ஒரு தொகுதிக்கு 3 பொறுப்பாளர்கள்!! அமித்ஷா-வின் மாஸ்டர் ப்ளான்! தமிழகத்தை கைப்பற்ற களமிறங்கும் பாஜக!

2026 தமிழக சட்டசபை தேர்தலுக்குத் தயாராகும் வகையில், தமிழக பாஜக ஒவ்வொரு தொகுதிக்கும் தலா மூன்று பொறுப்பாளர்களை நியமிக்க முடிவு செய்துள்ளது. இந்த முடிவு, தேர்தல் பணிகளை திறம்பட நிர்வகிப்பதோடு, தனி நபர்களின் தன்னிச்சையான செயல்பாடுகளையும் தடுக்கும் நோக்கம் கொண்டது என கட்சி வட்டாரங்கள் தெரிவித்தன.

அ.தி.மு.க. தலைமையிலான தேசிய ஜனநாயக கூட்டணியில் இடம்பெற்றுள்ள பாஜக, 40 தொகுதிகளில் போட்டியிட திட்டமிட்டுள்ளது. ஆனால், அ.தி.மு.க. 25 தொகுதிகளை மட்டுமே ஒதுக்க விரும்புவதாகத் தகவல் வெளியாகியுள்ளது. 

இந்நிலையில், தமிழகத்தில் உள்ள 234 சட்டசபை தொகுதிகளிலும் தேர்தல் பணிகளை மேற்கொள்ள, பாஜக தேசிய தலைவர் ஜே.பி. நட்டா, தேசிய துணைத் தலைவரும் எம்பியுமான பைஜெயந்த் பாண்டாவை தேர்தல் பொறுப்பாளராகவும், மத்திய இணை அமைச்சர் முரளிதர் மோகலை இணைப் பொறுப்பாளராகவும் நியமித்துள்ளார்.

இதையும் படிங்க: திமுக - தவெக இடையில் ரகசிய டீலிங்! சாயம் வெளுத்திருச்சு! திடீர் ட்விஸ்ட் அடிக்கும் திருமா!

இதுவரை ஒவ்வொரு தொகுதிக்கும் ஒரு பொறுப்பாளர் மட்டுமே நியமிக்கப்பட்டு வந்தனர். ஆனால், இந்த முறையில் சில பிரச்னைகள் எழுந்துள்ளன. பொறுப்பாளர்கள் தங்களை வேட்பாளர்களாக முன்னிலைப்படுத்தி, நிதி வசூல் மற்றும் தன்னிச்சையான முடிவுகளில் ஈடுபடுவதாகவும், கூட்டணி கட்சியினருடன் மட்டும் நெருக்கமாக இருந்து, சொந்த கட்சியினரை மதிக்காமல் இருப்பதாகவும், எதிரணியினருடன் மறைமுகமாக தொடர்பு வைத்திருப்பதாகவும் குற்றச்சாட்டுகள் எழுந்தன.

இதைத் தவிர்க்க, ஒவ்வொரு தொகுதிக்கும் மூன்று பொறுப்பாளர்களை நியமிக்க மாநில பாஜக முடிவு செய்துள்ளது. இந்த மூவரும் கூட்டாக இயங்குவர், ஒருவர் மட்டும் தன்னிச்சையாக முடிவெடுக்க முடியாது.

இதனால், தனிப்பட்ட நலன்களுக்காக வேட்பாளர் தேர்வு, நிதி வசூல் மற்றும் மறைமுக புரிந்துணர்வு போன்றவை தவிர்க்கப்படும். மூவரும் கட்சியினருடன் ஆலோசித்து முடிவுகளை எடுப்பர், இது தேர்தல் பணிகளை மட்டுமின்றி, கட்சியின் அடிப்படை பணிகளையும் மேம்படுத்தும் என பாஜகவினர் நம்பிக்கை தெரிவித்தனர்.

இந்த புதிய மூவர் பொறுப்பு முறை, கட்சிக்குள் ஒற்றுமையை வலுப்படுத்துவதோடு, தொகுதி வாரியாக தேர்தல் பணிகளை திறம்பட செயல்படுத்துவதை உறுதி செய்யும்.

மேலும், பொறுப்பாளர்களிடையே ஆரோக்கியமான போட்டி ஏற்படுவதன் மூலம், கட்சி பணிகளில் அர்ப்பணிப்பு மற்றும் வெளிப்படைத் தன்மை அதிகரிக்கும் என எதிர்பார்க்கப்படுகிறது. இந்த முடிவு, பாஜகவின் தமிழக சட்டசபை தேர்தல் உத்தியில் முக்கிய மாற்றமாகப் பார்க்கப்படுகிறது.

இதையும் படிங்க: Breaking! கரூர் பெருந்துயரம்! மேலும் ஒரு பெண் மரணம்! பலி எண்ணிக்கை 41ஆக உயர்வு!