வங்கக்கடலில் புதிய காற்றழுத்த தாழ்வுப்பகுதி! சென்னை உள்பட 8 மாவட்டங்களில் மழைக்கு வாய்ப்பு!

வடமேற்கு வங்கக்கடல் மற்றும் அதனை ஒட்டிய கடலோரப் பகுதிகளில் புதிய காற்றழுத்தத் தாழ்வுப் பகுதி உருவாகியுள்ளதாகவும், இதன் தாக்கத்தால் தமிழகத்தில் சென்னை, செங்கல்பட்டு உள்ளிட்ட 8 மாவட்டங்களில் இன்று மிதமான மழை பெய்யக்கூடும் என்றும் இந்திய வானிலை ஆய்வு மையம் (IMD) அதிகாரப்பூர்வமாக எச்சரித்துள்ளது.  

வங்கக்கடலில் நிலவும் வளிமண்டல மேலடுக்கு சுழற்சியின் காரணமாக உருவாகியுள்ள இந்தக் காற்றழுத்தத் தாழ்வுப் பகுதி, அடுத்த 24 மணி நேரத்தில் மேலும் தீவிரமடைந்து வலுப்பெறக்கூடும் எனக் கணிக்கப்பட்டுள்ளது. இது தொடர்ந்து வடக்கு ஒடிசா மற்றும் மேற்கு வங்கப் பகுதிகள் வழியாக மேற்கு-வடமேற்கு திசையை நோக்கி நகரக்கூடும் என்றும் வானிலை ஆய்வு மைய அறிக்கையில் தெரிவிக்கப்பட்டுள்ளது. 

இந்தக் காற்றழுத்தத் தாழ்வு நிலையின் காரணமாக, தமிழகத்தில் சென்னை, செங்கல்பட்டு, திருவள்ளூர், காஞ்சிபுரம், ராணிப்பேட்டை, வேலூர், திருவண்ணாமலை மற்றும் விழுப்புரம் ஆகிய 8 வட மாவட்டங்களில் இடி மின்னலுடன் கூடிய மிதமான மழைக்கு அதிக வாய்ப்புள்ளது.

இதையும் படிங்க: வானிலை அப்டேட்! தமிழகத்தின் பல மாவட்டங்களில் பலத்த காற்றுடன் மிதமான மழைக்கு வாய்ப்பு!

சென்னை மற்றும் புறநகர்ப் பகுதிகளைப் பொறுத்தவரை வானம் பொதுவாக மேகமூட்டத்துடன் காணப்படும் எனவும், நகரின் பல்வேறு பகுதிகளில் மாலை அல்லது இரவு நேரங்களில் விட்டுவிட்டு மழை பெய்யக்கூடும் எனவும் அதிகாரிகள் தெரிவித்துள்ளனர்.  

கடல் சீற்றத்துடன் காணப்பட வாய்ப்புள்ளதால், கடலோரப் பகுதி மக்கள் மற்றும் மீனவர்கள் பாதுகாப்புடன் இருக்குமாறும், வானிலை மையத்தின் தொடர் முன்னறிவிப்புகளைக் கவனித்துச் செயல்படுமாறும் அறிவுறுத்தப்பட்டுள்ளது.

இதையும் படிங்க: தென் கடலோர பகுதிகளில் சூறாவளி காற்று எச்சரிக்கை! ஆகஸ்ட் 31 வரை மீனவர்கள் கடலுக்கு செல்ல தடை!