சட்டசபை அனுமதியின்றி ரூ.2000 கோடி சாலைப் பணிகள்: எ.வ.வேலு மீது அமைச்சர் ஆதவ் அர்ஜுனா புகார்!

தமிழ்நாடு சட்டப்பேரவையின் முன் அனுமதியைப் பெறாமல், சாலை மேம்பாட்டுப் பணிகளுக்காகச் சுமார் ரூ.2,000 கோடி மதிப்பிலான நிதிக்கு விதிமுறைகளை மீறி நிர்வாக அனுமதி பெறப்பட்டுள்ளதாக முன்னாள் பொதுப்பணி மற்றும் நெடுஞ்சாலைத் துறை அமைச்சர் எ.வ.வேலு மீது தற்போதைய அமைச்சர் ஆதவ் அர்ஜுனா பகிரங்கமாகக் குற்றம் சாட்டியுள்ளார்.

தமிழ்நாடு சட்டப்பேரவையின் பட்ஜெட் கூட்டத்தொடர் நிறைவுபெற்றதைத் தொடர்ந்து, தலைமைச் செயலக வளாகத்தில் செய்தியாளர்களிடம் பேசிய அமைச்சர் ஆதவ் அர்ஜுனா, முந்தைய ஆட்சிக் காலத்தில் நெடுஞ்சாலைத் துறையில் நடைபெற்ற நிதி நிர்வாக முறைகேடுகள் மற்றும் விதிமீறல்கள் குறித்த அதிர வைக்கும் தகவல்களை வெளியிட்டார்.

அப்போது பேசிய அவர், "மக்களின் வரிப்பணத்தில் மேற்கொள்ளப்படும் எந்தவொரு பெரிய திட்டத்திற்கும், கூடுதல் நிதி ஒதுக்கீட்டிற்கும் சட்டமன்றப் பேரவையின் ஒப்புதல் பெறுவது மிக முக்கியமான ஜனநாயக நெறிமுறையாகும். ஆனால், கடந்த ஆட்சிக் காலத்தில் அப்போதைய நெடுஞ்சாலைத் துறை அமைச்சர் எ.வ.வேலு, சட்டமன்றப் பேரவையின் எவ்வித அதிகாரப்பூர்வ அனுமதியையும் முறைப்படி பெறாமல், பல்வேறு சாலை மேம்பாட்டுப் பணிகளுக்காகத் தன்னிச்சையாக ரூ.2,000 கோடி மதிப்பிலான திட்டங்களுக்கு அனுமதி பெற்று நிதி ஒதுக்கியுள்ளார்" என்று அடுக்கடுக்கான குற்றச்சாட்டுகளை அடுக்கினார்.

இதையும் படிங்க: பத்திரிகையாளர்களுக்கு இலவச வீட்டுமனை பட்டா.. வீடுகள் ஒதுக்கீடு: அமைச்சர் ஜெகதீஸ்வரி கோரிக்கை!

மேலும், "சட்டமன்ற மாண்புகளையும் நிதித்துறை விதிமுறைகளையும் முற்றிலுமாகப் புறந்தள்ளிவிட்டு இத்தகைய இமாலயத் தொகைக்கு அனுமதி வழங்கப்பட்டது எப்படி? இதற்குப் பின்னணியில் உள்ள மர்மங்கள் என்ன? என்பது குறித்து விரிவான விசாரணை நடத்தப்பட வேண்டும். இந்த முறைகேடுகள் குறித்து ஆவணங்களுடன் ஆய்வு செய்து, உண்மை நிலவரத்தை வெளிக்கொண்டு வரும் வகையில் வெள்ளை அறிக்கை வெளியிட உரிய நடவடிக்கைகள் எடுக்கப்பட்டு வருகின்றன" என்றும் அவர் திட்டவட்டமாகத் தெரிவித்தார். முக்கிய அரசியல் தலைவரும் முன்னாள் அமைச்சருமான எ.வ.வேலு மீது, அமைச்சர் ஆதவ் அர்ஜுனா ரூ.2,000 கோடி அளவிலான நிதி நிர்வாக முறைகேடு புகாரைப் பகிரங்கமாகச் சுமத்தியிருப்பது தமிழக அரசியல் களத்தில் பெரும் புயலையும் பரபரப்பையும் கிளப்பியுள்ளது.

இதையும் படிங்க: சட்டசபை கூட்டத்தொடர் நாளையுடன் நிறைவு: 8 மானியக் கோரிக்கைகள் விவாதம்; கேள்வி நேரம் ரத்து!