கர்நாடக அரசியலில் புதிய அத்தியாயம்... முதல்வராக பதவியேற்றார் டி.கே. சிவக்குமார்..!

கர்நாடக அரசியலில் ஒரு முக்கியமான மாற்றம் நிகழ்ந்து வருகிறது. தற்போதைய முதலமைச்சர் சித்தராமையா விரைவில் பதவி விலகியிருக்கும் நிலையில், துணை முதலமைச்சர் டி.கே. சிவக்குமார் மாநிலத்தின் அடுத்த முதலமைச்சராகப் பொறுப்பேற்று உள்ளார். காங்கிரஸ் உயர்மட்டத் தலைமையின் முடிவின்படி இந்த மாற்றம் நிகழ்வதாக பல்வேறு நம்பகமான செய்திகள் தெரிவிக்கின்றன. இது 2023 சட்டமன்றத் தேர்தலுக்குப் பிறகு உருவான அதிகாரப் பங்கீடு ஒப்பந்தத்தின் அடிப்படையில் நடைபெறும் மாற்றமாகக் கருதப்படுகிறது. 

2023ஆம் ஆண்டு காங்கிரஸ் கட்சி கர்நாடகாவில் ஆட்சி அமைத்தபோது, சித்தராமையா முதலமைச்சராகவும், டி.கே. சிவக்குமார் துணை முதலமைச்சராகவும் பொறுப்பேற்றனர். அப்போது இருவருக்கும் இடையே ஒரு அமைதியான அதிகாரப் பங்கீடு ஒப்பந்தம் இருந்ததாகக் கூறப்படுகிறது. அதன்படி, சுமார் 2.5 ஆண்டுகள் சித்தராமையா தலைமையில் ஆட்சி நடைபெற்ற பிறகு, பொறுப்பு சிவக்குமாருக்கு மாற்றப்படும் என எதிர்பார்க்கப்பட்டது. இப்போது 2026 மே மாதத்தில் இந்த ஒப்பந்தம் நிறைவேற்றப்படும் தருணம் வந்துள்ளது. 

சிவக்குமார், கர்நாடக காங்கிரஸின் முக்கிய தூணாக விளங்குபவர். கட்சியை 2019 தேர்தல் தோல்விக்குப் பிறகு மீட்டெடுத்து வலுப்படுத்திய பெருமை அவருக்குச் சேரும். தொழிலதிபராகவும் அரசியல்வாதியாகவும் அறியப்படும் அவர், நீர் வளத்துறை, பெங்களூரு மேம்பாடு உள்ளிட்ட முக்கிய பொறுப்புகளை துணை முதலமைச்சராகக் கையாண்டு வந்தார். அவரது தீவிர அரசியல் ஈடுபாடு, கட்சியை ஒன்றிணைக்கும் திறன் மற்றும் தொண்டர்களிடையேயான செல்வாக்கு ஆகியவை அவரை இந்தப் பதவிக்கு தகுதியானவராக்கியுள்ளன. 

இதையும் படிங்க: கைமாறும் அதிகாரம்..!! பதவி விலகுகிறாரா சித்தராமையா..?? கர்நாடக அரசியலில் பரபரப்பு..!!

இந்த நிலையில் கர்நாடகவின் புதிய முதல்வராக டி கே சிவகுமார் பதவியேற்றார். ஆளுநர் தாவர்சந்த் கெலாட் பதவிப்பிரமாணம் செய்து வைத்தார். இந்த நிகழ்ச்சியில் ராகுல் காந்தி உள்ளிட்ட பல்வேறு காங்கிரஸ் பிரபலங்கள் பங்கேற்றனர். தமிழகத்தில் புதிய அரசு பொறுப்பேற்ற விழாவைப் போலவே முதலில் வந்தே மாதரமும் இரண்டாவது தேசிய கீதமும் மூன்றாவதாக மாநில பாடலும் பாடப்பட்டது குறிப்பிடத்தக்கது. 

இதையும் படிங்க: முதலமைச்சர் விஜய்யின் அடுத்த டெல்லி பயணத்தில் ராகுல் காந்தியுடன் சந்திப்பு இருக்கும்! பிரவீன் சக்கரவர்த்தி உறுதி!