தமிழ்நாட்டின் உயிர்நாடி காவிரி..! மேகதாதுவுக்கு எதிர்ப்பு..! அமைச்சர் ஆனந்தை சந்திக்கும் அன்புமணி..!!

காவிரி ஆற்றின் மேல் பகுதியில் கர்நாடகா மேகதாது அணை கட்ட முயற்சிகளை தீவிரப்படுத்தி வரும் நிலையில், தமிழ்நாட்டின் நீர் உரிமைகளைப் பாதுகாக்க அனைத்துக் கட்சி கூட்டத்தை உடனடியாக கூட்டி தீர்மானமான நடவடிக்கைகள் எடுக்க வேண்டும் என வலியுறுத்தும் வகையில், பாமக தலைவர் அன்புமணி ராமதாஸ் இன்று காலை சென்னை தலைமைச் செயலகத்தில் நீர்வளத்துறை அமைச்சர் புஸ்ஸி ஆனந்தை சந்திக்க உள்ளார். இந்த சந்திப்பு காலை 11:30 மணியளவில் நடைபெறும் என எதிர்பார்க்கப்படுகிறது. 

மேகதாது அணை திட்டம் தமிழ்நாட்டின் விவசாயம், குடிநீர் மற்றும் சுற்றுச்சூழலை பெரிதும் பாதிக்கும் என்பதில் உறுதியாக இருக்கும் அன்புமணி ராமதாஸ், கடந்த சில நாட்களாக பிலிகுண்டுலு முதல் டெல்டா பகுதி வரை நடைபயணம் மேற்கொண்டு பொதுமக்களிடையே விழிப்புணர்வு ஏற்படுத்தி வருகிறார். இந்த பிரச்சனை தமிழ்நாட்டின் உயிர்நாடியான காவிரியை பாதிக்கும் என்பதால், அரசியல் கட்சிகள் அனைத்தும் ஒன்றிணைந்து மத்திய அரசுக்கு அழுத்தம் கொடுக்க வேண்டும் என்று அவர் வலியுறுத்தி வருகிறார்.

இந்த சந்திப்பின்போது, தமிழ்நாடு அரசு உடனடியாக அனைத்துக் கட்சி கூட்டத்தை கூட்டி, மேகதாது திட்டத்துக்கு எதிராக ஒருமித்த குரல் எழுப்ப வேண்டும் என அமைச்சரிடம் அன்புமணி வலியுறுத்துவார் என எதிர்பார்க்கப்படுகிறது. மேலும், மத்திய அரசுக்கு அழுத்தம் கொடுத்து திட்டத்துக்கு அனுமதி மறுக்கச் செய்யவும், சட்டரீதியான நடவடிக்கைகளை துரிதப்படுத்தவும் கோரிக்கை வைக்கப்படும். கர்நாடக அரசின் நடவடிக்கைகள் தமிழ்நாட்டின் டெல்டா மாவட்டங்கள் உள்ளிட்ட பல பகுதிகளில் குடிநீர் பற்றாக்குறை, விவசாய நிலங்கள் பாதிப்பு, சுற்றுச்சூழல் சீரழிவு உள்ளிட்ட பல்வேறு பிரச்சனைகளை ஏற்படுத்தும் என அன்புமணி தொடர்ந்து எச்சரித்து வருகிறார். 

இதையும் படிங்க: ஒருவழியாக சேர்ந்த குடும்பம்..! "ராமதாசை சந்தித்த அன்புமணி... தந்தையின் திருமண நாள் கொண்டாட்டம்..!!

தமிழ்நாடு அரசு ஏற்கெனவே சட்டமன்றத்தில் தீர்மானம் நிறைவேற்றியுள்ள நிலையில், அரசியல் அளவில் மேலும் வலுவான நடவடிக்கைகள் தேவை என்பதே அன்புமணியின் முக்கிய வாதம். இந்த சந்திப்பு மேகதாது விவகாரத்தில் தமிழ்நாட்டின் ஒற்றுமைக்கு வலு சேர்க்கும் என அரசியல் வட்டாரங்கள் கருதுகின்றன. அன்புமணியின் நடைபயணம் மற்றும் தொடர் பிரச்சாரம் ஏற்கெனவே பல்வேறு அரசியல் கட்சிகள் மற்றும் விவசாய அமைப்புகளிடையே எதிரொலியை ஏற்படுத்தியுள்ளது. இந்த சந்திப்பின் முடிவுகள் மற்றும் அமைச்சரின் பதில் என்ன என்பது விரைவில் தெரியவரும்.

இதையும் படிங்க: சாதிவாரி கணக்கெடுப்புக்கு அழுத்தம்...! முதல்வர் விஜய்யை சந்தித்து பேசியது என்ன.? அன்புமணி பேட்டி..!!