இறைவனடி சேர்ந்தார் ஐ.ஏ.எஸ் அதிகாரி பீலா வெங்கடேஷ்.. அரசு மரியாதையுடன் உடல் தகனம்..!!

தமிழ்நாட்டின் மூத்த ஐ.ஏ.எஸ். அதிகாரி டாக்டர் பீலா வெங்கடேஷ் உடல்நலக்குறைவால் நேற்று சென்னையில் காலமானார். அவருக்கு வயது 56. கடந்த மூன்று மாதங்களாக அரிதான மூளை புற்றுநோயால் பாதிக்கப்பட்டு சிகிச்சை பெற்று வந்த அவர், நேற்று உயிரிழந்தார். இவரது மறைவு தமிழ்நாட்டின் நிர்வாக அமலாக்கத்தில் பெரும் இழப்பாகக் கருதப்படுகிறது.

1997-ஆம் பேட்ச் ஐ.ஏ.எஸ். அதிகாரியான பீலா, மெட்ராஸ் மருத்துவக் கல்லூரியில் எம்பிபிஎஸ் பட்டம் பெற்ற மருத்துவராவார். தூத்துக்குடி மாவட்டத்தைச் சேர்ந்த இவர், பீகார், ஜார்கண்ட் ஆகிய மாநிலங்களில் ஆரம்பப் பணியைத் தொடங்கி, பின்னர் தமிழ்நாட்டுக்கு மாற்றப்பட்டார். இந்திய மருத்துவம் மற்றும் ஹோமியோபதி ஆணையர், மீன்வளத் துறை, நகரத் திட்டமிடல், சுகாதாரத் துறை உள்ளிட்ட பல்வேறு முக்கியப் பதவிகளை இவர் வகித்துள்ளார்.

இதையும் படிங்க: அரங்கம் அதிர... "கல்வியில் சிறந்த தமிழ்நாடு" நிகழ்ச்சி கோலாகல தொடக்கம்...!

தற்போது ஆற்றுசக்தித் துறை முதன்மைச் செயலர் பதவியில் இருந்து மூன்று மாதங்களுக்கு முன் சிகிச்சைக்காக விடுப்பெறவும், மறைவுக்குச் சில நாட்களுக்கு முன் ஓய்வு பெறவும் முடிவு செய்தார். கோவிட்-19 தொற்று நோயின் காலத்தில் தமிழ்நாட்டின் சுகாதாரச் செயலராகப் பணியாற்றிய பீலா, தினசரி பத்திரிக்கையாளர்களுடன் நடத்திய அறிவிப்புகளால் மக்கள் மத்தியில் பிரபலமானார்.

அவரது அளவற்ற பொறுப்புணர்வும், தெளிவான தொடர்பாடலும், தொற்றுநோயை கட்டுப்படுத்துவதில் முக்கியப் பங்கு வகித்தன. மருத்துவமனை மேலாண்மை தகவல் அமைப்பை (Hospital Management Information System) அறிமுகப்படுத்தி, நோயாளிகளின் தரவுகளை டிஜிட்டல் மயமாக்கி, ஆராய்ச்சிக்கும் எளிமைப்படுத்தியது அவரது சாதனைகளில் முக்கியமானது. அவரது பணி தமிழ்நாட்டின் சுகாதார அமைப்பை வலுப்படுத்தியது" என மக்கள் பாராட்டினர்.

பீலாவின் தந்தை எல்.என். வெங்கடேஷ் முன்னாள் இயக்குநர் ஜெனரல் ஆஃப் போலீஸ் (டி.ஜி.பி.), தாய் ராணி வெங்கடேஷ் காங்கிரஸ் கட்சியின் மூத்தத் தலைவரும், சாத்தான்குளம் தொகுதி முன்னாள் எம்.எல்.ஏ.வும் ஆவார். 1992இல் ஐ.பி.எஸ். அதிகாரி ராஜேஷ் தாஸை மணந்து, பீலா ராஜேஷ் என்று அழைக்கப்பட்டார். திருமண வாழ்க்கை சர்ச்சைகளால் பிரிந்து, விவாகரத்து வழக்கில் ஈடுபட்டு, பிறகு தந்தை பெயரைத் தக்கவைத்து பீலா வெங்கடேஷ் என்று மாற்றிக் கொண்டார். 

இதனிடையே உயிரிழந்த பீலா வெங்கடேசனின் உடலுக்கு தமிழ்நாட்டு முதலமைச்சர் மு.க ஸ்டாலின், துணை முதலமைச்சர் உதயநிதி ஸ்டாலின், அமைச்சர்கள், அரசு அதிகாரிகள் என பலர் நேரில் சென்று அஞ்சலி செலுத்தினர். இந்நிலையில் பீலா வெங்கடேஷின் உடல், பெசண்ட் நகர் மின் மயானத்திற்கு கொண்டு செல்லப்பட்டது. அங்கு அதிகாரிகள் மற்றும் குடும்பத்தினர் இறுதி மரியாதை செலுத்திய பிறகு, உடல் தகனம் செய்யப்பட்டது. 

இதையும் படிங்க: ரூ.62,370 கோடி மதிப்பு..! இந்திய விமானப்படைக்கு 97 புதிய போர் விமானங்கள்..!!