கலைஞர் கனவு இல்லம் திட்டத்தின் கீழ் மாணவிக்கு வீடு! முதல்வர் ஸ்டாலின் நேரில் ஆய்வு...!

கல்வியில் சிறந்த தமிழ்நாடு எனும் கருப் பொருளில் நடந்த நிகழ்ச்சி முதலமைச்சர் ஸ்டாலின் தலைமையில் நடந்தது. இதில், சிறப்பு விருந்தினராக தெலங்கானா முதலமைச்சர் ரேவந்த் ரெட்டி கலந்துக் கொண்டார். 2025-26 கல்வி ஆண்டிற்கான புதுமைப் பெண் தமிழ்ப் புதல்வன் திட்டங்களின் தொடக்க விழா அப்போது நடந்தது. கல்வி சார்ந்த 5 முக்கிய திட்டங்களையும் சாதனைகளையும் முன்னிலையாக வைத்து இந்த விழாவானது 7 பகுதிகளாகப் பிரிக்கப்பட்டது.

இத்திட்டங்களால் பயன்பெற்றவர்கள், திட்டத்தின் மூலம் சாதித்தவர்கள், அவர்களுக்குத் துணை நின்றவர்கள், ஆசிரியர்கள், நிறுவனங்கள், சமூக ஆர்வலர்கள் ஆகியோர் கலந்து கொண்டு தங்கள் அனுபவங்களையும் தங்கள் வாழ்வில் இத்திட்டங்களின் தாக்கத்தையும் நிகழ்ச்சியில் பகிர்ந்து கொண்டனர். 

அப்போது, தனது முதல் மாத சம்பளத்தை பிரேமா என்ற இளம்பெண் ஒருவர் மேடையில் வைத்து தந்தையிடம் வழங்கினார். அப்பா தான் எல்லாமே என்றும் மிகவும் உறுதுணையாக இருந்ததாகவும் கூறியது பலரது கண்களில் கண்ணீரை வரவழைத்தது. ஒழுகும் வீட்டில் அப்பா இருப்பாரே என்ற கவலை பிரேமாவுக்கு இனி வேண்டாம் என முதலமைச்சர் ஸ்டாலின் கூறினார். எத்தனையோ பேரின் எதிர்ப்பையும் மீறி உங்களைப் படிக்க வைத்த தந்தையிடம், முதல் மாதச் சம்பளத்தைத் தந்து நீங்கள் மகிழ்ச்சி அடைந்தீர்கள் என்று தெரிவித்தார். உங்கள் கனவை நிறைவேற்றிய தந்தைக்குக் கலைஞர் கனவு இல்லம் திட்டத்தின்கீழ் புதிய வீடு கட்டிக் கொடுப்பதற்கான ஆணையை வழங்கி மகிழ்ச்சி கொள்வதாக கூறினார்.

இதையும் படிங்க: நகராட்சி நிர்வாகத்துறையில் ரூ.888 கோடி ஊழல்? அம்பலப்படுத்திய ED... அண்ணாமலை கடும் விமர்சனம்...!

இந்த நிலையில் தென்காசி மாவட்டத்திற்கு சுற்றுப்பயணம் மேற்கொண்டுள்ள முதலமைச்சர் ஸ்டாலின் ஆலங்குடியில் மாணவிக்கு கட்டப்பட்டு வரும் வீட்டின் பணிகளை நேரில் சென்று ஆய்வு செய்தார். கலைஞர் கனவு இல்லத்தின் கீழ் கட்டப்பட்டு வரும் வீட்டின் கட்டுமான பணிகளை முதல்வர் ஆய்வு செய்து கேட்டறிந்தார்.

இதையும் படிங்க: மின்சாரப் பேருந்து...! தனியாருக்கு கொடுத்ததால் நஷ்டமா? அதிமுக புகாருக்கு சிவசங்கர் நெத்தியடி பதில்...!