பனிமூட்டத்திலும் விடாத மேள சத்தம்! தமிழகத்தில் களைகட்டும் போகி பண்டிகை!

தமிழர் திருநாளாம் தைப்பொங்கலுக்கு முன்னோடியாக, “பழையன கழிதலும் புதியன புகுதலும்” என்ற தத்துவத்தின் அடிப்படையில் தமிழகம் முழுவதும் இன்று அதிகாலை போகிப் பண்டிகை உற்சாகமாகக் கொண்டாடப்பட்டு வருகிறது.

இதையும் படிங்க: டெல்லியில் கடும் குளிர் அலை: குறைந்தபட்ச வெப்பநிலை 4°C..!! நடுங்கும் மக்கள்..!!

மார்கழி மாதத்தின் கடைசி நாளான இன்று, அதிகாலை முதலே கடும் குளிர் நிலவிய நிலையிலும், அதனைப் பொருட்படுத்தாமல் பொதுமக்கள் தங்கள் வீடுகளைச் சுத்தம் செய்து, தேவையற்ற பழைய பொருட்களை எரித்துப் போகியைக் கொண்டாடினர். குறிப்பாக, கிராமப்புறங்கள் முதல் நகர்ப்புறங்கள் வரை சிறுவர்கள் மேளம் கொட்டி மகிழ, இல்லத்தரசிகள் வீட்டின் முன்பு வண்ணக் கோலமிட்டுப் பண்டிகையை வரவேற்றனர். பொங்கல் திருவிழாவின் தொடக்கமாக அமையும் இந்தப் போகிப் பண்டிகை, மக்களின் மனங்களிலும் இல்லங்களிலும் ஒரு புதிய உத்வேகத்தை ஏற்படுத்தியுள்ளது.

தலைநகர் சென்னையில் அதிகாலை முதலே புகை மூட்டம் காணப்பட்டாலும், கடந்த ஆண்டுகளை விடப் பிளாஸ்டிக் மற்றும் டயர்களை எரிப்பது பெருமளவு குறைந்துள்ளதாகச் சுற்றுச்சூழல் ஆர்வலர்கள் தெரிவித்துள்ளனர். முன்னெச்சரிக்கை நடவடிக்கையாகத் தீயணைப்புத் துறையினர் மற்றும் மாநகராட்சிப் பணியாளர்கள் தீவிரக் கண்காணிப்பில் ஈடுபட்டுள்ளனர். புகையினால் விமானப் போக்குவரத்து மற்றும் சாலைப் போக்குவரத்தில் பாதிப்பு ஏற்படாமல் இருக்கப் பலத்த பாதுகாப்பு ஏற்பாடுகள் செய்யப்பட்டுள்ளன. “மாசு இல்லாத போகி” என்ற விழிப்புணர்வு வாசகங்களுடன் பல இடங்களில் இளைஞர்கள் துண்டுப் பிரசுரங்களை விநியோகித்தனர். பழைய கவலைகளை எரியூட்டி, புதிய நம்பிக்கையுடன் நாளை பிறக்கப்போகும் தை மகளை வரவேற்க ஒட்டுமொத்தத் தமிழகமும் தயாராகி வருகிறது.

இதையும் படிங்க: “பொங்கட்டும் மகிழ்ச்சி; வெல்லட்டும் தமிழ்நாடு!” முதல்வர் மு.க.ஸ்டாலின் பொங்கல் வாழ்த்து!