சுதீஷ் கோரிக்கை.. உடனடி ஆக்‌ஷன்! 6 மாதத்தில் ஏர்போர்ட் ஓபன்! வேலூருக்கு செம சர்ப்ரைஸ்!!

தமிழ்நாட்டின் விமானப் போக்குவரத்து வரைபடத்தில் புதிய அத்தியாயம் எழுதப்படும் நிலையில் உள்ளது. சென்னை, கோயம்புத்தூர், மதுரை, திருச்சி, சேலம், தூத்துக்குடி ஆகிய ஆறு முக்கிய நகரங்களில் ஏற்கனவே பிஸியாக இயங்கி வரும் விமான நிலையங்களுக்கு அடுத்து, வட தமிழகத்தின் மையப் புள்ளியான வேலூரும் விரைவில் இணைக்கப்பட உள்ளது. அப்துல்லாபுரத்தில் 98 ஏக்கர் பரப்பளவில் அமைந்துள்ள இந்த விமான நிலையம், நீண்டகால எதிர்பார்ப்புக்குப் பிறகு இறுதிக் கட்டத்தை நெருங்கி வருகிறது.

2017ஆம் ஆண்டு மத்திய அரசின் உடான் திட்டத்தின் கீழ் மீண்டும் உயிர்பெற்ற இந்தத் திட்டத்திற்கு சுமார் 65 கோடி ரூபாய் நிதி ஒதுக்கீடு செய்யப்பட்டது. 2018 முதல் உள்கட்டமைப்புப் பணிகள் தீவிரமாக நடைபெற்றன. இன்று ஓடுபாதை, முனையக் கட்டிடம் உள்ளிட்ட முக்கிய வசதிகள் தயார் நிலையில் உள்ளன. ஆனால், “எப்போது விமானங்கள் பறக்கும்?” என்ற கேள்வி வேலூர் மக்களிடையே இன்னும் தொங்கிக் கொண்டிருக்கிறது.

சமீபத்தில் வேலூர் மாவட்டத்திற்கு வருகை தந்த மத்திய இணை அமைச்சர் எல்.முருகன், “சீரமைப்புப் பணிகள் ஏறக்குறைய முடிவடைந்துவிட்டன. எஞ்சிய சிறு பணிகள் விரைந்து முடிக்கப்பட்டு, மிக விரைவில் பொதுமக்கள் பயன்பாட்டிற்குத் திறக்கப்படும்” என உறுதி அளித்தார். அதனைத் தொடர்ந்து, தேமுதிக மாநிலங்களவை உறுப்பினர் எல்.கே.சுதீஷ் டெல்லியில் மத்திய விமானப் போக்குவரத்துத் துறை அமைச்சர் ராம்மோகன் நாயுடுவை நேரில் சந்தித்து மனு அளித்தார். 

இதையும் படிங்க: அமித்ஷா- சுதீஷ் திடீர் சந்திப்பு..! "தமிழக அரசியலில் புதிய சஸ்பென்ஸ்..! பரபரப்பு களம்..!!

மனுவைப் பெற்ற அமைச்சர், தற்போதைய கள நிலவரம் குறித்து அதிகாரிகளிடம் விரிவாக விசாரித்து, நிலுவையிலுள்ள அனைத்துப் பணிகளையும் விரைந்து முடிக்குமாறு உத்தரவிட்டார். அத்துடன், “அடுத்த ஆறு மாதங்களுக்குள் வேலூர் விமான நிலையம் முழுமையாகப் பயன்பாட்டுக்கு வரும்” என்ற உறுதிமொழியையும் வழங்கினார்.

இந்த விமான நிலையம் வெறும் போக்குவரத்து வசதி மட்டும் அல்ல. இது பிராந்தியத்தின் பொருளாதார முகத்தை மாற்றும் ஆற்றல் கொண்டது. உலகப் புகழ்பெற்ற சி.எம்.சி. மருத்துவமனைக்கு நாள்தோறும் நாட்டின் பல்வேறு பகுதிகளிலிருந்தும் வெளிநாடுகளிலிருந்தும் வரும் ஆயிரக்கணக்கான நோயாளிகளுக்கு விரைவான இணைப்பு கிடைக்கும். ஆம்பூர், வாணியம்பாடி பகுதிகளின் தோல் பொருட்கள் ஏற்றுமதித் தொழில் புதிய வேகத்தைப் பெறும். 

வி.ஐ.டி. போன்ற கல்வி நிறுவனங்களின் சர்வதேச மாணவர்கள், வேலூர் பொற்கோயில் மற்றும் திருவண்ணாமலை அருணாசலேஸ்வரர் ஆலயத்திற்குச் செல்லும் ஆன்மீகப் பயணிகள் ஆகியோருக்கும் இது சிறந்த இணைப்பாக அமையும். முதற்கட்டமாக சிறிய ரக விமானங்கள் மூலம் சென்னை, பெங்களூரு உள்ளிட்ட நகரங்களுக்குச் சேவைகள் தொடங்க திட்டமிடப்பட்டுள்ளது.

தமிழகத்தின் பரப்பளவு மற்றும் மக்கள் தொகைக்கு ஏற்ப விமான நிலையங்களின் எண்ணிக்கை அதிகரிக்கப்பட வேண்டும் என்ற நீண்டகாலக் கோரிக்கைக்கு வேலூர் விமான நிலையம் ஒரு முக்கியப் பதிலாக அமையப் போகிறது.

இதையும் படிங்க: தமிழகத்தில் மதுபான விலை பாட்டிலுக்கு ரூ.20 வரை உயர்வு! புதிய வரி! எதற்காக தெரியுமா?