சொந்தக் கட்சிக்காரரே ஆனாலும் விதி ஒன்றுதான்.. ஆதவ் பேச்சை நீக்கி அதிரடி காட்டிய ஜே.சி.டி.பிரபாகர்!

தமிழ்நாடு சட்டமன்ற வரலாற்றில் சபாநாயகர் பதவி எப்போதும் விமர்சனங்களுக்கு இலக்காகியே வந்துள்ளது. ஆளுங்கட்சி சார்பில் தேர்ந்தெடுக்கப்படுபவர் எதிர்க்கட்சிக் குரலை அடக்குவதாக குற்றச்சாட்டுகள் எழுவது வழக்கமான ஒன்று. ஆனால் 17-வது சட்டப்பேரவையில் இந்த பிம்பத்தை உடைத்து, அனைத்துத் தரப்பு உறுப்பினர்களின் நம்பிக்கையையும் வென்றுள்ளார் சபாநாயகர் ஜே.சி.டி.பிரபாகர்.

எம்.ஜி.ஆர். காலத்தில் அரசியலில் நுழைந்த இவர், அதிமுகவில் நீண்ட காலம் பணியாற்றி, வில்லிவாக்கம் தொகுதியில் இருமுறை சட்டமன்ற உறுப்பினராக இருந்தவர். 50 ஆண்டுகளுக்கும் மேற்பட்ட அனுபவத்துடன் 2026-இல் தமிழக வெற்றிக் கழகத்தில் இணைந்து, சென்னை ஆயிரம் விளக்கு தொகுதியில் வெற்றி பெற்றார். மே 12, 2026 அன்று 17-வது சட்டப்பேரவையின் சபாநாயகராக ஒருமனதாகத் தேர்ந்தெடுக்கப்பட்டார். பதவியேற்றபோதே நடுநிலைமையுடன் செயல்படுவதாக உறுதியளித்தார்.

சட்டமன்றத்தில் காரசாரமான விவாதங்களும் அமளிகளும் இயல்பானவை. அத்தகைய சூழல்களில் உணர்ச்சிவசப்படாமல், அமைதியான அணுகுமுறையுடன் அவையின் கண்ணியத்தை காப்பாற்றும் அவரது பாணி அனைவரையும் வியப்பில் ஆழ்த்தியுள்ளது. முதிர்ச்சியும் ஜனநாயகப் பண்பும் கொண்ட வழிகாட்டலால் இன்று அனைத்துக் கட்சியினராலும் பாராட்டப்படுகிறார். பொதுவாக சபாநாயகர் ஆளுங்கட்சிக்குச் சாதகமாகச் செயல்படுவார் என்ற எண்ணம் உண்டு. ஆனால் பிரபாகர் அந்த எல்லையைத் தாண்டி செயல்படுகிறார். 

இதையும் படிங்க: எம்எல்ஏ-வை கைது செய்ய சபாநாயகர் அனுமதி தேவையா..? என்ன விதி..? ஜே.சி.டி பிரபாகர் விளக்கம்..!!

விதிகளை மீறிப் பேசுபவர்கள் யாராக இருந்தாலும், ஆளுங்கட்சியா அல்லது எதிர்க்கட்சியா என்ற பாகுபாடின்றி, உடனடியாகத் தடுத்து நிறுத்துகிறார். அன்-பார்லிமென்டரி வார்த்தைகளுக்கு கடுமையான எச்சரிக்கையும் நடவடிக்கையும் எடுக்கிறார். தவெக முக்கிய தலைவர்களில் ஒருவரான ஆதவ் அர்ஜுனா உள்ளிட்ட சொந்தக் கட்சி உறுப்பினர்களின் பேச்சில் இருந்த தகாத வரிகளை ஒன்றுக்கும் மேற்பட்ட முறை அவைக் குறிப்பிலிருந்து நீக்கியுள்ளார். மேலும் இரண்டு தவெக உறுப்பினர்களின் உணர்ச்சிவசப்பட்ட பேச்சுக்களையும் நீக்கி, சட்டமன்றக் கண்ணியமே முதன்மை என்பதை உணர்த்தியுள்ளார்.

இந்த நடவடிக்கை எதிர்க்கட்சிகளிடையே பெரும் நம்பிக்கையை ஏற்படுத்தியுள்ளது. சொந்தக் கட்சிக்கு சலுகை காட்டாதவர் நிச்சயம் நடுநிலையாகவே அவையை நடத்துவார் என்ற உணர்வு ஆழமாகப் பதிந்துள்ளது. எதிர்க்கட்சிகளுக்கு போதிய நேரம் வழங்குதல், கூச்சல் குழப்பத்தில் விதிகளைச் சுட்டிக்காட்டி அமைதிப்படுத்துதல், கடுமையான சூழல்களிலும் புன்னகையுடன் கட்டுப்பாட்டை மீட்டெடுத்தல் ஆகியவை அவரது செயல்பாடுகளாகும். இவ்வாறு ஜே.சி.டி.பிரபாகர், தமிழ்நாடு சட்டமன்ற வரலாற்றில் ஒரு புதிய வழிகாட்டியாகத் திகழ்கிறார்.

இதையும் படிங்க: சொல்லுங்க உதய்..! மேகதாது விவகாரத்தில் ஸ்டாலின் அரசு செய்தது என்ன.? ஆதவ் அர்ஜுனா பேரவையில் கேள்வி..!