பட்டினப்பாக்கத்தில் தலைமைச் செயலகம்... வலுக்கும் எதிர்ப்பு..! போராட்டத்தில் குதித்த மீனவர்கள்..!!

சென்னை பட்டினப்பாக்கத்தில் புதிய தலைமைச் செயலகம் மற்றும் சட்டமன்ற வளாகம் அமைப்பதற்கான தமிழக அரசின் முடிவுக்கு எதிர்ப்பு தெரிவித்து மீனவர்கள் தொடர்ந்து போராட்டத்தில் ஈடுபட்டு வருகின்றனர். பட்டினப்பாக்கம் சீனிவாசபுரம் பகுதியில் மீனவர்கள் ஒன்று திரண்டு தங்கள் எதிர்ப்பை வெளிப்படுத்தி வருகின்றனர். 

எண்ணூர் முதல் கோவளம் வரையிலான கடலோர மீனவ கிராம மக்கள் இந்த போராட்டத்தில் இணைந்துள்ளனர். அரசு வெளியிட்ட அரசாணையை உடனடியாக திரும்பப் பெற வேண்டும் என்று அவர்கள் வலியுறுத்தி வருகின்றனர்.சுமார் 25 ஏக்கர் பரப்பளவில் ரூ.1,200 கோடி மதிப்பீட்டில் புதிய வளாகம் அமைக்கப்படும் என அரசு அறிவித்தது. 

இந்த இடம் மீனவர்களின் பாரம்பரிய வாழ்விடம் மற்றும் வாழ்வாதாரப் பகுதியாக இருப்பதால் கடும் எதிர்ப்பு எழுந்துள்ளது. முள்ளிக்குப்பம், சீனிவாசபுரம், ராஜீவ்காந்தி நகர், பவானி குப்பம் உள்ளிட்ட பல மீனவ கிராமங்கள் இந்த இடத்தைச் சுற்றி அமைந்துள்ளன. படகுகள் நிறுத்தும் இடம், வலைகளை உலர்த்தும் பகுதி, மீன் சந்தை போன்ற அன்றாட நடவடிக்கைகள் இங்கேயே நடைபெறுகின்றன. புதிய கட்டடம் வந்தால் பாதுகாப்பு ஏற்பாடுகள் அதிகரித்து, போக்குவரத்து நெரிசல் உருவாகி, மீனவர்களின் இயக்கம் தடைப்படும் என்று அவர்கள் அஞ்சுகின்றனர்.

இதையும் படிங்க: பட்டினப்பாக்கத்தில் தலைமை செயலக திட்டத்தை கைவிடுக: அன்புமணி ராமதாஸ் எச்சரிக்கை!

இன்று பட்டினப்பாக்கத்தில் மீனவர்கள் திரண்டு போராட்டத்தில் ஈடுபட்டுள்ளனர். தங்கள் வாழ்வாதாரத்தைப் பாதுகாக்க வேண்டும் என்ற ஒரே நோக்கத்துடன் எண்ணூர் முதல் கோவளம் குப்பம் வரையிலான மீனவ கிராம மக்கள் கலந்துகொண்டுள்ளனர். இந்த இடத்தில் தலைமைச் செயலகம் அமைப்பதற்குப் பதிலாக மீனவர்களுக்கு குடியிருப்புகள் கட்ட வேண்டும் என்றும், பாரம்பரிய வாழ்விடமாக அறிவிக்க வேண்டும் என்றும் கோருகின்றனர்.

இதையும் படிங்க: புதிய தலைமைச் செயலகம்..! அரசாணைக்கு மீனவ மக்கள் எதிர்ப்பு..! விஜய் அரசுக்கு சிக்கல்..!!