திமுக - தேமுதிக கூட்டணி மக்களின் மனநிலைக்கு எதிரானது திருச்சியில் ஜி.கே.வாசன் கடும் விமர்சனம்!

தமிழகத்தில் சட்டமன்றத் தேர்தல் நெருங்கி வரும் வேளையில், அரசியல் களத்தில் ஏற்பட்டுள்ள புதிய கூட்டணிக் மாற்றங்கள் குறித்துத் தமிழ் மாநில காங்கிரஸ் கட்சியின் தலைவர் ஜி.கே.வாசன் இன்று திருச்சியில் செய்தியாளர்களுக்குப் பேட்டியளித்தார். அப்போது, திமுக கூட்டணியில் தேமுதிக இணைந்தது குறித்து தனது கடுமையான விமர்சனங்களை அவர் முன்வைத்தார்.

திமுக கூட்டணியில் தேமுதிக இணைந்திருப்பது என்பது தமிழக மக்களின் தற்போதைய மனநிலைக்கு முற்றிலும் நேர்மாறாக உள்ளது. இது ஒரு கொள்கை ரீதியான அல்லது இயற்கையான கூட்டணி அல்ல. கடந்த காலங்களில் திமுக அரசை மிகக் கடுமையாக விமர்சித்து வந்த ஒரு கட்சி, இப்போது அதே கூட்டணியில் இணைந்திருப்பது வாக்காளர்களிடையே குழப்பத்தையும் அதிருப்தியையும் ஏற்படுத்தும்.

இதையும் படிங்க: நாளை மாலை திமுக மாவட்ட செயலாளர்கள் கூட்டம்.... முதல்வர் ஸ்டாலின் அவசர ஆலோசனை!

மக்கள் மாற்றத்தை எதிர்பார்க்கிறார்கள். இந்தச் செயற்கையான கூட்டணிகளுக்கு மக்கள் வரும் தேர்தலில் தகுந்த பாடம் புகட்டுவார்கள். தேர்தலுக்குப் பிறகு உண்மை நிலவரம் என்ன என்பது அனைவருக்கும் தெரியவரும். தேசிய ஜனநாயகக் கூட்டணி (NDA) தமிழகத்தில் மிகவும் பலமாக உள்ளது. மக்களின் உண்மையான தேவைகளை அறிந்து பணியாற்றி வரும் எங்களது கூட்டணியே வெற்றி பெறும்.

செய்தியாளர்களிடம் பேசிய அவர், வரும் தேர்தலில் திமுகவின் 'திராவிட மாடல்' பொய்களை மக்கள் புறக்கணிப்பார்கள் என்றும், தேசிய மற்றும் மாநில நலனை முன்னிறுத்தும் கட்சிகளுக்கே மக்கள் ஆதரவு அளிப்பார்கள் என்றும் உறுதிபடத் தெரிவித்தார். தேமுதிகவின் இந்தத் திடீர் அரசியல் நகர்வு எதிர்க்கட்சிகளிடையே பெரும் விவாதத்தை ஏற்படுத்தியுள்ள நிலையில், ஜி.கே.வாசனின் இந்த விமர்சனம் அரசியல் வட்டாரத்தில் கவனத்தைப் பெற்றுள்ளது.

இதையும் படிங்க: அரசியலில் நடக்கும் அதிசயம்..!! 10 வருஷத்துக்கு முன் கலைஞர் சொன்ன அந்த வார்த்தை..!! இப்போது சாத்தியமானது எப்படி..??