“விடிய விடிய போராட்டம்; குண்டுக்கட்டாக தூக்கிய போலீஸ்!” - ரிப்பன் மாளிகை முன் தூய்மைப் பணியாளர்கள் முற்றுகை! 

சென்னை மாநகராட்சி அலுவலகமான ரிப்பன் மாளிகையை முற்றுகையிட்டுத் தூய்மைப் பணியாளர்கள் நடத்திய அதிரடிப் போராட்டம் நள்ளிரவில் பெரும் பரபரப்பை ஏற்படுத்தியது. பல்வேறு கோரிக்கைகளை வலியுறுத்திப் போராடிய பணியாளர்களைப் போலீஸார் இரவோடு இரவாகக் கைது செய்து அப்புறப்படுத்தினர்.

முன்னதாக நேற்று மதியம் கருணாநிதி நினைவிடத்தில் தங்களது போராட்டத்தைத் தொடங்கிய பணியாளர்கள், பின்னர் ரிப்பன் மாளிகை நோக்கிப் படையெடுத்தனர். போராட்டக்காரர்களைக் கலைக்கப் போலீஸார் முயன்றபோது ஏற்பட்ட தள்ளுமுள்ளுவில், பெண் பணியாளர் ஒருவர் மயங்கி விழுந்ததால் அந்த இடத்தில் சிறிது நேரம் பதற்றம் நிலவியது. புத்தாண்டு பிறக்கும் வேளையில், நகரின் மையப் பகுதியில் நடந்த இந்தச் சட்ட ஒழுங்குப் பிரச்சனை மாநகர் முழுவதும் அதிர்ச்சியை ஏற்படுத்தியுள்ளது.

சென்னை மாநகராட்சியில் பணிபுரியும் தூய்மைப் பணியாளர்கள், தங்களது நீண்ட காலக் கோரிக்கைகளை வலியுறுத்தி நேற்று முதல் தீவிரப் போராட்டத்தில் ஈடுபட்டு வருகின்றனர். நேற்று மதியம் மெரினா கடற்கரையில் உள்ள கருணாநிதி நினைவிடத்தில் திடீர் போராட்டத்தில் ஈடுபட்ட இவர்கள், அதிகாரிகளின் உறுதிமொழி கிடைக்காததால் மதியத்திற்கு மேல் சென்னை மாநகராட்சித் தலைமையகமான ரிப்பன் மாளிகையை முற்றுகையிடத் திரண்டனர். “பணி நிரந்தரம், ஊதிய உயர்வு” உள்ளிட்ட கோரிக்கைகளை முன்வைத்து ரிப்பன் மாளிகை நுழைவாயில் முன்பே அமர்ந்து முழக்கங்களை எழுப்பியதால் போக்குவரத்து கடுமையாகப் பாதிக்கப்பட்டது.

இதையும் படிங்க: கொந்தளிப்பில் இடைநிலை ஆசிரியர்கள்..!! சென்னையில் 4வது நாளாக தொடரும் போராட்டம்..!!

இரவு வெகுநேரமாகியும் பணியாளர்கள் கலைந்து செல்ல மறுத்ததால், காவல்துறையினர் அதிரடி நடவடிக்கையில் இறங்கினர். நள்ளிரவில் ரிப்பன் மாளிகையை முற்றுகையிட்டிருந்த தூய்மைப் பணியாளர்களைப் போலீஸார் இரவோடு இரவாகக் கைது செய்யத் தொடங்கினர். அப்போது போலீஸாருக்கும் பணியாளர்களுக்கும் இடையே கடுமையான வாக்குவாதம் மற்றும் தள்ளுமுள்ளு ஏற்பட்டது. பணியாளர்களைக் குண்டுக்கட்டாகத் தூக்கிச் சென்று போலீஸ் வாகனத்தில் ஏற்ற முற்பட்டபோது, எதிர்பாராத விதமாகப் பெண் பணியாளர் ஒருவர் அங்கேயே மயங்கிச் சரிந்தார். இதனால் ஆத்திரமடைந்த சக பணியாளர்கள் போலீஸாருடன் மோதலில் ஈடுபட்டதால் பெரும் பரபரப்பு நிலவியது.

மயக்கமடைந்த பெண் பணியாளருக்கு முதலுதவி அளிக்கப்பட்டு மருத்துவமனைக்கு அனுப்பி வைக்கப்பட்ட நிலையில், மற்ற போராட்டக்காரர்களைப் போலீஸார் கைது செய்து அருகிலுள்ள திருமண மண்டபங்களில் தங்க வைத்துள்ளனர். “தங்கள் உழைப்பைச் சுரண்டுவதாகவும், அடிப்படை உரிமைகளுக்காகப் போராடும் தங்களைக் குற்றவாளிகளைப் போல நடத்துவதாகவும்” தூய்மைப் பணியாளர்கள் கண்ணீர் மல்கத் தெரிவித்தனர். புத்தாண்டு கொண்டாட்டங்களுக்காகச் சென்னை மாநகரம் தயாராகி வரும் வேளையில், தூய்மைப் பணியாளர்களின் இந்த நள்ளிரவுப் போராட்டம் மற்றும் கைது நடவடிக்கை மாநகராட்சி நிர்வாகத்திற்குப் பெரும் நெருக்கடியை ஏற்படுத்தியுள்ளது.

இதையும் படிங்க: காலிப் பணியிடம் இருந்தா தான் “ஒப்பந்த வேலைக்கு உடனடி நிரந்தரம் கிடையாது!” – அமைச்சர் மா.சு..!