திமுக மாநிலங்களவை வேட்பாளர்கள் அறிவிப்பு! திருச்சி சிவா, கான்ஸ்டன்டைன் ரவீந்திரனுக்கு வாய்ப்பு!

தமிழகத்தில் காலியாக உள்ள 6 மாநிலங்களவை இடங்களுக்கானத் தேர்தல் வரும் மார்ச் 16-ஆம் தேதி நடைபெற உள்ளது. இதில் திமுக மற்றும் அதன் கூட்டணிக் கட்சிகள் வெற்றிபெற வாய்ப்புள்ள 4 இடங்களில், வேட்பாளர் பங்கீடு மற்றும் அதிகாரப்பூர்வ வேட்பாளர் பட்டியலை திமுக தலைவர் மற்றும் முதலமைச்சர் மு.க. ஸ்டாலின் இன்று வெளியிட்டுள்ளார்.

திமுக-விற்கு கிடைக்கவுள்ள 4 இடங்களில், ஏற்கனவே செய்துகொள்ளப்பட்ட ஒப்பந்தப்படி இந்திய தேசிய காங்கிரஸ் கட்சிக்கு ஒரு இடமும், அண்மையில் கூட்டணியில் இணைந்த தேசிய முற்போக்கு திராவிட கழகத்திற்கு (தேமுதிக) ஒரு இடமும் ஒதுக்கப்பட்டுள்ளது. எஞ்சியுள்ள 2 இடங்களில் திராவிட முன்னேற்றக் கழகத்தின் சார்பில் பின்வரும் முக்கியப் பிரமுகர்கள் போட்டியிடுவார்கள் என அறிவிக்கப்பட்டுள்ளது.

திருச்சி சிவா, எம்.ஏ., பி.எல்.,: திமுக-வின் கொள்கை பரப்புச் செயலாளரான இவர், தற்போது 4-வது முறையாக மாநிலங்களவை உறுப்பினராகப் பணியாற்றி வருகிறார். இவரது அனுபவம் மற்றும் நாடாளுமன்றச் செயல்பாடுகளைக் கருத்தில் கொண்டு மீண்டும் இவருக்கு வாய்ப்பு வழங்கப்பட்டுள்ளது.

இதையும் படிங்க: தேமுதிகவிற்கு மாநிலங்களவையில் ஒரு இடம் ஒதுக்கீடு! மு.க. ஸ்டாலின் - எல்.கே. சுதீஷ் ஒப்பந்தம்!

பேராசிரியர் ஜே. கான்ஸ்டன்டைன் ரவீந்திரன்: கல்வியாளரான இவர் (M.E, MBA, MCA, M.L, Ph.D), திமுக-வின் செய்தித் தொடர்பு இணைச் செயலாளராகப் பணியாற்றி வருகிறார். தொலைக்காட்சி விவாதங்களில் கட்சியின் நிலைப்பாட்டைத் திறம்பட முன்வைப்பவர்.

மாநிலங்களவைத் தேர்தலுக்கான வேட்புமனுத் தாக்கல் தற்போது நடைபெற்று வரும் நிலையில், மார்ச் 16, 2026 அன்று வாக்குப்பதிவு நடைபெற உள்ளது.

கடந்த 2024 மக்களவைத் தேர்தலில் அதிமுக கூட்டணியில் இருந்த தேமுதிக-வை, ராஜ்யசபா சீட் வாக்குறுதி அளித்துத் தனது கூட்டணிக்குள் கொண்டு வந்த முதலமைச்சர் ஸ்டாலினின் இந்த நகர்வு, வரும் சட்டமன்றத் தேர்தலுக்கான பலமானக் கூட்டணியை உறுதிப்படுத்தியுள்ளது.

இதையும் படிங்க: 73-வது பிறந்தநாளில் முதலமைச்சர் ஸ்டாலின்! பிரதமர் மோடி, ரஜினிகாந்த் உள்ளிட்டோர் வாழ்த்து!