திமுக - காங்., மோதல் உச்சம்! அனிதா ராதாகிருஷ்ணனுக்கு மாணிக்கம் தாகூர் பதிலடி!

சென்னை: திமுக முன்னாள் அமைச்சர் அனிதா ராதாகிருஷ்ணன் தனது பேச்சில், “உங்களை அதிகாரத்துக்கு கொண்டு வர உழைத்தவர்கள் நாங்கள். எங்களுக்கும் திருப்பி பேசத் தெரியும்” எனக் கூறியதற்கு காங்கிரஸ் எம்பி மாணிக்கம் தாகூர் கடும் கண்டனம் தெரிவித்துள்ளார். இந்தப் பேச்சு மூன்றாம் பாலினத்தவர்களை இழிவுபடுத்தும் வகையில் உள்ளது என அவர் விமர்சித்தார்.

மாணிக்கம் தாகூர் வெளியிட்ட அறிக்கையில், “அமைச்சர் பதவியும் அதிகாரமும் போன பிறகு சிலரின் மொழி எந்த அளவுக்கு தாழ்ந்து விழுகிறது என்பதற்கு அனிதா ராதாகிருஷ்ணன் பேச்சு சிறந்த உதாரணம். ‘பொ’ என்ற வார்த்தை பயன்படுத்தியது காங்கிரஸ் சட்டமன்ற உறுப்பினர்களை மட்டுமல்ல, மூன்றாம் பாலின சமூகத்தையே இழிவுபடுத்தும் அருவருப்பான மனநிலையைக் காட்டுகிறது. சமூகத்தில் மரியாதைக்காக போராடும் ஒரு பிரிவினரை இப்படி கேவலப்படுத்துவது வெட்கக்கேடான செயல்” என்று தெரிவித்தார்.

மேலும், “நாங்கள் உங்களை அதிகாரத்துக்கு கொண்டு வர உழைத்தவர்கள் என்பது உண்மைதான். ஆனால் எங்களுக்கும் திருப்பி பேசத் தெரியும், அரசியலில் பதிலடி கொடுக்கத் தெரியும். இருப்பினும் அரசியல் நாகரிகத்தை மதித்து திமுக தலைமையின் பதிலை எதிர்பார்க்கிறோம்” என்றார்.

இதையும் படிங்க: சொன்னத செஞ்சுட்டாரு முதல்வர் விஜய்..! அமைச்சரவையில் கதர் அணிந்த இரு அமைச்சர்கள்... மாணிக்கம் தாகூர் பெருமிதம்..!

எதிர்க்கட்சித் தலைவர் ராகுல் காந்தி உள்ளிட்ட மூத்த தலைவர்களை தொடர்ந்து தரக்குறைவாக பேசும் அரசியலை திமுக தலைமை ஊக்குவிக்கிறதா என்ற கேள்வியும் மாணிக்கம் தாகூர் எழுப்பினார். “அரசியலில் கருத்து வேறுபாடு இருக்கலாம். ஆனால் பெண்கள், மூன்றாம் பாலினத்தவர்கள் மற்றும் எதிர்க்கட்சியினர் மீது இழிவான வார்த்தைகளைப் பயன்படுத்துவது அரசியல் கலாச்சாரம் அல்ல, அது அரசியல் நாகரிகத்தின் வீழ்ச்சி” என்று வலியுறுத்தினார்.

அனிதா ராதாகிருஷ்ணன் தனது வார்த்தைகளுக்கு மன்னிப்பு கேட்க வேண்டும் என்றும், திமுக தலைமை இந்தப் பேச்சை உடனடியாக வெளிப்படையாகக் கண்டிக்க வேண்டும் என்றும் மாணிக்கம் தாகூர் வலியுறுத்தியுள்ளார். இல்லையெனில் அதே மொழியில் பதிலடி கொடுக்க தயங்க மாட்டோம் என எச்சரித்தார்.

இந்தச் சர்ச்சை தமிழக அரசியல் களத்தில் பெரும் விவாதத்தை ஏற்படுத்தியுள்ளது. கூட்டணி கட்சிகளுக்கிடையேயான உறவு மேலும் மோசமடையுமா என்பதைப் பொறுத்திருந்து தான் பார்க்க வேண்டும்.
 

இதையும் படிங்க: “பாஜகவின் நீண்டநாள் கனவு நனவாகப்போகுது” - அதிமுகவை அலர்ட் செய்த மாணிக்கம் தாகூர்...!