நாங்கள் யார் தெரியுமா?” விஜய் எதிர்ப்பு ஆர்ப்பாட்டத்தில் திமுக நிர்வாகிகள் மோதல்! சட்டையை பிடித்து சண்டை… அதிர்ச்சி சம்பவம்!

தருமபுரி, செப். 12: நடிகரும் தமிழக வெற்றிக் கழகத் தலைவருமான விஜய்க்கு எதிராக திமுக சார்பில் நடைபெற்ற கண்டன ஆர்ப்பாட்டத்தில், அக்கட்சியைச் சேர்ந்த நிர்வாகிகள் சிலர் ஒருவரையொருவர் சட்டையைப் பிடித்து மோதிக்கொண்ட சம்பவம் தருமபுரியில் பரபரப்பை ஏற்படுத்தியுள்ளது.

சட்டப்பேரவையில் சர்க்காரியா கமிஷன் விவகாரம் தொடர்பாகவும், திமுக தலைவர் மு.க.ஸ்டாலின் குறித்தும் விஜய் அவதூறாக பேசியதாக திமுகவினர் குற்றம்சாட்டி வருகின்றனர். இதற்கு எதிர்ப்பு தெரிவிக்கும் வகையில் தருமபுரி ஒருங்கிணைந்த மாவட்ட திமுக சார்பில் கண்டன ஆர்ப்பாட்டம் நடைபெற்றது. இதில் விஜய்க்கு எதிராக கட்சியினர் கண்டன கோஷங்களை எழுப்பினர்.

ஆர்ப்பாட்டத்தில் பேசிய திமுக நிர்வாகிகள், அண்ணா, கருணாநிதி, எம்.ஜி.ஆர்., ஜெயலலிதா உள்ளிட்ட முன்னாள் தலைவர்கள் சட்டப்பேரவையின் மாண்பை காத்ததாக குறிப்பிட்டனர். ஆனால், தற்போது விஜய் சட்டப்பேரவை குறித்து அவதூறாக பேசி அதன் மாண்பை சீர்குலைக்கும் வகையில் செயல்பட்டதாக அவர்கள் குற்றம்சாட்டினர்.

இந்த நிலையில், ஆர்ப்பாட்டம் நடைபெற்றுக் கொண்டிருந்தபோது கூட்டத்தை ஒழுங்குபடுத்துவது தொடர்பாக திடீரென சலசலப்பு ஏற்பட்டது. கட்சியின் தகவல் தொழில்நுட்பப் பிரிவு பொறுப்பாளர் சண்முகம், ஆர்ப்பாட்டத்தில் பங்கேற்றவர்களை ஒழுங்காக நிற்குமாறு அறிவுறுத்தியதாக கூறப்படுகிறது. இதையடுத்து அவருக்கும் சில மூத்த நிர்வாகிகளுக்கும் இடையே வாக்குவாதம் ஏற்பட்டதாக தெரிகிறது.

வாக்குவாதம் முற்றிய நிலையில், இரு தரப்பினரும் ஒருவரையொருவர் சட்டையைப் பிடித்து மோதிக்கொண்டதாக கூறப்படுகிறது. இந்த சம்பவம் மேற்கு மாவட்ட திமுக செயலாளர் பழனியப்பன் மற்றும் நாடாளுமன்ற உறுப்பினர் மணி ஆகியோர் முன்னிலையிலேயே நடந்ததாக தகவல் வெளியாகியுள்ளது.

மேலும், மோதலில் ஈடுபட்டவர்கள் ஒருவரையொருவர் மிரட்டும் வகையில் பேசியதாகவும் கூறப்படுகிறது. விஜய்க்கு எதிராக கண்டனம் தெரிவிக்க நடைபெற்ற திமுக ஆர்ப்பாட்டத்திலேயே கட்சி நிர்வாகிகள் மோதிக்கொண்ட சம்பவம், அங்கு கூடியிருந்தவர்களிடையே பரபரப்பை ஏற்படுத்தியது.

இதையும் படிங்க: மிசா விவகாரம் விஸ்வரூபம்!! சட்டமன்றத்தையே அவமதிக்கும் முதல்வர் விஜய்! பொன்முடி கடும் தாக்கு!