பரமத்தி வேலூரில் பயங்கர நாட்டு வெடி விபத்து: இருவர் பலி, 4 பேரை மீட்க போராட்டம்!

நாமக்கல் மாவட்டம் பரமத்தி வேலூர் அருகே பாண்டமங்கலம் பேரூராட்சிக்குட்பட்ட மைனர் வீரப்பம்பிள்ளை நகரில், குடியிருப்புப் பகுதிக்குள் இயங்கி வந்த நாட்டு வெடி தயாரிப்பு மற்றும் பட்டாசுக் கிடங்கில் இன்று நிகழ்ந்த கோர வெடி விபத்தில் இருவர் உடல் சிதறி சம்பவ இடத்திலேயே பரிதாபமாக உயிரிழந்தனர்; மேலும் இடிந்து விழுந்த கட்டடத்தின் இடிபாடுகளுக்குள் சிக்கியுள்ள 4 பேரை உயிருடன் மீட்பதற்காகத் தீயணைப்பு மற்றும் மீட்புப் படையினர் போர்க்கால அடிப்படையில் களமிறங்கியுள்ளனர்.

பாண்டமங்கலம் பகுதியைச் சேர்ந்த ராஜா என்பவருக்குச் சொந்தமான இந்த இடத்தில், உரியப் பாதுகாப்பு விதிகளைப் பின்பற்றாமல் நாட்டு வெடிகள் மற்றும் பட்டாசுகள் தயாரிக்கப்பட்டு வந்ததாகக் கூறப்படுகிறது. இந்நிலையில், தொழிலாளர்கள் வெடி தயாரிப்புப் பணியில் தீவிரமாக ஈடுபட்டிருந்தபோது, எதிர்பாராத விதமாக ஏற்பட்ட உராய்வு அல்லது தீப்பொறி காரணமாக அங்கு வைக்கப்பட்டிருந்த வெடிமருந்துகளில் தீப்பிடித்து, அடுத்தடுத்து விண்ணைப் பிளக்கும் பயங்கர சத்தத்துடன் வெடித்துச் சிதறியது. இந்த அதிபயங்கர வெடி விபத்தின் தாக்கத்தால் வெடி தயாரிப்புக் கூடம் மற்றும் சுற்றியிருந்த கட்டடப் பகுதிகள் இடிந்து தரைமட்டமாகின.

வெடி விபத்தில் சிக்கி இருவர் சம்பவ இடத்திலேயே உடல் சிதறி உயிரிழந்த நிலையில், இடிபாடுகளுக்குள் மேலும் நான்கு பேர் சிக்கியிருப்பது தெரியவந்துள்ளது. தகவல் அறிந்து சம்பவ இடத்திற்கு விரைந்து வந்த தீயணைப்பு வீரர்கள், இடிபாடுகளை அகற்றி உள்ளே உயிருக்குப் போராடிக் கொண்டிருப்பவர்களை மீட்கும் பணியில் முழு வீச்சில் ஈடுபட்டு வருகின்றனர். காயமடைந்தவர்களை உடனடியாக மருத்துவமனைக்குக் கொண்டு செல்ல ஆம்புலன்ஸ் வாகனங்கள் தயார் நிலையில் நிறுத்தப்பட்டுள்ளன. 

இதையும் படிங்க: தில்லா திமுகவை எதிர்ப்பது விஜய் தான்..! பச்சை குழந்தை TO பாட்டி வரை என் சொந்தங்கள்..!! முதல்வர் உறுதி.!!

இச்சம்பவம் குறித்து வழக்குப் பதிவு செய்துள்ள பரமத்தி வேலூர் காவல் துறையினர், குடியிருப்புப் பகுதிக்குள் நாட்டு வெடிகள் தயாரிக்க சட்டப்பூர்வ உரிமம் பெறப்பட்டதா அல்லது அனுமதியின்றிச் செயல்பட்டதா என்பது குறித்து தீவிர விசாரணையை முன்னெடுத்து வருகின்றனர்.

இதையும் படிங்க: "அந்தக் குழந்தையே நீங்க தானே"..! ஓட்டு போடாததற்கு நன்றி சொன்ன ஸ்டாலின்..! கிண்டலடித்த CM விஜய்.!!