பட்டினப்பாக்கத்தில் தலைமை செயலக திட்டத்தை கைவிடுக: அன்புமணி ராமதாஸ் எச்சரிக்கை!

சென்னை பட்டினப்பாக்கம் கடற்கரைப் பகுதியில் புதிய தலைமைச் செயலக வளாகத்தைக் கட்டுவதற்குத் தமிழ்நாடு அரசு எடுத்து வரும் எதேச்சதிகார முடிவை உடனடியாகக் கைவிட வேண்டும் என்றும், மீனவர்களின் பூர்வீக வாழ்விடங்களை அச்சுறுத்தும் இத்திட்டத்திற்கு எதிராக மீனவர் அமைப்புகள் சென்னையில் மாபெரும் கண்டன ஆர்ப்பாட்டத்தை அறிவித்துள்ளதால் நிலவும் பதற்றத்தைத் தணிக்க அரசு பிடிவாதத்தைத் தளர்த்த வேண்டும் என்றும் பாட்டாளி மக்கள் கட்சியின் தலைவர் மருத்துவர் அன்புமணி ராமதாஸ் மிகக் காட்டமாக வலியுறுத்தியுள்ளார்.

புதிய தலைமைச் செயலகத் திட்டத்திற்கு எதிராகத் தொடர்ச்சியாகக் கண்டனக் குரல்கள் எழுந்து வரும் நிலையில், பாரம்பரிய மீனவ கிராமங்களை ஒட்டியுள்ள பட்டினப்பாக்கம் பகுதியில் தலைமைச் செயலகம் அமைந்தால் தங்களது வாழ்வாதாரம், படகுகளை நிறுத்தும் இடங்கள் மற்றும் மீன்பிடித் தொழில் அடியோடு நாசமாகும் என அப்பகுதி மீனவ அமைப்புகள் குற்றம்சாட்டியுள்ளன. இதனைக் கண்டித்துப் பல்வேறு மீனவர் சங்கங்கள் ஒருங்கிணைந்து சென்னையில் பிரம்மாண்ட கவன ஈர்ப்பு ஆர்ப்பாட்டம் நடத்தப் போவதாக அதிகாரப்பூர்வமாக அறிவித்துள்ளன. இந்த அறிவிப்பு தலைநகர் சென்னையின் கடலோரப் பகுதிகளில் பெரும் பதற்றத்தையும் பரபரப்பையும் பற்ற வைத்துள்ளது.

இந்நிலையில், மீனவர்களின் நியாயமான போராட்டத்திற்கு முழு ஆதரவு தெரிவித்து பாமக தலைவர் அன்புமணி ராமதாஸ் வெளியிட்டுள்ள அறிக்கையில், "சென்னை பட்டினப்பாக்கத்தில் புதிய தலைமைச் செயலகம் அமைக்கும் முடிவைத் தமிழ்நாடு அரசு தேவையற்ற பிடிவாதத்துடன் முன்னெடுத்துச் செல்வது கடும் கண்டனத்திற்குரியது. கடலோர ஒழுங்குமுறை மண்டல (CRZ) விதிகளைத் துச்சமாக மதித்து, இயற்கைச் சூழலையும், கடலையே நம்பி வாழும் லட்சக்கணக்கான மீனவர்களின் வாழ்வுரிமையையும் பறிக்கும் வகையில் இந்தத் திட்டம் திட்டமிடப்பட்டுள்ளது" என்று சாடியுள்ளார்.

இதையும் படிங்க: புதிய தலைமைச் செயலகம்..! அரசாணைக்கு மீனவ மக்கள் எதிர்ப்பு..! விஜய் அரசுக்கு சிக்கல்..!!

மேலும், அரசின் அணுகுமுறையைக் கடுமையாக விமர்சித்த அவர், "ஆயிரக்கணக்கான மீனவர்கள் வீதியில் இறங்கிப் போராடும் சூழல் உருவாவதற்கு முன்பு, தமிழ்நாடு அரசு தனது பிடிவாதத்தைக் கைவிட்டு மக்களாட்சித் தத்துவத்தை மதிக்க வேண்டும். எளிய மீனவ மக்களை அச்சுறுத்தி, அவர்கள் மீது வன்மத்தைக் காட்டுவதை விடுத்து, மக்கள் நலனைக் கருத்தில் கொண்டு பட்டினப்பாக்கத்தில் தலைமைச் செயலகம் கட்டும் திட்டத்தை அரசு உடனடியாக முழுமையாகக் கைவிட வேண்டும்" என்று எச்சரித்துள்ளார்.

இதையும் படிங்க: புதிய தலைமைச் செயலகம் இப்படித்தான் இருக்குமாம்... பட்டினப்பாக்கத்தின் புதிய முகம்!! வைரல் புகைப்படம்..!!