அனுமதி மறுத்தால் தடையை மீறாமல் என்ன வழி?: மருத்துவ பணியாளர்கள் கைதை கண்டித்த சிபிஐஎம்!

சென்னையில் பணி நிரந்தரம் கோரிப் போராட்டத்தில் ஈடுபட்ட தற்காலிகப் பன்னோக்கு மருத்துவப் பணியாளர்களைக் காவல்துறையினர் குண்டுகட்டாகத் தூக்கிச் சென்று கைது செய்துள்ள நடவடிக்கைக்கு இந்திய கம்யூனிஸ்ட் கட்சி (மார்க்சிஸ்ட்) மாநிலச் செயற்குழு தனது மிகக் கடுமையான கண்டனத்தைத் தெரிவித்துள்ளது; அனுமதி வழங்க வேண்டிய காவல்துறையே அனுமதி மறுக்கும் சூழலில், கோரிக்கைகளுக்காகப் போராடும் மக்கள் தடையை மீறுவதைத் தவிர வேறு என்ன வழி இருக்கிறது என்று சிபிஐ(எம்) மாநிலச் செயலாளர் பெ. சண்முகம் காட்டமாகக் கேள்வி எழுப்பியுள்ளார்.   

தமிழ்நாட்டில் உள்ள அரசு மருத்துவமனைகளில் பணியாற்றி வரும் தற்காலிகப் பன்னோக்கு மருத்துவப் பணியாளர்கள் பணியில் சேர்ந்து 5 ஆண்டுகள் நிறைவடைந்த நிலையில், தங்களைப் பணி நிரந்தரம் செய்ய வலியுறுத்தி சென்னை எழும்பூரில் உள்ள ராஜரத்தினம் மைதானத்தில் உண்ணாவிரதப் போராட்டம் நடத்தப் போவதாக அறிவித்திருந்தனர். ஆனால், அவர்களின் நியாயமான போராட்டத்திற்கு அனுமதி மறுத்த காவல்துறையினர், பிற மாவட்டங்களில் இருந்து போராட்டத்தில் பங்கேற்க சென்னை புறப்பட்ட நிர்வாகிகளை ஆங்காங்கே வீட்டுக் காவலில் அடைத்து அத்துமீறியுள்ளனர்.   இதனைத் தொடர்ந்து, சென்னை எழும்பூர் ராஜரத்தினம் மைதானம் அருகே திரண்டு போராட்டம் நடத்திய பன்னோக்கு மருத்துவப் பணியாளர்களைக் காவல்துறையினர் குண்டுகட்டாகத் தூக்கிச் சென்று கைது செய்துள்ளனர். 

இச்சம்பவத்தைக் கண்டித்து மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ. சண்முகம் வெளியிட்டுள்ள அதிகாரப்பூர்வ அறிக்கையில் தெரிவித்திருப்பதாவது:   "அனுமதி வழங்க வேண்டிய காவல்துறை அனுமதி மறுக்கிற நிலையில், தங்களின் நியாயமான கோரிக்கைகளுக்காகப் போராடும் மக்கள் தடையை மீறுவதைத் தவிர வேறு என்ன வழி இருக்கிறது? தங்களின் அடிப்படை உரிமைகளை வலியுறுத்திப் போராட்டம் நடத்தும் உரிமையைத் தமிழகக் காவல்துறை மறுப்பதும், அடக்குமுறைகளை ஏவிப் போராட்டக்காரர்களை ஒடுக்குவதும் அப்பட்டமான ஜனநாயக விரோதமாகும்.   5 ஆண்டுகளுக்கும் மேலாகப் பன்னோக்கு மருத்துவத்துறை பணியாளர்களைப் பணி நிரந்தரப்படுத்தாமல் வைத்திருப்பது அநீதியானது மட்டுமல்லாமல், அது இடஒதுக்கீடு நெறிமுறைகளை மீறும் செயலுமாகும். 

இதையும் படிங்க: ஒரே நாளில் ரூ.1,280 சரிந்த தங்கம் விலை: சென்னையில் ஆபரணத் தங்கம் அதிரடி வீழ்ச்சி!

உயிர் காக்கும் உன்னதமான மருத்துவத்துறை பணியாளர்களுக்கே காலமுறை ஊதிய உத்தரவாதம் இல்லை என்பது மாநிலத்தின் சுகாதாரக் கட்டமைப்பை எவ்வகையிலும் வலுப்படுத்த உதவாது. எனவே, கைது நடவடிக்கைகளைக் கைவிட்டு, போராடும் சம்பந்தப்பட்ட மருத்துவப் பணியாளர்களை உடனடியாக அழைத்துப் பேச்சுவார்த்தை நடத்தி அவர்களின் கோரிக்கைகளுக்குத் தீர்வு காணத் தமிழ்நாடு அரசு முன்வர வேண்டும்" என்று அவர் வலியுறுத்தியுள்ளார். 

இதையும் படிங்க: OMR-ல் உயிரை பதறவைத்த பள்ளம்..!! சாலையில் ஏற்பட்ட குழியில் சிக்கிய கார்..!! தப்பிய நபர்!!