதாக கிடைத்த தகவலின் பேரில், தனிப்படை போலீசார் அங்கு சென்று அவர்களை கைது செய்தனர். மேலும், அவர்களிடமிருந்து பல்வேறு முக்கிய ஆவணங்களும் கைப்பற்றப்பட்டுள்ளதாக காவல்துறை தரப்பில் தெரிவிக்கப்பட்டுள்ளது.

கைது செய்யப்பட்ட இருவரையும் இன்று மாலைக்குள் நீதிமன்றத்தில் ஆஜர்படுத்தி, நீதிமன்றக் காவலில் சிறையில் அடைக்க நடவடிக்கை எடுக்கப்படும் என்றும் காவல்துறை அதிகாரிகள் தெரிவித்துள்ளனர்.

இதையும் படிங்க: திமுக, அதிமுக, விசிக தலைவர்கள் ஒரே அணியில்! முதல்வர் விஜய் அமைத்த மெகா கண்காணிப்பு குழு!