சென்னை கமிஷனர் அருண் மாற்றம்.. புதிய கமிஷ்னராக அபின் தினேஷ் மோதக் நியமனம்.. தேர்தல் ஆணையம் அதிரடி!

தமிழகச் சட்டமன்றத் தேர்தல் (ஏப்ரல் 23) நெருங்கி வரும் வேளையில், சென்னை மாநகர காவல் ஆணையர் ஏ. அருண் அவர்களை அதிரடியாக மாற்றத் தேர்தல் ஆணையம் இன்று உத்தரவிட்டுள்ளது. அவருக்குப் பதிலாக, மூத்த ஐபிஎஸ் அதிகாரியான அபின் தினேஷ் மோதக் (Abhin Dinesh Modak) சென்னையின் புதிய காவல் ஆணையராக நியமிக்கப்பட்டுள்ளார்.

தமிழகத்தில் ஏற்கனவே தலைமைச் செயலாளர் மற்றும் சில முக்கிய டிஜிபி-க்கள் மாற்றப்பட்டதைத் தொடர்ந்து, தற்போது சென்னை மாநகர காவல் துறையிலும் இந்த மிகப்பெரிய மாற்றம் நிகழ்ந்துள்ளது.

சென்னையில் எதிர்க்கட்சிகள் மற்றும் புதிய அரசியல் கட்சிகளின் பிரசாரங்களுக்குக் காவல்துறையினர் முட்டுக்கட்டை போடுவதாகத் தேர்தல் ஆணையத்திற்குப் புகார்கள் சென்றன. குறிப்பாக, தமிழக வெற்றிக் கழகத் தலைவர் விஜய் சென்னையில் பிரசாரம் செய்ய அனுமதி கோரிய இடங்களில், போக்குவரத்து நெரிசலைக் காரணம் காட்டி பல இடங்களுக்கு அனுமதி மறுக்கப்பட்டது. இது தொடர்பாகத் தவெக பொதுச்செயலாளர் தேர்தல் ஆணையத்திடம் புகார் அளித்திருந்தார்.

இதையும் படிங்க: சென்னையில் விஜய்யின் மெகா பிரசாரம்: 2 இடங்களுக்கு மட்டுமே அனுமதி! 3 இடங்களுக்கு முட்டுக்கட்டை!

தேர்தல் நேரத்தில் எவ்வித அரசியல் சார்புமின்றி, சட்டம் ஒழுங்கைப் பாதுகாக்கவும், அனைத்துக் கட்சிகளுக்கும் சமமான வாய்ப்பை உறுதி செய்யவும் இந்த மாற்றத்தைத் தேர்தல் ஆணையம் மேற்கொண்டுள்ளதாகத் தெரிகிறது.

1997-ஆம் ஆண்டு பேட்ச் ஐபிஎஸ் அதிகாரியான இவர், தமிழகக் காவல் துறையில் பல்வேறு முக்கியப் பொறுப்புகளை வகித்துள்ளார். இதற்கு முன் தாம்பரம் மாநகர காவல் ஆணையராகவும், பொருளாதாரக் குற்றப்பிரிவு (EOW) மற்றும் லஞ்ச ஒழிப்புத் துறையிலும் (DVAC) சிறப்பாகப் பணியாற்றிய அனுபவம் இவருக்கு உண்டு. தேர்தல் நடைபெற இன்னும் சில நாட்களே உள்ள நிலையில், சென்னையில் அமைதியான முறையில் தேர்தலை நடத்தி முடிப்பது இவருக்குப் மிகப்பெரிய சவாலாக இருக்கும்.

தமிழக முதல்வர் மு.க. ஸ்டாலின், தேர்தல் ஆணையத்தின் இதுபோன்ற தொடர் மாற்றங்கள் அரசியல் உள்நோக்கம் கொண்டவை எனக் கடுமையாக விமர்சித்துள்ளார். இருப்பினும், தேர்தல் ஆணையம் தனது அதிகாரத்தைப் பயன்படுத்திப் பாதுகாப்பு ஏற்பாடுகளைத் தீவிரப்படுத்தி வருகிறது.

இதையும் படிங்க: சென்னை அண்ணாசாலை பயங்கர தீவிபத்து! சொகுசு கார் உதிரிபாகங்கள் குடோன் எரிந்து நாசம்!