“நலமும், வளமும் நிறைந்திடட்டும்...” - இஸ்லாமிய மக்களுக்கு சி.எம்.விஜய் மிலாது நபி வாழ்த்துகள்...!

முகம்மது நபி அவர்கள் மனிதர்களுக்கு அன்பு, இரக்கம், சமத்துவம், நேர்மை, சகோதரத்துவம் மற்றும் நல்லொழுக்கம் ஆகியவற்றை போதித்ததை நினைவுகூரும் வகையில் மிலாது நபி அனுசரிக்கப்படுகிறது. குறிப்பாக அவரது வாழ்க்கை, போதனைகள் மற்றும் நற்குணங்களை நினைவுகூர்வது முக்கிய நோக்கமாகும்.

இன்றைய தினம், பள்ளிவாசல்களில் சிறப்பு பயான் மற்றும் மார்க்க உரைகள் நடைபெறும். நபிகள் நாயகத்தின் வாழ்க்கை மற்றும் போதனைகள் குறித்து எடுத்துரைக்கப்படும். குர்ஆன் ஓதுதல் மற்றும் துஆ செய்வார்கள். ஏழைகள் மற்றும் தேவையுள்ளவர்களுக்கு உணவு, உடை அல்லது உதவிகள் வழங்குவார்கள். சில இடங்களில் ஊர்வலங்கள் மற்றும் சமூக நிகழ்ச்சிகள் நடத்தப்படுகின்றன. குடும்பத்தினரும் சமூகத்தினரும் ஒன்றுகூடி உணவு பகிர்ந்து கொள்வார்கள். நபிகள் நாயகத்தின் நல்லொழுக்கங்களை வாழ்க்கையில் கடைப்பிடிக்க வேண்டும் என்பதை வலியுறுத்துவார்கள்.

இஸ்லாமியர்களால் நபிகள் நாயகம் முஹம்மது (ஸல்) அவர்களின் பிறந்த நாளை நினைவுகூரும் இந்த நல்ல நாளில் அரசியல் கட்சி தலைவர்கள் அவர்களுக்கு தங்களது வாழ்த்துக்களை தெரிவிப்பது வழக்கம். இன்று காலை முதல் ஆளாக முதலமைச்சர் விஜய் இஸ்லாமியர்களுக்கு மிலாது நபி வாழ்த்துக்களை தெரிவித்துள்ளார். 

இதையும் படிங்க: என்னுயிர் அப்பா பாரதிராஜாவுக்கு மணிமண்டபம்... முதல்வர் விஜய்க்கு சீமான் நெஞ்சம் நிறைந்த நன்றி!

இதுகுறித்து சோசியல் மீடியாவில் பதிவிட்டுள்ள அவர், இறைத்தூதர் நபிகள் நாயகம் அவர்கள் பிறந்த இந்நன்னாளில் என் அன்பிற்குரிய இஸ்லாமிய சகோதர, சகோதரிகள் அனைவருக்கும் நெஞ்சம் நிறைந்த இனிய மிலாது நபி நல்வாழ்த்துகள்!

மனிதகுலத்தின் மீது அன்பையும், ஏழை எளியோரின் மீது இரக்கத்தையும், அனைவரிடத்திலும் சமத்துவத்தையும் சகோதரத்துவத்தையும் பேண வேண்டும் என இறைத்தூதர் நபிகள் நாயகம் அவர்கள் போதித்த உயரிய நெறிகளைப் பின்பற்றி, உலகில் அன்பையும் நல்லிணக்கத்தையும் தழைக்கச் செய்வோம்!. இந்த நன்னாளில், அனைவரது வாழ்விலும் மகிழ்ச்சியும், நலமும், வளமும் நிறைந்திடட்டும்! என வாழ்த்தியுள்ளார். 
 

இதையும் படிங்க: ஓட்டுக்காக வாக்குறுதிகளை அள்ளி வீசிய தவெக..! பிரேமலதா விஜயகாந்த் குற்றச்சாட்டு..!!