திமுக ஆட்சியின் மின்மாற்றிகள் கொள்முதல் ஊழல்?! ஹார்டு டிஸ்க் திருட்டின் பின்னணியில் யார்? 3 தனிப்படை அமைப்பு!

சென்னை அண்ணா சாலையில் உள்ள மின்வாரிய தலைமை அலுவலகத்தில் இருந்து முக்கிய ஆவணங்கள் அடங்கிய ஹார்ட் டிஸ்க்கள் மாயமான விவகாரம் புதிய திருப்பத்தை எட்டியுள்ளது. இந்த வழக்கின் விசாரணையை தீவிரப்படுத்தும் வகையில் சி.பி.சி.ஐ.டி. போலீசார் மூன்று தனிப்படைகளை அமைத்துள்ளனர்.

மின்வாரிய தலைமை அலுவலகத்தில் பாதுகாக்கப்பட்டிருந்த சில ஹார்ட் டிஸ்க்களில், கடந்த ஆட்சிக் காலத்தில் நடைபெற்றதாக கூறப்படும் மின்மாற்றி கொள்முதல் தொடர்பான முக்கிய ஆவணங்கள் மற்றும் டிஜிட்டல் பதிவுகள் இருந்ததாக தகவல்கள் வெளியாகின. இந்த ஹார்ட் டிஸ்க்கள் காணாமல் போன சம்பவம் அரசியல் மற்றும் நிர்வாக வட்டாரங்களில் பரபரப்பை ஏற்படுத்தியது.

சம்பவம் குறித்து தொடக்க கட்ட விசாரணையில் இருவர் கைது செய்யப்பட்டனர். தொடர்ந்து, வழக்கின் முக்கியத்துவம் கருதி விசாரணை மாநில குற்றப்பிரிவு மற்றும் குற்றப்புலனாய்வுத் துறையான சி.பி.சி.ஐ.டி.க்கு மாற்றப்பட்டது. இதையடுத்து, ஆதாரங்களை மீட்பது, திருட்டுக்கான பின்னணி காரணங்களை கண்டறிவது மற்றும் சம்பவத்தில் தொடர்புடைய மற்ற நபர்களை அடையாளம் காண்பது உள்ளிட்ட பணிகள் வேகமடைந்துள்ளன.

இதையும் படிங்க: காணாமல் போன ஹார்டு டிஸ்க் விவகாரம்! மின்வாரிய அலுவலகத்தில் சிபிசிஐடி அதிரடி விசாரணை!

இந்த வழக்கின் விசாரணை அதிகாரியாக டி.எஸ்.பி. பிரபு நியமிக்கப்பட்டுள்ளார். அவருக்கு உதவியாக மூன்று தனிப்படைகள் உருவாக்கப்பட்டுள்ளன. ஒவ்வொரு குழுவுக்கும் தனித்தனி பொறுப்புகள் வழங்கப்பட்டுள்ளதாக கூறப்படுகிறது. ஒரு குழு ஹார்ட் டிஸ்க்கள் எவ்வாறு காணாமல் போனது என்பதை ஆராய்ந்து வருகிறது. மற்றொரு குழு கைது செய்யப்பட்டவர்களிடம் இருந்து கிடைத்த தகவல்களை அடிப்படையாக கொண்டு விசாரணையை விரிவுபடுத்தி வருகிறது. மூன்றாவது குழு டிஜிட்டல் ஆதாரங்கள் மற்றும் தொழில்நுட்ப தகவல்களை ஆய்வு செய்து வருகிறது.

ஹார்ட் டிஸ்க்களில் இருந்த தகவல்கள் மீட்கப்பட்டுள்ளனவா, அல்லது அவை வேறு யாரிடமாவது சென்றுள்ளனவா என்பது குறித்து அதிகாரிகள் தீவிரமாக விசாரித்து வருகின்றனர். மேலும், இந்த சம்பவம் தனிநபர் செயலா அல்லது திட்டமிட்ட சதியா என்பதையும் கண்டறிய முயற்சிகள் நடைபெற்று வருகின்றன.

முக்கிய ஆவணங்கள் தொடர்புடையதாக கூறப்படும் இந்த வழக்கு, தமிழக அரசியல் மற்றும் நிர்வாக வட்டாரங்களில் பெரும் கவனத்தை ஈர்த்துள்ள நிலையில், சி.பி.சி.ஐ.டி. விசாரணையின் அடுத்த கட்ட முன்னேற்றம் குறித்து எதிர்பார்ப்பு அதிகரித்துள்ளது.

இதையும் படிங்க: ரூ.2,500க்கு விற்கப்பட்ட ஹார்டு டிஸ்க்! ஆதாரங்களை அழிக்க முயற்சி! விசாரணையில் வெளியான பகீர்!