தேர்தல் களம் சூடுபிடிப்பு: எடப்பாடி பழனிசாமியின் காரை வழிமறித்து சோதனை செய்த தேர்தல் பறக்கும் படை!

தமிழக சட்டமன்றத் தேர்தலை முன்னிட்டுத் தென் மாவட்டங்களில் தனது சூறாவளிப் பிரசாரத்தைத் தொடங்கியுள்ள அதிமுக பொதுச்செயலாளர் எடப்பாடி பழனிசாமி அவர்களின் வாகனம், இன்று தேர்தல் பறக்கும் படையினரால் தீவிர சோதனைக்கு உள்ளாக்கப்பட்டது. முன்னதாக இன்று காலை சென்னையிலிருந்து விமானம் மூலம் தூத்துக்குடி வந்தடைந்த அவர், அங்கிருந்து கார் மூலம் பிரசாரத்திற்காகக் கன்னியாகுமரி மாவட்டம் நோக்கிச் சென்றார்.

கன்னியாகுமரி மாவட்ட எல்லையில் அவர் நுழைந்தபோது, பாதுகாப்புப் பணியில் ஈடுபட்டிருந்த தேர்தல் பறக்கும் படையினர் மற்றும் காவல்துறையினர் அவரது வாகனத்தை வழிமறித்தனர்.

தேர்தல் நடத்தை விதிமுறைகள் அமலில் இருப்பதால், அரசியல் தலைவர்களின் வாகனங்களில் உரிய ஆவணங்களின்றி பணம் அல்லது பரிசுப் பொருட்கள் ஏதேனும் கொண்டு செல்லப்படுகிறதா என்பதைக் கண்காணிக்க இந்தச் சோதனை நடத்தப்பட்டது.

இதையும் படிங்க: 33,000 வாக்குகள் வைத்திருப்பவருக்கு 10 சீட்டா? கிருஷ்ணசாமியை விளாசிய எடப்பாடியார்!

சோதனையின் போது எடப்பாடி பழனிசாமி அவர்கள் தனது வாகனத்திலிருந்து இறங்கி, அதிகாரிகள் சோதனையிட முழு ஒத்துழைப்பு வழங்கினார். அவரது வாகனத்தில் சந்தேகத்திற்குரிய பொருட்கள் எதுவும் கண்டறியப்படவில்லை என்று முதற்கட்ட தகவல்கள் தெரிவிக்கின்றன.

இந்தத் தாமதத்திற்குப் பிறகு, அவர் திட்டமிட்டபடி நாகர்கோவில், ஆரல்வாய்மொழி மற்றும் ராதாபுரம் ஆகிய இடங்களில் நடைபெறும் பொதுக்கூட்டங்களில் உரையாற்றப் புறப்பட்டுச் சென்றார்.

முன்னாள் முதல்வர் ஒருவரின் வாகனமே சோதனையிடப்பட்டது அப்பகுதியில் பெரும் பரபரப்பை ஏற்படுத்தியது. சட்டம் அனைவருக்கும் சமம் என்பதை உறுதிப்படுத்தும் வகையில் இந்தச் சோதனை அமைந்ததாக அதிகாரிகள் தெரிவித்தனர். ஏற்கனவே இன்று கோவையில் பிரதமர் மோடி அவர்களைச் சந்தித்த அதிமுக நிர்வாகிகள், தேர்தல் களம் உற்சாகமாக இருப்பதாகத் தெரிவித்திருந்த நிலையில், எடப்பாடியின் இந்தப் பிரசாரப் பயணம் அதிமுக தொண்டர்களிடையே பெரும் எதிர்பார்ப்பை ஏற்படுத்தியுள்ளது.

இன்று இரவு திருநெல்வேலியில் தங்கி ஓய்வெடுக்கும் எடப்பாடி பழனிசாமி, நாளை கடையநல்லூர் மற்றும் கோவில்பட்டி ஆகிய தொகுதிகளில் தனது பிரசாரத்தைத் தொடர உள்ளார்.

இதையும் படிங்க: எடப்பாடி பழனிசாமி தேர்தல் சுற்றுப்பயணம் 2026: நாளை முதல் தென் மாவட்டங்களில் சூறாவளி பிரசாரம்!