கவலை வேண்டாம்... மாணவர் விடுதிகளில் உணவு தட்டுப்பாடு வராது..!! அமைச்சர் அன்பில் மகேஷ் உறுதி..!!

தமிழகத்தில் தற்போது சமையல் எரிவாயு சிலிண்டர் தட்டுப்பாடு கடுமையாக நிலவி வரும் நிலையில், இது பொதுமக்களின் அன்றாட வாழ்க்கையையும், ஹோட்டல்கள், உணவகங்கள் போன்ற வணிக நிறுவனங்களையும் பெரிதும் பாதித்து வருகிறது. குறிப்பாக, வணிக ரீதியான சிலிண்டர் விநியோகத்தில் ஏற்பட்டுள்ள குறைபாடு காரணமாக பல இடங்களில் உணவு தயாரிப்பு பாதிக்கப்பட்டுள்ளது.

இந்த சூழலில், அரசு மாணவர் விடுதிகளில் உணவு தட்டுப்பாடு ஏற்படாது என்று பள்ளிக்கல்வித்துறை அமைச்சர் அன்பில் மகேஷ் பொய்யாமொழி தெளிவாகக் கூறியுள்ளார். மத்திய கிழக்கு நாடுகளில் ஏற்பட்ட பதற்றம் மற்றும் கச்சா எண்ணெய் விலை உயர்வு காரணமாக, வீட்டு உபயோக சிலிண்டர்களுக்கு முன்னுரிமை அளிக்கும் வகையில் வணிக சிலிண்டர் விநியோகத்தை கட்டுப்படுத்தியுள்ளது. இதனால் தமிழகத்தில் உள்ள ஹோட்டல்கள், உணவகங்கள் மற்றும் பிற வணிக அமைப்புகளுக்கு சிலிண்டர் கிடைப்பது கடினமாகியுள்ளது.

பல உணவக உரிமையாளர்கள் இதனால் தங்கள் நிறுவனங்களை மூடும் நிலைக்கு தள்ளப்பட்டுள்ளதாகவும், உணவு விலைகள் உயரும் அபாயம் உள்ளதாகவும் எச்சரித்துள்ளனர். இந்நிலையில், கல்லூரி விடுதிகள், அரசு விடுதிகள் போன்றவற்றில் தங்கும் மாணவர்களுக்கு உணவு தயாரிப்பு பாதிக்கப்படலாம் என்ற அச்சம் எழுந்துள்ளது. இதற்கு பதிலளிக்கும் வகையில், அமைச்சர் அன்பில் மகேஷ் பொய்யாமொழி அரசு மாணவர் விடுதிகளை குறிப்பிட்டு உறுதியளித்துள்ளார்.

இதையும் படிங்க: அவதூறு பேச்சு, அபாண்ட பழிதான் திமுகவுக்கு வாடிக்கை..! அண்ணாமலை குற்றச்சாட்டு..!!

அரசு நடத்தும் பள்ளி மற்றும் கல்லூரி விடுதிகளில் சமைப்பதற்கு தேவையான எரிவாயு சிலிண்டர்கள் எந்தவித தட்டுப்பாடும் இல்லாமல் கிடைக்க ஏற்பாடு செய்யப்பட்டுள்ளதாகவும், மாணவர்களின் உணவு தயாரிப்பு மற்றும் வழங்கல் எவ்வித பாதிப்பும் இல்லாமல் தொடரும் என்றும் அவர் வலியுறுத்தியுள்ளார். அரசின் முன்னுரிமை திட்டங்களில் மாணவர்களின் ஊட்டச்சத்து மற்றும் கல்வி நலன் மிக முக்கிய இடம் பெறுவதால், இத்தகைய அத்தியாவசிய தேவைகளுக்கு தடையின்றி நடவடிக்கை எடுக்கப்படும் என்பதை இது உறுதிப்படுத்துகிறது.

இதையும் படிங்க: சிலிண்டர் தட்டுபாடு... பெரும் பாதிப்பு அபாயம்... முதல்வர் ஸ்டாலின் முக்கிய ஆலோசனை..!!