மோடி அமைச்சரவையில் திமுகவுக்கு இடம்? வடமாநில ஊடக தகவலால் தமிழக அரசியலில் திடீர் திருப்பம்!

பிரதமர் நரேந்திர மோடி தலைமையிலான மத்திய அமைச்சரவையில் திமுக இடம்பெற வாய்ப்பு இருப்பதாக வடமாநில ஊடகங்களில் வெளியான தகவல்கள் தமிழக அரசியல் வட்டாரத்தில் பரபரப்பை ஏற்படுத்தியுள்ளன. மத்திய அமைச்சரவை விரிவாக்கம் விரைவில் நடைபெற உள்ளதாக கூறப்படும் நிலையில், திமுக–பாஜக இடையே திரைமறைவில் பேச்சுவார்த்தை நடைபெறுவதாகவும் அந்த தகவல்கள் தெரிவிக்கின்றன.

கடந்த சில ஆண்டுகளாக திமுகவும் பாஜகவும் தமிழக அரசியலில் கடுமையான எதிரெதிர் நிலைப்பாட்டில் இருந்து வந்தன. பிரதமர் மோடி மற்றும் மத்திய பாஜக அரசின் பல்வேறு கொள்கைகளை திமுக தொடர்ந்து விமர்சித்து வந்தது. குறிப்பாக, தொகுதி மறுவரையறை விவகாரத்திலும் திமுக கடும் எதிர்ப்பை பதிவு செய்திருந்தது.

ஆனால் தமிழக அரசியல் சூழலில் ஏற்பட்டுள்ள மாற்றங்கள், கட்சிகளின் எதிர்கால கூட்டணி கணக்குகளிலும் தாக்கத்தை ஏற்படுத்தியுள்ளதாக கூறப்படுகிறது. சட்டசபை தேர்தல் முடிவுகளுக்குப் பிறகு திமுகவின் நீண்டகால கூட்டணி கணக்கு மாறியுள்ளதாகவும், காங்கிரஸ் உள்ளிட்ட சில கட்சிகள் புதிய அரசியல் அணியில் இடம்பெற்றிருப்பதால் திமுக தனித்து நிற்கும் சூழல் உருவாகியுள்ளதாகவும் இந்த தகவல்கள் தெரிவிக்கின்றன.

இதையும் படிங்க: சட்டமன்றமா.? சூப்பர் சிங்கர் நிகழ்ச்சியா.? சட்டப்பேரவை நிகழ்வுகளை விமர்சித்த உதயநிதி.!!

இதனால், தேசிய அளவில் ஆளும் பாஜகவுடன் இணைந்து செயல்படுவது தொடர்பாக திமுகவில் சில தரப்பினர் பரிசீலித்து வருவதாக அரசியல் வட்டாரங்களில் பேசப்படுகிறது. நாடாளுமன்றத்தில் முக்கிய மசோதாக்களை நிறைவேற்ற பாஜகவுக்கு திமுக எம்.பி.க்களின் ஆதரவு தேவைப்படலாம் என்றும், அதே நேரத்தில் மத்திய அரசின் ஆதரவு திமுகவுக்கும் சில அரசியல் சூழ்நிலைகளில் பயனுள்ளதாக இருக்கலாம் என்றும் கூறப்படுகிறது.

இதற்கிடையே, “அரசியலில் நிரந்தர நண்பரும் இல்லை; நிரந்தர எதிரியும் இல்லை” என்ற திமுகவை சேர்ந்த முன்னாள் மாநிலங்களவை உறுப்பினர் கனிமொழி சோமுவின் கருத்தும் தற்போது அரசியல் வட்டாரங்களில் கவனம் பெற்றுள்ளது. இந்த கருத்து கூட்டணி மாற்றத்துக்கான சாத்தியக்கூறுகளுடன் இணைத்து பார்க்கப்படுகிறது.

மேலும், தொகுதி மறுவரையறை விவகாரத்தில் திமுகவின் நிலைப்பாட்டிலும் சில மாற்றங்கள் ஏற்பட்டுள்ளதாக கூறப்படுகிறது. தமிழகத்தின் நாடாளுமன்ற பிரதிநிதித்துவம் பாதிக்கப்படாத வகையில் முடிவு எடுக்கப்பட்டால் பரிசீலிக்கலாம் என்ற அணுகுமுறை கட்சியின் அரசியல் நிலைப்பாட்டில் மாற்றம் ஏற்பட்டுள்ளதா என்ற கேள்வியை எழுப்பியுள்ளது.

எனினும், திமுக மத்திய அமைச்சரவையில் இணைய உள்ளதாக வெளியான தகவலுக்கு இதுவரை உறுதியான அதிகாரப்பூர்வ அறிவிப்பு வெளியாகவில்லை. வடமாநில ஊடகங்களில் வெளியாகியுள்ள தகவல்களை மட்டுமே அடிப்படையாகக் கொண்டு கூட்டணி உறுதி செய்யப்பட்டதாக கூற முடியாது.

மத்திய அமைச்சரவை விரிவாக்கம் நடைபெறும் போது வெளியாகும் அதிகாரப்பூர்வ அறிவிப்பே இந்த பரபரப்புக்கு முற்றுப்புள்ளி வைக்கும். அதுவரை திமுக–பாஜக இடையிலான சாத்தியமான அரசியல் நகர்வு தமிழகத்தில் மிகுந்த எதிர்பார்ப்பை ஏற்படுத்தியுள்ளது.

இதையும் படிங்க: காங்கிரஸ் யாரையும் முதுகில் குத்தாது! தவெக ஆதரவு குறித்து கே.சி.வேணுகோபால் விளக்கம்!