மலர்களால் நிரம்பி வழியும் கொடைக்கானல்..!! பிரையண்ட் பூங்காவில் 63வது மலர் கண்காட்சி தொடக்கம்..!! ரசிக்கும் மக்கள்..!!

திண்டுக்கல் மாவட்டத்தின் மலை ராணியாக விளங்கும் கொடைக்கானல், ஏப்ரல்-மே மாதங்களில் கோடை சீசனை அனுபவிக்க ஏராளமான உள்ளூர் மற்றும் வெளி மாநில சுற்றுலாப் பயணிகளை ஈர்க்கும் சிறப்பு இடமாகத் திகழ்கிறது. இந்த ஆண்டும், சுற்றுலாப் பயணிகளின் மகிழ்ச்சியைப் பெருக்கும் வகையில் மே மாதத்தில் மலர் கண்காட்சியும் கோடை விழாவும் சிறப்பாக நடைபெறுகின்றன.

தோட்டக்கலைத் துறையின் கட்டுப்பாட்டில் இயங்கும் பிரையண்ட் பூங்காவில் இன்று 63-வது மலர் கண்காட்சி பிரமாண்டமாக தொடங்கியது. லட்சக்கணக்கான மலர்கள் பல்வேறு வண்ணங்களில் அழகிய பூந்தோட்டங்களில் பூத்துக் குலுங்குகின்றன. அலங்கார மேடைகளில் 10,000-க்கும் மேற்பட்ட அலங்காரச் செடிகள், மலர்கள் மற்றும் பசுமைச் செடிகள் காட்சிப்படுத்தப்பட்டுள்ளன. இந்தக் கண்காட்சி சுற்றுலாப் பயணிகளுக்கு காட்சி விருந்தாக அமைந்துள்ளது.

இதையும் படிங்க: கொடைக்கானலில் குவியும் சுற்றுலா பயணிகள்! கட்டண உயர்வு மற்றும் போக்குவரத்து நெரிசலால் கடும் அவதி!

கண்காட்சியில் தமிழ்நாட்டின் பாரம்பரியம், கலாச்சாரம் மற்றும் பண்பாட்டை மலர்களால் அழகுற வடிவமைத்து காட்சிப்படுத்தியுள்ளனர். பாம்பன் பாலம், ஜல்லிக்கட்டு காளையை வீரர்கள் அடக்கும் காட்சி, தஞ்சை பிரகதீஸ்வரர் கோயில் கோபுரம் ஆகியவை லட்சக்கணக்கான கொய் மலர்களைப் பயன்படுத்தி உருவாக்கப்பட்டுள்ளன. மகளிர் மேம்பாட்டை வலியுறுத்தும் அம்சங்கள், இரட்டை இதய வடிவிலான செல்பி பாயிண்ட், சிறுவர்களை மிகவும் கவரும் நேரோட்டோ பொம்மை உள்ளிட்ட ஏராளமான அலங்காரங்கள் பார்வையாளர்களை ஈர்க்கின்றன.

மேலும், பல்வேறு காய்கறிகளைப் பயன்படுத்தி உருவாக்கப்பட்ட அழகிய சிற்பங்களும் பார்வையாளர்களிடையே பெரும் ஆர்வத்தை ஏற்படுத்துகின்றன. சுற்றுலாப் பயணிகள் இந்த அற்புதமான காட்சிகளை ரசித்து, செல்பி எடுத்து, புகைப்படங்கள் பதிவு செய்து மகிழ்ச்சியுடன் செல்கின்றனர். இந்த 63-வது மலர் கண்காட்சி மே 31-ம் தேதி வரை 12 நாட்கள் நடைபெற உள்ளது. இந்த காலகட்டத்தில் பூங்கா நுழைவுக் கட்டணம் உயர்த்தப்பட்டுள்ளது. 

எனினும், மாற்றுத் திறனாளிகள் மற்றும் அவர்களுடன் வருபவர்களுக்கு நுழைவுக் கட்டணம் இலவசம் என அறிவிக்கப்பட்டுள்ளது. கொடைக்கானலின் இயற்கை அழகுடன் இணைந்து நடைபெறும் இந்த மலர் கண்காட்சி, சுற்றுலாத் துறையின் வருவாயை அதிகரிப்பதோடு, உள்ளூர் வியாபாரங்களுக்கும் பெரும் பலனைத் தரும் என எதிர்பார்க்கப்படுகிறது. கோடை வெயிலில் இருந்து தப்பி, மலை மருத்துவ நகரின் குளிர்ச்சியான சூழலையும், மலர்களின் மணத்தையும் ஒரே நேரத்தில் அனுபவிக்க விரும்புவோர் இந்தக் கண்காட்சியைத் தவறவிடக் கூடாது.

இதையும் படிங்க: ரெண்டு நாளைக்கு ஜாலிதான்..! கொடைக்கானலில் சுற்றுலா தலங்களைக் கட்டணமின்றி பார்வையிட அனுமதி..!!