அப்பல்லோவில் பாமக நிறுவனர் ராமதாஸ்.. நேரில் சந்தித்து நலம் விசாரித்தார் துணை முதல்வர்..!!

பாட்டாளி மக்கள் கட்சி (பாமக) நிறுவனர் டாக்டர் ராமதாஸ், தனது 86வது வயதில் உடல்நலக் குறைவால் சென்னை அப்பல்லோ மருத்துவமனையில் அனுமதிக்கப்பட்டுள்ளார். கடந்த அக்டோபர் 5ம் தேதி இரவு இருதய பரிசோதனைக்காக அனுமதிக்கப்பட்ட ராமதாஸுக்கு அக்டோபர் 6ம் தேதி கார்டியோ ஆஞ்சியோகிராம் செய்யப்பட்டது. அவரது உடல்நிலை தற்போது சீராக உள்ளது என்றும் ஓரிரு நாட்களுக்குள் வீடு திரும்ப வாய்ப்புள்ளது எண்டுறம் மருத்துவமனை வட்டாரங்கள் தெரிவித்துள்ளன. இந்த சம்பவம், பாமகவின் உள் அரசியல் நெருக்கடியின் நடுவே நிகழ்ந்துள்ளது.

கடந்த டிசம்பர் முதல் தந்தை-மகன் இடையே ஏற்பட்ட பிளவு, கட்சி தலைமைப் போராட்டமாக மாறியுள்ளது. ராமதாஸ், மகன் அன்புமணி ராமதாஸின் கட்சித் தலைவர் பதவியை பறித்து, தன்னை நிறுவனர் தலைவராக மீண்டும் அறிவித்தார். இதற்கு எதிராக அன்புமணி, தேர்தல் ஆணையத்தால் உறுதிப்படுத்தப்பட்ட தனது பதவியை விட்டுக்கொடுக்கவில்லை. இந்தப் பிளவு, 2026 தமிழ்நாடு சட்டமன்றத் தேர்தலுக்கு முன் கட்சியின் எதிர்காலத்தை பாதிக்கும் என்று அரசியல் வட்டாரங்கள் கருதுகின்றன.

இதையும் படிங்க: எல்லா வேலையும் கரெக்ட்டா நடக்குதா..?? ‘உங்களுடன் ஸ்டாலின்’ முகாமில் துணை முதல்வர்..!!

இதனையடுத்து அன்புமணி ராமதாஸ், தந்தையை சந்திக்க ஐந்து மாதங்களுக்குப் பிறகு அப்பல்லோவை நோக்கி விரைந்தார். இது கட்சி உறுப்பினர்களிடையே நம்பிக்கையை ஏற்படுத்தியுள்ளது. "அப்பா நலமுடன் இருக்கிறார். சிகிச்சை முடிந்தவுடன் வீடு திரும்புவார்" என்று அவர் தனது சமூக வலைதளத்தில் பதிவிட்டார். இதேபோல், தமிழ்நாடு முதலமைச்சர் மு.க. ஸ்டாலின் உடனடியாக மருத்துவமனை சென்று ராமதாஸை நலம் விசாரித்தார். ஸ்டாலினின் இந்த நடவடிக்கை, திமுக-பாமக இடையேயான சமீபத்திய நட்புறவை பிரதிபலிக்கிறது.

இந்நிலையில் அப்பல்லோ மருத்துவமனையில் சிகிச்சை பெற்று வரும் மதிமுக பொதுச்செயலாளர் வைகோ மற்றும் பாமக நிறுவனர் ராமதாஸை துணை முதலமைச்சர் உதயநிதி ஸ்டாலின் நேரில் சந்தித்து உடல் நலம் குறித்து விசாரித்தார். இதுதொடர்பாக அவர் தனது எக்ஸ் தளத்தில், மூத்த அரசியல் தலைவர் அய்யா ராமதாஸ், உடல்நலக்குறைவு ஏற்பட்டு சிகிச்சை பெற்று வரும் நிலையில், அவரை மருத்துவமனையில் இன்று சந்தித்து நலம் விசாரித்தோம். அவர் விரைவில் பூரண குணமடைந்து வழக்கமான பணிகளுக்குத் திரும்பிட விழைகிறோம் என்று தெரிவித்துள்ளார்.

இதேபோல், மஜக தலைவர் மு.தமிமுன் அன்சாரியும் பாமக நிறுவனர் ராமதாஸை நேரில் சந்தித்து உடல்நலம் குறித்து விசாரித்தார். இதுதொடர்பான புகைப்படங்களை தனது எக்ஸ் தளத்தில் பதிவிட்டு, அவர் விரைவில் பூரண குணமடைய வேண்டும் என்று தெரிவித்தார். 

இதையும் படிங்க: தயவு செஞ்சி வராதீங்க... அன்புமணி தலையில் இடியை இறங்கிய ஜி.கே.மணி...!