மதுரை மீனாட்சி அம்மன் கோவில் குடமுழுக்கு பாதுகாப்பு வழக்கு! ஐகோர்ட் அதிரடி தீர்ப்பு! 

உலகப் புகழ்பெற்ற மதுரை அருள்மிகு மீனாட்சி சுந்தரேஸ்வரர் திருக்கோவில் மகா குடமுழுக்கு விழாவிற்கு வரும் லட்சக்கணக்கான பக்தர்களின் பாதுகாப்பிற்காக அனைத்து அரசுத் துறைகளும் இணைந்து விரிவான முன்னெச்சரிக்கை ஏற்பாடுகளை முழுவீச்சில் செய்து வரும் நிலையில், இதில் நீதிமன்றம் தலையிடத் தேவையில்லை எனக் குறிப்பிட்டு, பாதுகாப்பு ஏற்பாடுகளை முன்கூட்டியே செய்யக் கோரி தொடரப்பட்ட பொதுநல மனுவை சென்னை உயர் நீதிமன்ற மதுரைக் கிளை அதிரடியாகத் தள்ளுபடி செய்து உத்தரவிட்டுள்ளது.

காரைக்குடியைச் சேர்ந்த மணிகண்டன் என்பவர் உயர் நீதிமன்ற மதுரைக் கிளையில் பொதுநல மனு ஒன்றைத் தாக்கல் செய்திருந்தார். அம்மனுவில், செப்டம்பர் 6 முதல் 17 வரை நடைபெற உள்ள மதுரை மீனாட்சி சுந்தரேஸ்வரர் திருக்கோவில் குடமுழுக்குத் திருவிழாவிற்குத் தமிழ்நாடு மட்டுமின்றி உலகம் முழுவதிலுமிருந்து லட்சக்கணக்கான பக்தர்கள் வருகை தருவார்கள். எனவே, கூட்ட நெரிசல் மேலாண்மை, பாதுகாப்பு, மருத்துவம், சுகாதாரம், தடையில்லா குடிநீர் வசதி, அவசரகால முதலுதவி மையங்கள் மற்றும் போக்குவரத்து சீரமைப்பு உள்ளிட்ட விரிவான பாதுகாப்பு ஏற்பாடுகளை மாவட்ட நிர்வாகம் முன்கூட்டியே முறைப்படுத்த உத்தரவிட வேண்டும்; மேலும், பாதுகாப்புப் பணியில் ஈடுபடும் ஊழியர்களுக்கு அடிப்படை வசதிகளுடன் கூடிய பணி சுழற்சி முறையை அமல்படுத்த வேண்டும் எனக் கோரியிருந்தார்.

இந்த மனு நீதிபதிகள் சி.வி. கார்த்திகேயன் மற்றும் சக்திவேல் ஆகியோர் அடங்கிய அமர்வு முன்பு இன்று நேரடி விசாரணைக்கு வந்தது. அப்போது அரசு மற்றும் திருக்கோவில் நிர்வாகம் தரப்பில் ஆஜரான வழக்கறிஞர்கள் மிகக் கடுமையான வாதங்களை முன்வைத்தனர். மனுதாரர் கோவில் திருவிழாக்கள் தொடர்பாக விளம்பர நோக்கத்துடன் தொடர்ச்சியாக இதுபோன்ற தேவையற்ற மனுக்களைத் தாக்கல் செய்து வருகிறார்; எனவே, மனுதாரருக்கு அதிகபட்ச அபராதம் விதித்து இந்த மனுவை உடனடியாகத் தள்ளுபடி செய்ய வேண்டும். மாவட்ட நிர்வாகம், காவல்துறை மற்றும் கோவில் நிர்வாகம் ஒருங்கிணைந்து குடமுழுக்கு விழாவைச் சிறப்பாக நடத்தத் தேவையான அனைத்து உச்சகட்ட பாதுகாப்பு ஏற்பாடுகளையும் ஏற்கனவே திட்டமிட்டுச் செயல்படுத்தி வருகிறது எனத் தெரிவித்தனர்.

இதையும் படிங்க: மதுரை மீனாட்சி அம்மன் திருக்கல்யாண விருந்து தடை வழக்கு! அரசு பதிலளிக்க உயர்நீதிமன்றம் உத்தரவு!

இருதரப்பு வாதங்களையும் கேட்டறிந்த நீதிபதிகள், மனுதாரருக்கு அபராதம் விதிக்க மறுப்பு தெரிவித்தனர். அதேவேளையில், தமிழக அரசு, காவல்துறை, சுகாதாரத்துறை, உணவுப் பாதுகாப்புத்துறை, தீயணைப்புத்துறை மற்றும் உள்ளாட்சித் தூய்மைப் பணியாளர்கள் என அனைத்து அரசுத் துறைகளும் ஒருங்கிணைந்து மீனாட்சி அம்மன் கோவில் குடமுழுக்கைச் சிறப்பாகவும் பாதுகாப்பாகவும் நடத்த முறையான போர்க்கால நடவடிக்கைகளை எடுத்து வருவது தெளிவாகத் தெரிகிறது; எனவே, இந்த விவகாரத்தில் நீதிமன்றம் தனியாகத் தலையிட வேண்டிய அவசியம் ஏதுமில்லை எனக் கூறி, வழக்கை முழுமையாகத் தள்ளுபடி செய்து உத்தரவிட்டனர்.

இதையும் படிங்க: தமிழுக்கு முக்கியத்துவம் தாங்க! மதுரை மீனாட்சியம்மன் கோவில் கும்பாபிஷேக வழக்கில் விரைவில் முக்கிய தீர்ப்பு!