கனமழை விடுமுறையை ஈடு செய்ய நடவடிக்கை: நாளை (டிச. 6) சென்னை பள்ளிகள் செயல்படும்! 

'டிட்வா' புயல் மற்றும் அதைத் தொடர்ந்த கனமழையின் காரணமாக அறிவிக்கப்பட்ட விடுமுறையை ஈடு செய்யும் வகையில், நாளை (டிசம்பர் 6, 2025, சனிக்கிழமை) சென்னை மாவட்டத்தில் உள்ள அனைத்து வகையான உயர்நிலை மற்றும் மேல்நிலைப் பள்ளிகளும் வழக்கம் போல் முழுப் பணி நாளாகச் செயல்படும் என்று சென்னை முதன்மைக் கல்வி அலுவலர் (CEO) சுற்றறிக்கை வெளியிட்டுள்ளார்.

தொடர் மழை காரணமாகச் சென்னை மாவட்டத்தில் டிசம்பர் 2, 2025 அன்று பள்ளிகளுக்கு விடுமுறை அறிவிக்கப்பட்டிருந்தது. அந்த விடுமுறையை ஈடு செய்யும் வகையில், டிசம்பர் 6 சனிக்கிழமை அன்று பள்ளிகள் செயல்பட வேண்டும் என உத்தரவிடப்பட்டுள்ளது.

அனைத்துப் பள்ளிகளும் நாளை, புதன் கிழமைக்கான பாடவேளையினைப் பின்பற்றி முழுப் பணி நாளாகக் கருதிச் செயல்பட வேண்டும் என்றும் முதன்மைக் கல்வி அலுவலர் தெளிவுபடுத்தியுள்ளார். மாணவர்கள் மற்றும் பெற்றோர்கள் இந்த அறிவிப்பைக் கவனத்தில் கொண்டு, நாளைப் பள்ளிக்குத் தயாராகுமாறு அறிவுறுத்தப்படுகிறார்கள்.

இதையும் படிங்க: மின்னணு மையமாகிறது காஞ்சிபுரம்! ரூ.1003 கோடியில் 'கொரில்லா கண்ணாடி' ஆலை திறப்பு: 800 பேருக்கு வேலை!

தமிழ்நாட்டின் தனிப்பட்ட இடங்களில் மற்றும் புதுச்சேரி & காரைக்கால் பகுதிகளில் நாளை லேசானது முதல் மிதமான மழை பெய்யக்கூடும் என்றும்,  ஒரு சில இடங்களில் இடி மற்றும் மின்னலுடன் கூடிய  மழை பெய்ய வாய்ப்புள்ளது என இந்திய வானிலை ஆய்வுத் துறை தெரிவித்துள்ளது.

வங்கக் கடலில் உருவான 'டிட்வா' புயல் காற்றழுத்தத் தாழ்வுப் பகுதியின் தாக்கம் குறைந்துள்ளதால், கடந்த சில நாட்களைப் போல் அதிக கனமழைக்கான எச்சரிக்கை ஏதும் நாளை இல்லை.  நாளை வெப்பநிலை 23.8 C முதல் 27.7 C வரை இருக்கும் என எதிர்பார்க்கப்படுகிறது. எனவே, நாளைப் பள்ளிகள் வழக்கம் போல் செயல்படும் என அறிவிக்கப்பட்டுள்ளது, அதே சமயம் மாணவர்கள் லேசான மழைக்கான முன்னெச்சரிக்கை நடவடிக்கையுடன் பள்ளிக்குச் செல்லுமாறு அறிவுறுத்தப்படுகிறார்கள் 

இதையும் படிங்க: வெறுப்பு அரசியலை வைத்து ஓட்டுப் பெறுவதே நோக்கம் - பாஜகவை விமர்சித்த சசிகாந்த் செந்தில்!