7 மாவட்டங்களுக்கு கனமழை எச்சரிக்கை! சென்னை வானிலை ஆய்வு மையம் அறிவிப்பு!

தென்மேற்கு வங்கக்கடல் முதல் லட்சத்தீவு பகுதிகள் வரை நிலவும் வளிமண்டலக் கீழடுக்குச் சுழற்சி காரணமாக, ராணிப்பேட்டை, திருவள்ளூர், நீலகிரி மாவட்டங்கள் மற்றும் கோவை, தேனி, திருநெல்வேலி, கன்னியாகுமரி மாவட்டங்களின் மலைப்பகுதிகளில் ஓரிரு இடங்களில் இடி மின்னலுடன் கூடிய கனமழை பெய்யக்கூடும் எனச் சென்னை மண்டல வானிலை ஆய்வு மையம் எச்சரித்துள்ளது.

கடந்த 24 மணி நேரத்தில் தமிழ்நாட்டில் ஓரிரு இடங்களில் மழை பதிவாகியுள்ளது. அதிகபட்சமாகச் சென்னை மாதவரத்தில் 38.4 மி.மீ (4 செ.மீ) மழை பதிவாகியுள்ளது. சமவெளிப் பகுதிகளில் அதிகபட்சமாக மதுரை விமான நிலையத்தில் 40.5° செல்சியஸ் வெப்பநிலையும், குறைந்தபட்சமாகக் கோவை விமான நிலையத்தில் 22.4° செல்சியஸ் வெப்பநிலையும் பதிவாகியுள்ளது.

இன்று (06-08-2026) ராணிப்பேட்டை, திருவள்ளூர், நீலகிரி மற்றும் கோவை, தேனி, நெல்லை, கன்னியாகுமரி மலைப்பகுதிகளில் கனமழை பெய்ய வாய்ப்புள்ளது. சென்னை, காஞ்சிபுரம், செங்கல்பட்டு, வேலூர் உள்ளிட்ட மாவட்டங்கள் மற்றும் புதுவை, காரைக்கால் பகுதிகளில் மணிக்கு 40 முதல் 50 கி.மீ வேகத்தில் பலத்த காற்றுடன் மிதமான மழை பெய்யக்கூடும்.

இதையும் படிங்க: 12 மாவட்டங்களில் கனமழை எச்சரிக்கை! சென்னை மண்டல வானிலை ஆய்வு மையம் அறிவிப்பு!

நாளை (07-08-2026) நீலகிரி மாவட்டம் மற்றும் கோவை, தேனி மலைப்பகுதிகளில் ஓரிரு இடங்களில் இடி மின்னலுடன் கூடிய கனமழை பெய்யக்கூடும். சென்னை உள்ளிட்ட வட கடலோர மாவட்டங்களில் மிதமான மழை தொடரும்.

சென்னையில் அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் மாலை அல்லது இரவு நேரங்களில் இடி மின்னலுடன் கூடிய மிதமான மழை பெய்யக்கூடும். அதிகபட்ச வெப்பநிலை 36° செல்சியஸை ஒட்டி இருக்கும் எனத் தென் மண்டல வானிலை ஆய்வு மையம் தெரிவித்துள்ளது.

குமரிக்கடல், தெற்கு வங்கக்கடல் மற்றும் அரபிக்கடல் பகுதிகளில் மணிக்கு 45 முதல் 55 கி.மீ வேகத்திலும், இடையிடையே 65 கி.மீ வேகத்திலும் சூறாவளிக்காற்று வீசக்கூடும் என்பதால், ஆகஸ்ட் 10 வரை குறிப்பிடப்பட்ட கடல் பகுதிகளுக்கு மீனவர்கள் செல்ல வேண்டாம் என அறிவுறுத்தப்பட்டுள்ளனர்.

இதையும் படிங்க: சூறாவளி காற்று எச்சரிக்கை! ஆகஸ்ட் 5 வரை மீன்பிடிக்க செல்ல வேண்டாம் என அறிவுறுத்தல்!