ஸ்டாலின் சட்டமன்றத்திற்கு வருவார்..! கே.என். நேரு சூசகம்... இடைத்தேர்தலில் காத்திருக்கும் ட்விஸ்ட்..!!

தமிழக சட்டமன்ற அரசியல் தற்போது பரபரப்பான கட்டத்தை எட்டியுள்ளது. 2026 சட்டமன்றத் தேர்தலில் தமிழக வெற்றி கழக தலைவர் ஜோசப் விஜய் தலைமையில் ஆட்சி அமைந்த நிலையில், எதிர்க்கட்சியாக இருக்கும் தி.மு.க.வுக்கு முக்கியமான சவாலும் வாய்ப்பும் ஒருங்கே வந்துள்ளன. காலியாக உள்ள ஆறு சட்டமன்றத் தொகுதிகளுக்கு இடைத்தேர்தல் நடைபெற இருப்பதும், தி.மு.க. முன்னாள் அமைச்சர் கே.என்.நேரு அளித்த சூசகமான பேச்சும் அரசியல் வட்டாரத்தில் பெரும் விவாதத்தை ஏற்படுத்தியுள்ளன. 

2026 சட்டமன்றத் தேர்தலுக்குப் பிறகு, தவெக தலைவர் விஜய் இரு தொகுதிகளில் வெற்றி பெற்று ஒன்றை ராஜினாமா செய்ததாலும், ஐந்து அதிமுக எம்.எல்.ஏ.க்கள் தவெகவில் இணைந்து ராஜினாமா செய்ததாலும் ஆறு தொகுதிகள் காலியாகியுள்ளன. இந்தத் தொகுதிகள்: திருச்சி கிழக்கு, மதுராந்தகம், தாராபுரம், அம்பாசமுத்திரம், பெருந்துறை மற்றும் விராலிமலை. தேர்தல் ஆணையம் ஏற்கெனவே இந்தத் தொகுதிகளில் EVM மற்றும் VVPAT இயந்திரங்களின் சரிபார்ப்புப் பணிகளைத் தீவிரப்படுத்தியுள்ளது. பெரும்பாலான தொகுதிகளில் இந்தப் பணிகள் முடிவடைந்துவிட்ட நிலையில், இடைத்தேர்தல் அறிவிப்பு விரைவில் வரலாம் என்ற எதிர்பார்ப்பு நிலவுகிறது. 

இந்த இடைத்தேர்தல் தமிழக அரசியலில் முக்கிய திருப்புமுனையாகக் கருதப்படுகிறது. ஆளும் தவெகவுக்கு தனது ஆதரவைத் தக்கவைக்கும் சோதனையாகவும், தி.மு.க.வுக்கு தனது பலத்தை மீட்டெடுக்கும் வாய்ப்பாகவும் இது பார்க்கப்படுகிறது. குறிப்பாக, திருச்சி கிழக்கு தொகுதி மீது தி.மு.க.வினரின் கவனம் அதிகம் உள்ளது. இங்கு முன்னாள் முதலமைச்சர் மு.க.ஸ்டாலின் போட்டியிடலாம் என்ற யூகங்கள் ஏற்கெனவே கிளம்பியுள்ளன. திருச்சி தெற்கு மாவட்ட தி.மு.க. செயற்குழு இதற்கான தீர்மானத்தையும் நிறைவேற்றியுள்ளது.

இதையும் படிங்க: "செந்தில் பாலாஜி ஒன்னுமே செய்யல"..! வெறும் அறிவிப்புதான்... அமைச்சர் நிர்மல் குமார் பகிரங்க குற்றச்சாட்டு..!!

கே.என்.நேருவின் பேச்சும் பெரும் பரபரப்பை ஏற்படுத்தியுள்ளது. சட்டமன்றத்தில் முதலமைச்சர் விஜய், "அப்பாவைக் காணோம்" என்று ஸ்டாலினைக் கிண்டல் செய்து பேசியதற்கு பதிலடியாக, புதுக்கோட்டை மாவட்டத்தில் நடைபெற்ற ஒரு நிகழ்ச்சியில் கே.என்.நேரு பேசுகையில், "அப்பா மிக விரைவில் சட்டமன்றத்திற்கு வருவார். சீக்கிரமே வந்துவிடுவார் உள்ளே" என்று கூறினார். இந்தப் பேச்சு தி.மு.க. தொண்டர்களிடையே புத்துணர்ச்சியை ஏற்படுத்தியதோடு, ஸ்டாலின் இடைத்தேர்தலில் களமிறங்கி எம்.எல்.ஏ. ஆவார் என்ற எதிர்பார்ப்பை வலுப்படுத்தியுள்ளது. 

ஸ்டாலின் கொளத்தூர் தொகுதியில் 2026 தேர்தலில் தோல்வியடைந்த நிலையில், அவர் சட்டமன்றத்திற்கு வராதது தி.மு.க.வுக்கு சங்கடத்தை ஏற்படுத்தியிருந்தது. உதயநிதி ஸ்டாலின் எதிர்க்கட்சித் தலைவராகப் பொறுப்பேற்றுள்ள நிலையில், மு.க.ஸ்டாலின் சட்டமன்ற உறுப்பினராக வருவது கட்சியின் உறுதியையும் அனுபவத்தையும் வெளிப்படுத்தும். கே.என்.நேருவின் பேச்சு கட்சிக்குள் உற்சாகத்தை ஏற்படுத்தியதாகவும், தொண்டர்கள் தீவிரமடைந்ததாகவும் தெரிவிக்கப்படுகிறது.

இதையும் படிங்க: முதல்வரின் அநாகரிக விமர்சனம்..! கண்டிக்கத் தயங்குவது ஏன்..? அப்பாவு எதிர்ப்பு..!