துபாய் பறக்கும் முதல்வர் விஜய்: நடிகர் அஜித்துடன் திடீர் சந்திப்பு; லண்டனில் முதலீட்டாளர்கள் மாநாடு!

தமிழ்நாட்டின் தொழில் வளர்ச்சியை அடுத்த கட்டத்திற்கு எடுத்துச் செல்லும் நோக்கில் வெளிநாட்டு முதலீடுகளைப் பெருமளவில் ஈர்ப்பதற்காக, முதலமைச்சர் விஜய் வரும் செப்டம்பர் 10-ஆம் தேதி இரவு சென்னையிலிருந்து துபாய்க்கு அரசு முறைப் பயணம் மேற்கொள்கிறார்.

தமிழ்நாடு சட்டப்பேரவைக் கூட்டத்தொடர் தேதி குறிப்பிடப்படாமல் ஒத்திவைக்கப்பட்டுள்ள சூழலில், ஆளுங்கட்சியின் அடுத்தகட்ட நகர்வாகத் தமிழகத்திற்குப் புதிய தொழில் முதலீடுகளைக் கொண்டு வருவதற்கான பணிகள் அதிவேகமாக முடுக்கிவிடப்பட்டுள்ளன. இதன் ஒரு பகுதியாக, முதலமைச்சர் விஜய் அரசு முறைப் பயணமாக ஐக்கிய அரபு அமீரகம் மற்றும் பிரிட்டன் ஆகிய நாடுகளுக்குப் பறக்கத் திட்டமிட்டுள்ளார்.

இதன்படி, வரும் செப்டம்பர் 10-ஆம் தேதி புதன்கிழமை இரவு சென்னையில் உள்ள சர்வதேச விமான நிலையத்திலிருந்து விமானம் மூலம் புறப்படும் முதல்வர், நேரடியாகத் துபாய் சென்றடைகிறார். துபாயில் தங்கியிருக்கும் போது, அங்கு முகாமிட்டுள்ள முன்னணித் தமிழ்த் திரைப்பட நட்சத்திரமான நடிகர் அஜித்குமாரை வரும் செப்டம்பர் 11-ஆம் தேதி முதல்வர் விஜய் நேரில் சந்தித்துப் பேச உள்ளதாகத் தகவல்கள் கசிந்துள்ளன. பல ஆண்டுகளுக்குப் பிறகு தமிழ் சினிமாவின் இருபெரும் ஆளுமைகள் மற்றும் தமிழகத்தின் முன்னணி அரசியல் தலைவராக உருவெடுத்துள்ள முதலமைச்சர் சந்திக்கும் இந்தத் தருணம், திரைத்துறை மற்றும் அரசியல் வட்டாரங்களில் மிகப்பெரிய புயலையும் எதிர்பார்ப்பையும் கிளப்பியுள்ளது.

இதையும் படிங்க: புலிப்பட வருவாயை மறைத்த உத்தமர், மிசா குறித்து பேசுவதா? தயாநிதி மாறன் கடும் விமர்சனம்!!

இதனைத் தொடர்ந்து துபாய் பயணத்தை முடித்துக்கொண்டு முதலமைச்சர் விஜய் நேரடியாக இங்கிலாந்து தலைநகர் லண்டன் நகருக்கு அரசு முறைப் பயணம் மேற்கொள்கிறார். லண்டனில் நடைபெறும் சர்வதேசத் தொழில் முதலீட்டாளர்கள் மாநாடு மற்றும் வர்த்தக அமைப்புகளின் சந்திப்புகளில் பங்கேற்கும் அவர், தமிழ்நாட்டில் தகவல் தொழில்நுட்பம், ஆட்டோமொபைல், புதுப்பிக்கத்தக்க எரிசக்தி உள்ளிட்ட பல்வேறு முக்கியத் துறைகளில் பல்லாயிரக்கணக்கான கோடி ரூபாய் மதிப்பிலான புதிய தொழில் முதலீடுகளை ஈர்ப்பதற்கான உயர்மட்டப் பேச்சுவார்த்தைகளில் ஈடுபடவுள்ளார். தொழில் துறை உயர் அதிகாரிகளும் உடன் செல்லும் இந்த வெளிநாட்டுப் பயணம், தமிழ்நாட்டின் தொழில் பொருளாதாரக் கட்டமைப்பில் புதிய மைல்கல்லாக அமையும் என்று எதிர்பார்க்கப்படுகிறது.
 

இதையும் படிங்க: 35 நாளில் 10 கொலைகள்.. முதல்வரின் பொறுப்பற்ற பேச்சு: தவெக அரசை சாடிய கனிமொழி எம்பி!