சென்னை ராயபுரத்தில் தொடர் மின்வெட்டு: பொதுமக்கள் சாலை மறியல் - டி. ஜெயக்குமார் நேரில் ஆய்வு!

சென்னை ராயபுரம் பகுதியில் கடந்த சில தினங்களாக நீடித்து வரும் கடுமையான தொடர் மின்வெட்டுப் பிரச்சினைக்கு உடனடித் தீர்வு காண வலியுறுத்தி, ஆத்திரமடைந்த அப்பகுதி பொதுமக்கள் நள்ளிரவிலும் திடீர் சாலை மறியல் போராட்டத்தில் ஈடுபட்டதால் அப்பகுதியில் பெரும் பரபரப்பு ஏற்பட்டது.

தகவலறிந்து சம்பவ இடத்திற்கு நேரில் சென்ற அதிமுக முன்னாள் அமைச்சரும் ராயபுரம் முன்னாள் எம்.எல்.ஏ.-வுமான டி. ஜெயக்குமார், பொதுமக்களின் குறைகளைக் கேட்டறிந்ததுடன், அங்கிருந்தபடியே மின்வாரிய உயர் அதிகாரிகளைத் தொலைபேசியில் தொடர்பு கொண்டு போர்க்கால அடிப்படையில் சீரான மின் விநியோகத்தை உறுதி செய்யுமாறு திட்டவட்டமாக வலியுறுத்தினார்.

ராயபுரம் சட்டமன்றத் தொகுதிக்குட்பட்ட 48-ஆவது வார்டு முனிராம் பாண்டியன் தெரு மற்றும் அதன் சுற்றுவட்டாரக் குடியிருப்புப் பகுதிகளில் கடந்த சில நாட்களாகக் கடுமையான மின்தடை ஏற்பட்டு வந்துள்ளது. குறிப்பாக, இரவு நேரங்களில் பல மணி நேரம் மின் விநியோகம் தடைபடுவதால் கைக்குழந்தைகள், முதியவர்கள் மற்றும் நோயாளிகள் புழுக்கத்திலும் கொசுக்கடியிலும் தூங்க முடியாமல் சொல்லொணாத் துயரத்திற்கு ஆளாகி வருகின்றனர்.

இதையும் படிங்க: அறிவிக்கப்படாத மின்வெட்டால் 50,000 சிறு குறு தொழில்கள் முடக்கம்: சிபிஐ வீரபாண்டியன் எச்சரிக்கை!  

இது தொடர்பாக அப்பகுதி மக்கள் மின்வாரிய அதிகாரிகளிடமும் உதவிப் பொறியாளர் அலுவலகத்திலும் பலமுறை புகார்கள் அளித்தும் எவ்வித முறையான நடவடிக்கையும் எடுக்கப்படவில்லை எனக் கூறப்படுகிறது. இதனால் உச்சக்கட்ட அதிருப்திக்கு உள்ளான பொதுமக்கள், ஆண்கள், பெண்கள் எனத் திரளாகச் சாலையில் கூடி, சீரான தடையற்ற மின் விநியோகத்தை உடனடியாக வழங்கக் கோரி முழக்கங்களை எழுப்பியவாறு திடீர் சாலை மறியல் போராட்டத்தில் குதித்தனர்.

இப்போராட்டம் குறித்துத் தகவல் அறிந்தவுடன், அதிமுக முன்னாள் அமைச்சர் டி. ஜெயக்குமார் உடனடியாக ராயபுரம் பகுதிக்கு விரைந்து வந்தார். மறியலில் ஈடுபட்டிருந்த பொதுமக்களை நேரில் சந்தித்துப் பேசிய அவர், மின்வெட்டால் அன்றாட வாழ்க்கையிலும் பணிகளிலும் அவர்கள் சந்தித்து வரும் இன்னல்களைக் கனிவுடன் கேட்டறிந்தார்.

இதனைத் தொடர்ந்து, மக்கள் முன்னிலையிலேயே சம்பவ இடத்திலிருந்து மின்வாரிய உயர் அதிகாரிகளைத் தொலைபேசி வாயிலாகத் தொடர்பு கொண்ட ஜெயக்குமார்:

பொதுமக்களின் தொடர் புகார்களை அலட்சியப்படுத்தாமல் உடனடியாக பழுதுகளைச் சரிசெய்ய வேண்டும், முனிராம் பாண்டியன் தெரு மற்றும் சுற்றுவட்டாரப் பகுதிகளுக்குப் போர்க்கால அடிப்படையில் தங்குதடையின்றி சீரான மின்சாரத்தை விநியோகிக்க வேண்டும்,

மின்வெட்டுப் பிரச்சினைக்கு நிரந்தரத் தீர்வு காணத் தவறினால் பொதுமக்களைத் திரட்டிப் பெரும் போராட்டம் முன்னெடுக்கப்படும் என்று அதிகாரிகளிடம் கண்டிப்புடன் தெரிவித்தார்.

முன்னாள் அமைச்சரின் நேரடித் தலையீடு மற்றும் அதிகாரிகளுடனான பேச்சைத் தொடர்ந்து, மின்வாரியத்தினர் துரிதமாகப் பணிகளை மேற்கொள்வதாக உறுதியளித்ததை அடுத்து பொதுமக்கள் தங்களது மறியல் போராட்டத்தைக் கைவிட்டுக் கலைந்து சென்றனர். இருப்பினும், வடசென்னைப் பகுதியில் தொடரும் மின்தடைப் பிரச்சினை அப்பகுதி மக்கள் மத்தியில் தொடர்ந்து புகைச்சலை ஏற்படுத்தி வருகிறது.

இதையும் படிங்க: தமிழக மக்களுக்கு குட் நியூஸ்.. அடுத்த மாதம் பவர்கட் பிரச்சனைக்கு தீர்வு!! அதிகாரிகள் தகவல்!!