விஜயை கைது செய்ய வேணாம்!! மு.க.ஸ்டாலினிடம் ராகுல்காந்தி கோரிக்கை?! தேசிய கட்சிகள் தலையீடு!

தமிழக வெற்றிக் கழக (தவெக) தலைவரும் நடிகருமான விஜயின் கரூர் பிரசாரத்தில் ஏற்பட்ட நெரிசலில் 41 பேர் உயிரிழந்த சம்பவம், தமிழக அரசியலில் பெரும் புயலை கிளப்பியுள்ளது. இந்த துயரச் சம்பவத்தில் தவெக நிர்வாகிகள் மீது கைது நடவடிக்கைகள் முடுக்கிவிடப்பட்டுள்ள நிலையில், விஜய் ஏன் கைது செய்யப்படவில்லை என பல்வேறு அரசியல் கட்சித் தலைவர்கள் கேள்வி எழுப்பியுள்ளனர். இதற்கிடையே, உச்சநீதிமன்றத்தில் தவெக நிர்வாகிகளின் முன்ஜாமீன் மனு இன்று விசாரணைக்கு வருகிறது, இது மேலும் பரபரப்பை ஏற்படுத்தியுள்ளது.

செப்டம்பர் 27 அன்று, கரூர் மாவட்டம் வேலுசாமிபுரத்தில் நடந்த தவெக பிரசாரக் கூட்டத்தில், 25,000த்திற்கும் மேற்பட்டோர் கூடினர். அனுமதிக்கப்பட்ட எண்ணிக்கையை விட இரு மடங்கு கூட்டம், மோசமான நிர்வாகம், விஜயின் தாமதமான வருகை ஆகியவை நெரிசலை உருவாக்கியது. இதில் 41 பேர், பெரும்பாலும் பெண்களும் குழந்தைகளும், உயிரிழந்தனர். 100க்கும் மேற்பட்டோர் காயமடைந்தனர். இந்த சம்பவம் தமிழகத்தை உலுக்கியது. மதுரை உயர்நீதிமன்றம் சிறப்பு விசாரணைக் குழு (SIT) அமைக்க உத்தரவிட்டது.

கரூர் காவல் துறையினர், தவெக கரூர் மேற்கு பிரதேசச் செயலாளர் வி.பி. மதியழகன், மத்திய நகரச் செயலாளர் எம்.சி. பவுன்ராஜ் ஆகியோரை கைது செய்தனர். இருவருக்கும் 15 நாள் நீதிமன்றக் காவல் விதிக்கப்பட்டது. மேலும், சம்பவம் தொடர்பாக அவதூறு பரப்பியதாக யூடியூபர் பெலிக்ஸ் ஜெரால்ட், தவெக நிர்வாகிகள் இருவர், பாஜக நிர்வாகி ஒருவர் என நால்வர் கைது செய்யப்பட்டனர். 

இதையும் படிங்க: ஜெயிலா? ஜாமினா? தவிக்கும் தவெக நிர்வாகிகள்! சுப்ரீம் கோர்ட்டில் இன்று ரிசல்ட்?!

தவெக நிர்வாகி ஆதவ் அர்ஜூனா, சமூக ஊடகத்தில் ‘ஜென் Z போராட்டம் வெடிக்கும்’ என சர்ச்சைக்குரிய பதிவு செய்து நீக்கியதற்காக, அவர் மீது வழக்கு பதிவு செய்யப்பட்டு, போலீஸ் தேடி வருகிறது. தனி விமானம் மூலம் டெல்லி சென்று, பின்னர் உத்தரகாண்ட் சென்றதாக தகவல். இதேபோல், தவெக பொதுச் செயலாளர் புஸ்ஸி ஆனந்த், இணைப் பொதுச் செயலாளர் சி.டி.ஆர். நிர்மல் குமார் ஆகியோர் மீது 5 பிரிவுகளின் கீழ் வழக்கு பதிவு செய்யப்பட்டு, அவர்களும் தேடப்படுகின்றனர். சென்னை உயர்நீதிமன்றம் இவர்களின் முன்ஜாமீன் மனுவை தள்ளுபடி செய்த நிலையில், உச்சநீதிமன்றம் இன்று இந்த வழக்கை விசாரிக்கிறது.

விஜய் மீது நேரடியாக வழக்கு பதிவு செய்யப்படாதது, அரசியல் கட்சிகளிடையே சர்ச்சையை ஏற்படுத்தியுள்ளது. விடுதலை சிறுத்தைகள் தலைவர் தொல். திருமாவளவன், “திமுக-தவெக இடையே ரகசிய ஒப்பந்தம் உள்ளதா? அதனால் தான் விஜய் கைது செய்யப்படவில்லையா?” என கேள்வி எழுப்பினார். நாம் தமிழர் கட்சி ஒருங்கிணைப்பாளர் சீமான், திருமாவளவனின் கருத்தை ஆமோதித்து, “திமுக கூட்டணியில் உள்ளவரே இவ்வாறு கூறும்போது, உண்மையாகத்தான் இருக்கும்” என குறிப்பிட்டார். 

தமிழக வாழ்வுரிமைக் கட்சித் தலைவர் வேல்முருகன், “விஜயை கைது செய்யாமல் இருப்பது அரசியல் நோக்கமா?” என சந்தேகம் எழுப்பினார். தேமுதிக பொதுச் செயலாளர் பிரேமலதா விஜயகாந்த், “இந்த சம்பவத்தில் அரசும், விஜயும் தவறு செய்துள்ளனர். இதில் மாற்றுக் கருத்து இல்லை” என திட்டவட்டமாக கூறினார். டிடிவி தினகரன், “விஜயை கைது செய்தால் தவறான முன்னுதாரணமாகிவிடும் என முதலமைச்சர் ஸ்டாலின் தயங்குகிறார்” என விளக்கம் அளித்தார்.

காங்கிரஸ் மூத்த தலைவர் ராகுல் காந்தி, விஜயை கைது செய்ய வேண்டாம் என முதலமைச்சர் ஸ்டாலினிடம் கோரியதாக பேச்சு எழுந்தது. ஆனால், காங்கிரஸ் வட்டாரங்கள் இதை மறுத்து, “ராகுல் காந்தி, கரூர் சம்பவம் குறித்து விஜயிடம் தொலைபேசியில் பேசுவதற்கு முன், இதை ஸ்டாலினிடம் தெரிவித்தார். இதற்கும் விஜயின் கைது தவிர்ப்புக்கும் எந்த தொடர்பும் இல்லை” என விளக்கமளித்தனர்.

தவெக கட்சி, இந்த கைது நடவடிக்கைகளை “அரசியல் பழிவாங்கல்” என விமர்சித்து, சிபிஐ விசாரணை கோரி உயர்நீதிமன்றத்தில் வழக்கு தொடர்ந்துள்ளது. விஜய், “என்னை என்ன வேண்டுமானலும் செய்யுங்கள். கட்சி உறுப்பினர்களை விட்டு விடுங்கள்” என வீடியோ வெளியிட்டார். 2026 சட்டமன்றத் தேர்தலுக்கு முன், இந்த சம்பவம் தவெகவின் உற்சாகத்தை பாதித்துள்ளது. விஜயின் மாநில சுற்றுப்பயணம் தற்காலிகமாக ரத்து செய்யப்பட்டுள்ளது.

உச்சநீதிமன்றத்தின் இன்றைய தீர்ப்பு, தவெகவின் எதிர்காலத்தையும், தமிழக அரசியல் களத்தையும் பெரிதும் பாதிக்கும் என எதிர்பார்க்கப்படுகிறது.

இதையும் படிங்க: கரூர் சம்பவம்.! பவரை கையில் எடுக்கும் அஸ்ரா கார்க்! சென்னைக்கு பறக்கும் முக்கிய டாக்குமெண்ட்ஸ்!