ஆக. 22ல் திமுக செயற்குழு கூட்டம்..!! ஆக்‌ஷன் மோடில் ஸ்டாலின்..!! துரைமுருகன் அறிவிப்பு..!!

திமுக தலைமைச் செயற்குழு கூட்டம் ஆகஸ்ட் 22 அன்று சென்னையில் நடைபெற உள்ளது. கட்சியின் பொதுச்செயலாளர் துரைமுருகன் வெளியிட்ட அறிவிப்பில், தலைவர் மு.க.ஸ்டாலின் தலைமையில் சனிக்கிழமை காலை 10 மணிக்கு கலைஞர் அரங்கில் இந்தக் கூட்டம் நடக்கும் எனத் தெரிவிக்கப்பட்டுள்ளது. தலைமைச் செயற்குழு உறுப்பினர்கள் அனைவரும் கட்டாயம் கலந்துகொள்ள வேண்டும் என அவர் வலியுறுத்தியுள்ளார்.

தற்போதைய அரசியல் சூழலில் இந்தக் கூட்டம் முக்கியத்துவம் பெறுகிறது. கழகத்தின் ஆக்கப்பணிகள் குறித்த விவாதங்களுடன், மாவட்ட அமைப்புகளை மறுசீரமைப்பது தொடர்பான முடிவுகளும் எடுக்கப்பட வாய்ப்புள்ளது. சட்டப்பேரவைத் தேர்தலில் ஏற்பட்ட தோல்விக்குப் பிறகு அமைக்கப்பட்ட மறுசீரமைப்புக் குழு, கட்சித் தொண்டர்களிடமிருந்து சேகரித்த கருத்துகளை அடிப்படையாகக் கொண்டு பரிந்துரைகளை சமர்ப்பித்துள்ளது. 

அதன்படி சுமார் பத்து மாவட்ட செயலாளர்களின் பதவிகளை நீக்கத் திட்டமிடப்பட்டுள்ளதாகத் தகவல்கள் தெரிவிக்கின்றன. தற்போது ஒரு மாவட்ட செயலாளர் 2 முதல் 6 சட்டமன்றத் தொகுதிகள் வரை பொறுப்பேற்றுள்ள நிலையை மாற்றி, ஒருவருக்கு அதிகபட்சம் மூன்று தொகுதிகள் மட்டுமே ஒதுக்கப்படும் வகையில் மாற்றம் கொண்டுவரப்பட உள்ளது. இதன் மூலம் மாவட்ட செயலாளர்களின் எண்ணிக்கையை நூறாக உயர்த்தி, புதியவர்களுக்கு வாய்ப்பு அளிக்கத் திட்டமிடப்பட்டுள்ளது. 

இதையும் படிங்க: மேகதாது அணை பிரச்சினை... உச்ச நீதிமன்றத்தை நாட துரைமுருகன் வலியுறுத்தல்!

பதவி நீக்கம் செய்யப்படுபவர்களுக்கு மாநில அளவிலான பொறுப்புகளை வழங்கி சமாதானப்படுத்தும் நடவடிக்கைகளும் பரிசீலிக்கப்படுகின்றன. மாற்றுக் கட்சிகளில் இருந்து திமுகவுக்கு வந்த முக்கியப் பிரமுகர்களை கவுரவிக்கும் வகையில் பதவிகள் வழங்கப்பட வாய்ப்புள்ளது. குறிப்பாக, அதிமுகவில் இணையும் முயற்சிகளை கைவிட்டு திமுகவில் இணைந்த முன்னாள் முதலமைச்சர் ஓ.பன்னீர்செல்வத்திற்கு மாநில அளவிலான பதவி கிடைக்க வாய்ப்பு உண்டு எனக் கூறப்படுகிறது.

இளைஞர்களுக்கு அதிக வாய்ப்பு அளிப்பது, பெண்களை மாவட்ட செயலாளர்களாக நியமிப்பது ஆகியவை குறித்தும் விவாதிக்கப்படும். தமிழக வெற்றிக் கழகத்தை பிரதான எதிரியாகக் கருதி, உதயநிதி ஸ்டாலினின் ஆலோசனைப்படி இந்த மாற்றங்கள் முன்னெடுக்கப்படுகின்றன. மேலும், உதயநிதிக்கு செயல் தலைவர் பதவி வழங்கி கட்சியின் அதிகார மையத்தை வலுப்படுத்தும் திட்டமும் கூட்டத்தில் பேசப்பட வாய்ப்புள்ளது. 

சேகர்பாபு உள்ளிட்ட சில தலைவர்களின் அதிகாரங்கள் குறைக்கப்படுவதோடு, வயது மூத்த பல மாவட்ட செயலாளர்களின் பதவிகள் மாற்றப்படும் என எதிர்பார்க்கப்படுகிறது. இந்தக் கூட்டத்தின் முடிவுகள் திமுகவின் எதிர்கால அமைப்புரீதியான போக்கை தீர்மானிக்கும் முக்கிய நிகழ்வாக அமையும்.
 

இதையும் படிங்க: கஞ்சா அடித்து விட்டு விசிலுக்கு ஓட்டு போட்டாங்க..! நல்ல சாவே வராது.! சாபம் விட்ட ஆர்.எஸ். பாரதி..!