லட்சியத்தால் ஒன்றிணைந்த இயக்கம் அதிமுக..! மக்கள் பணியே முக்கியம்..! EPS பெருமிதம்.!

அதிமுக பொதுச் செயலாளர் எடப்பாடி பழனிசாமி தமிழக அரசியலில் நடைபெறும் சில போக்குகள் குறித்து கடுமையான கருத்துகளை முன்வைத்துள்ளார். மக்களின் அன்றாட பிரச்சினைகளுக்கு தீர்வு காண்பதை விட, அதிமுகவை பலவீனப்படுத்தும் முயற்சிகளிலேயே சிலர் தங்கள் நேரத்தையும் ஆற்றலையும் செலவிடுவதாக அவர் சுட்டிக்காட்டியுள்ளார். குதிரை பேரம் மூலம் அதிமுக சட்டமன்ற உறுப்பினர்களை விலைக்கு வாங்கி, கட்சியை விழுங்கிவிடலாம் என்ற எண்ணம் சில தரப்பினரிடம் இருப்பதாகவும் அவர் குறிப்பிட்டார்.

அதிமுக என்பது அதிகாரத்தைப் பிடிக்க ஒன்றுகூடிய சாதாரண கூட்டம் அல்ல என்பதை அவர் வலியுறுத்தினார். இது லட்சியத்தால் ஒன்றிணைந்த இயக்கம் என்றும், அண்ணா மற்றும் புரட்சித் தலைவி அம்மாவின் கொள்கைகளைப் பின்பற்றி வரும் இயக்கம் என்றும் அவர் நினைவூட்டினார். கட்சியின் வரலாற்றில் எத்தனையோ எதிரிகளும் துரோகிகளும் அதை அழிக்க முயன்றபோதும், அந்தச் சூழ்ச்சிகளை முறியடித்து வந்துள்ளதாக அவர் நினைவுபடுத்தினார். அந்த வலிமையின் சான்றாக 2026 சட்டமன்றத் தேர்தலில் அதிமுக 1.35 கோடி வாக்குகளைப் பெற்று மக்கள் செல்வாக்கை நிரூபித்ததை அவர் சுட்டிக்காட்டினார்.

தமிழக அரசியல் சூழலில் சமீப காலத்தில் நடைபெற்ற நிகழ்வுகள் இந்த அறிக்கைக்குப் பின்னணியாக அமைந்துள்ளன. பொதுத் தேர்தலில் எந்தக் கட்சிக்கும் தெளிவான பெரும்பான்மை கிடைக்காத நிலையில், ஆட்சி அமைக்கும் முயற்சிகளின்போது சட்டமன்ற உறுப்பினர்களை ஈர்க்கும் நடவடிக்கைகள் குறித்து பல்வேறு குற்றச்சாட்டுகள் எழுந்தன. அதிமுகவிலிருந்து சில உறுப்பினர்கள் விலகி வேறு கட்சிகளில் இணைந்தது, அதைத் தொடர்ந்து நடைபெற்ற இடைத்தேர்தல்கள் ஆகியவை கட்சிக்கு சவாலாக அமைந்தன.

இதையும் படிங்க: மின் கொள்முதலில் மெகா ஊழல்..? விஜய் அரசு மீது எடப்பாடி பழனிசாமி பரபரப்பு குற்றச்சாட்டு..!

இருப்பினும், இத்தகைய முயற்சிகள் தற்காலிகமானவை என்றும், அடிப்படை மக்கள் ஆதரவை மாற்ற முடியாது என்றும் எடப்பாடி பழனிசாமி உறுதியாகத் தெரிவித்துள்ளார்.கட்சியின் தொண்டர்களும் ஆதரவாளர்களும் இந்தச் சூழ்நிலையில் உறுதியாக இருக்க வேண்டும் என்பதே அவரது அழைப்பாக உள்ளது. அதிகாரத்திற்காக அல்ல, கொள்கைக்காகவே அதிமுக இயங்குகிறது என்பதை மீண்டும் உறுதிப்படுத்தி, எதிர்காலத்தில் மக்கள் நலன் சார்ந்த பணிகளில் கவனம் செலுத்த வேண்டும் என்றும் அவர் வலியுறுத்தினார். 

இதையும் படிங்க: அதிமுக ஆட்சியில் விதைத்த மெட்ரோ திட்டம்! எடப்பாடி பழனிசாமி பெருமிதம்!