இடி, மின்னல், சூறைக்காற்று!! 22 மாவட்டங்களுக்கு மழை அலர்ட்!! கொட்டக்காத்திருக்கும் கனமழை!

சென்னை: தமிழகத்தில் வடகிழக்கு பருவமழை தொடர்ந்து சீற்றம் காட்டி வரும் நிலையில், இன்று மற்றும் நாளை கோவை, நீலகிரி உள்ளிட்ட 22 மாவட்டங்களில் இடி, மின்னல் மற்றும் பலத்த காற்றுடன் கனமழை பெய்ய வாய்ப்புள்ளதாக வானிலை ஆய்வு மையம் எச்சரிக்கை விடுத்துள்ளது.

நேற்று காலை வரையிலான 24 மணி நேரத்தில் அதிகபட்சமாக கரூர் மாவட்டம் குளித்தலையில் 14 செ.மீ. மழை பதிவாகியுள்ளது. அதே மாவட்டத்தில் மற்றொரு இடத்தில் 10 செ.மீ. மழையும், ராமநாதபுரம் மாவட்டம் ஆர்.எஸ். மங்கலத்தில் 9 செ.மீ. மழையும் பெய்துள்ளது. சென்னையில் முகலிவாக்கம், ராஜா அண்ணாமலைபுரம், சைதாப்பேட்டை உள்ளிட்ட பகுதிகளில் தலா 1 செ.மீ. மழை பதிவானது.

குமரிக்கடல் பகுதியில் ஒரு வளிமண்டல சுழற்சியும், குமரிக்கடல் முதல் தென்மேற்கு மத்தியப் பிரதேசம் வரை காற்றழுத்த தாழ்வுப் பகுதியும் நிலவுவதால் இந்த மழைப் பொழிவு ஏற்பட வாய்ப்புள்ளதாக வானிலை மையம் தெரிவித்துள்ளது.

இதையும் படிங்க: இடி, மின்னலுடன் கொட்டித்தீர்த்த மழை!! நெல்லையில் 168 மி.மீட்டரில் கனமழை பதிவு!

இன்று தென் மாவட்டங்கள் மற்றும் வட மாவட்டங்களின் சில பகுதிகளில் இடி மின்னலுடன் மிதமான மழை பெய்யக்கூடும். குறிப்பாக நீலகிரி, கோவை, ஈரோடு, திருப்பூர், திண்டுக்கல், மதுரை, தேனி, தென்காசி, விருதுநகர், திருநெல்வேலி, கன்னியாகுமரி, சிவகங்கை, ராமநாதபுரம், தூத்துக்குடி, தஞ்சாவூர், திருவாரூர், நாகப்பட்டினம், மயிலாடுதுறை, புதுக்கோட்டை, திருச்சி, நாமக்கல், கரூர் மற்றும் காரைக்கால் பகுதிகளில் சில இடங்களில் இன்றும், நாளையும் இடி, மின்னல், பலத்த காற்றுடன் கனமழை பெய்யும் என எச்சரிக்கை விடுக்கப்பட்டுள்ளது.

வானிலை மையம் மக்களுக்கு சில முக்கிய அறிவுரைகளை வழங்கியுள்ளது. மழை நீர் தேங்கும் பகுதிகளில் கவனமுடன் இருக்குமாறும், மின்னல் தாக்கும் அபாயம் உள்ளதால் வெளிப்புற நடவடிக்கைகளை குறைத்துக்கொள்ளுமாறும், விவசாயிகள் மற்றும் மீனவர்கள் எச்சரிக்கையுடன் இருக்குமாறும் அறிவுறுத்தியுள்ளது.

தமிழகத்தில் அடுத்த சில நாட்களுக்கு மழை நீடிக்கும் என எதிர்பார்க்கப்படும் நிலையில், பொதுமக்கள் உஷாருடன் இருக்க வேண்டும் என அதிகாரிகள் வலியுறுத்தியுள்ளனர். 

இதையும் படிங்க: அடுத்த 6 நாட்களுக்கு இடி, மின்னலுடன் மழை! லிஸ்ட்ல உங்க ஊரும் இருக்கா? வானிலை மையம் அப்டேட்!