தமிழகத்தில் இருமுனை போட்டிதான்! தேர்தல் களம் குறித்து திருமாவளவன் விளக்கம்!

தமிழகச் சட்டமன்றத் தேர்தல் களம் அனல் பறந்து வரும் வேளையில், விடுதலைச் சிறுத்தைகள் கட்சியின் (விசிக) தலைவர் தொல். திருமாவளவன் இன்றைய அரசியல் சூழல் குறித்துத் தனது கருத்தை ஆணித்தரமாகப் பதிவு செய்துள்ளார். தமிழகத்தில் நடப்பது ஒரு மக்கள் யுத்தம் என்று குறிப்பிட்ட அவர், நடிகர் விஜய்யின் அரசியல் நகர்வுகள் குறித்தும் கடுமையான விமர்சனங்களை முன்வைத்துள்ளார்.

தமிழகத்தில் பல முனைப் போட்டிகள் இருப்பதாகத் தோன்றினாலும், எதார்த்தத்தில் இது ஒரு இருமுனைப் போட்டிதான் என அவர் தெளிவுபடுத்தினார். இந்தத் தேர்தல் களம் என்பது தமிழ்நாட்டு மக்களுக்கும், சங்பரிவார் அரசியலைப் பேசும் பிற்போக்குச் சக்திகளுக்கும் இடையே நடக்கும் ஒரு மக்கள் யுத்தமாகவே நாங்கள் பார்க்கிறோம். ஒருபுறம் ஜனநாயகத்தைக் காக்கத் துடிக்கும் மக்கள் சக்தி, மறுபுறம் வகுப்புவாதச் சக்திகள் எனத் தேர்தல் களம் பிரிந்திருக்கிறது.

தமிழக வெற்றிக் கழகத் தலைவர் விஜய் குறித்துப் பேசுகையில் திருமாவளவன் அதிரடி குற்றச்சாட்டுகளை முன்வைத்தார். திமுகவை எதிர்க்கிறோம் என்கிற பெயரில், மறைமுகமாக அதிமுக - பாஜக அணிக்குச் சாதகமான வேலைகளைத்தான் விஜய் செய்து வருகிறார். அவரது அரசியல் நகர்வுகள் ஆளுங்கட்சியை வீழ்த்த வேண்டும் என்பதை விட, எதிர்க்கட்சிகளின் வாக்குகளைப் பிரித்து சங்பரிவார் அரசியலுக்குத் துணை போவதாகவே அமைகிறது

இதையும் படிங்க: ராசிபுரம் வரை பரவிய கோபாலபுர ஊழல்! பஸ் வசதி கூட இல்லை என அண்ணாமலை தாக்குதல்!

மத்திய அரசின் கொள்கைகளையும், அதற்குத் துணை போகும் மாநிலக் கட்சிகளையும் கடுமையாகச் சாடிய அவர், தமிழகத்தின் தனித்துவத்தைப் பாதுகாக்க திமுக தலைமையிலான கூட்டணி மீண்டும் வெற்றி பெற வேண்டியது அவசியம் என வலியுறுத்தினார்.

திரையுலகப் புகழை வைத்து அரசியல் களத்தில் மாற்றத்தை ஏற்படுத்திவிடலாம் என நினைப்பவர்களுக்கு மக்கள் தகுந்த பாடம் புகட்டுவார்கள் என்றும், கொள்கை அடிப்படையில் சிந்திக்கும் தமிழக மக்கள் சங்பரிவார் அரசியலை ஒருபோதும் ஏற்கமாட்டார்கள் என்றும் அவர் நம்பிக்கை தெரிவித்தார்.

திருமாவளவனின் இந்த இருமுனைப் போட்டி மற்றும் விஜய் குறித்த விமர்சனம் அரசியல் வட்டாரத்தில் புதிய விவாதங்களைக் கிளப்பியுள்ளது.

இதையும் படிங்க: தொடர் அதிருப்தி..!! தேர்தல் பிரசாரத்தை புறக்கணிக்கிறாரா ராகுல்காந்தி..?? தமிழக அரசியலில் பரபரப்பு..!!