பாமணி ஆற்றில் கழிவுநீர்: 100 கிராமங்கள் பாதிப்பு - பி.ஆர்.பாண்டியன் எச்சரிக்கை!

திருவாரூர் மாவட்டம் மன்னார்குடி நகராட்சியின் சுத்திகரிக்கப்படாத கழிவுநீர் பாமணி ஆற்றில் தங்குதடையின்றி நேரடியாகக் கலந்து வருவதால், சுற்றுவட்டாரத்தில் உள்ள 100-க்கும் மேற்பட்ட கிராமங்களின் நிலத்தடி நீர்மட்டம் மற்றும் குடிநீர் ஆதாரம் முற்றிலுமாகப் பாழாகும் பேராபத்து ஏற்பட்டுள்ளது என்றும், இதனை உடனடியாகத் தடுத்து நிறுத்தத் தவறினால் காந்தி ஜெயந்தி தினமான அக்டோபர் 2-ஆம் தேதியன்று முத்துப்பேட்டையில் முழு கடையடைப்பு மற்றும் மாபெரும் கண்டன ஆர்ப்பாட்டம் நடத்தப்படும் என்றும் தமிழ்நாடு அனைத்து விவசாயிகள் சங்கங்களின் ஒருங்கிணைப்புக் குழு தலைவர் பி.ஆர்.பாண்டியன் அதிரடியாக எச்சரித்துள்ளார்.

டெல்டா மாவட்டங்களின் விவசாய பாசனத்திற்கும் பல்லாயிரக்கணக்கான மக்களின் குடிநீர் தேவைக்கும் முக்கிய வாழ்வாதாரமாக விளங்கி வரும் ஆறுகளில் ஒன்று பாமணி ஆறு. இந்நிலையில், மன்னார்குடி நகராட்சிப் பகுதியில் இருந்து வெளியேறும் டன் கணக்கிலான கழிவுநீர் மற்றும் நச்சுத் திரவங்கள் எந்தவித மறுசுத்திகரிப்பும் செய்யப்படாமல் நேரடியாகப் பாமணி ஆற்றில் திறந்துவிடப்பட்டு வருகின்றன.

இதனால் ஆற்று நீர் முற்றிலும் கருமை நிறமாக மாறி துர்நாற்றம் வீசுவதுடன், ஆற்றின் கரையோரங்களில் உள்ள 100-க்கும் மேற்பட்ட கிராமங்களின் நிலத்தடி நீர்மட்டம் அடியோடு நஞ்சாகி, பொதுமக்கள் குடிநீருக்கே வழியின்றித் தவிக்கும் மிகக் கடுமையான சூழல் உருவாகியுள்ளது. இது தொடர்பாகப் பலமுறை நகராட்சி மற்றும் பொதுப்பணித்துறை அதிகாரிகளிடம் கோரிக்கை மனுக்கள் அளித்தும், அதிகாரிகள் எவ்வித ஆக்கப்பூர்வ நடவடிக்கையும் எடுக்காமல் தொடர்ந்து மெத்தனப் போக்கைக் கடைப்பிடித்து வருவதாக விவசாயிகள் குமுறுகின்றனர்.

இதையும் படிங்க: வாரிசுச் சான்றுக்கு லஞ்சம்... ஆவடியில் VAO அதிரடி ARREST..!! லஞ்ச ஒழிப்புத்துறை நடவடிக்கை..!!

இப்பிரச்சினையை நேரில் பார்வையிட்டு ஆய்வு செய்த பின்னர் செய்தியாளர்களிடம் பேசிய பி.ஆர்.பாண்டியன், மக்களின் வாழ்வாதாரத்தையும் விவசாயத்தையும் பாழாக்கும் இந்த நச்சு நடவடிக்கையை அரசு நிர்வாகம் வேடிக்கை பார்க்கக் கூடாது என்று தெரிவித்தார். மேலும், விவசாய நிலங்களையும் நிலத்தடி நீரையும் காக்கத் தவறிய மன்னார்குடி நகராட்சி நிர்வாகத்தைக் கண்டித்தும், மாசுக் கட்டுப்பாட்டு வாரியத்தின் தூக்கத்தைக் கலைக்கும் வகையிலும், வரும் அக்டோபர் 2-ஆம் தேதி காந்தி ஜெயந்தி நாளில் முத்துப்பேட்டை நகர் முழுவதும் முழு கடையடைப்புப் போராட்டம் நடத்தப்படும் என்று அவர் அறிவித்தார்.

அன்றைய தினம் வணிகர்கள், விவசாயிகள் மற்றும் பொதுமக்களைப் பெருந்திரளாகத் திரட்டி முத்துப்பேட்டையில் மாபெரும் கண்டன ஆர்ப்பாட்டம் முன்னெடுக்கப்படும் என்றும், அரசு உடனடியாக இதற்கு நிரந்தரத் தீர்வு காணாவிட்டால் போராட்டம் அடுத்தகட்டத்திற்குத் தீவிரப்படுத்தப்படும் என்றும் அவர் எச்சரித்தார். 

இதையும் படிங்க: ஜெம் வீரமணி விவகாரம்... புகார் அளிக்க SIT அழைப்பு..! Whatsapp எண்கள் அறிமுகம்..!