சூடுபிடிக்கும் அரசியல் களம்..!! பாஜகவில் அண்ணாமலைக்கு புதிய பொறுப்பு..?? பின்னணி என்ன..??

தமிழகத்தில் 2026 சட்டமன்றத் தேர்தல் விரைவில் நடைபெறவுள்ள நிலையில், பாஜகவின் முன்னாள் மாநிலத் தலைவரான அண்ணாமலைக்கு கட்சியில் புதிய பொறுப்பு வழங்கப்பட உள்ளதாக தகவல்கள் வெளியாகியுள்ளன. இது கட்சியின் அமைப்பு வலுவாக்கும் முயற்சிகளுடன் தொடர்புடையதாகக் கருதப்படுகிறது.

அண்ணாமலை தமிழக பாஜகவின் மாநிலத் தலைவராக இருந்தபோது, கட்சி கணிசமான வளர்ச்சியைப் பெற்றது. அவரது தீவிர பிரசாரங்கள் மற்றும் அணுகுமுறை காரணமாக இளைஞர்கள் மத்தியில் கட்சி செல்வாக்கு அதிகரித்தது. ஆனால், பாஜக - அதிமுக கூட்டணி உறுதிப்படுத்தப்படும் சூழலில், கூட்டணி உறவுகளை வலுப்படுத்துவதற்காக அவர் மாநிலத் தலைவர் பதவியில் இருந்து நீக்கப்பட்டார். அதன்பின்னர், நயினார் நாகேந்திரன் புதிய மாநிலத் தலைவராகப் பொறுப்பேற்றுள்ளார்.

இந்நிலையில், அண்ணாமலையின் ஆதரவாளர்கள் மத்தியில் கட்சி மேலிடம் அவருக்கு உரிய அங்கீகாரத்தை வழங்கவில்லை என்ற கோரிக்கை எழுந்துள்ளது. அவரது திறமை மற்றும் செல்வாக்கைப் பயன்படுத்தி கட்சியை மேலும் வலுப்படுத்த வேண்டும் என்ற கருத்து நிலவுகிறது. இதற்கிடையே, தற்போது அண்ணாமலைக்கு தமிழக பாஜகவின் சக்தி கேந்திரா பிரிவில் முக்கிய பொறுப்பு வழங்கப்பட உள்ளதாக தகவல்கள் வெளியாகியுள்ளன.

இதையும் படிங்க: தமிழக பாஜகவில் அதிரடி மாற்றம்..!! அமைப்பு பொதுச்செயலாளராக பிரஷோப குமார் நியமனம்..!!

குறிப்பாக, தமிழக சக்தி கேந்திராவின் தலைவர் அல்லது தலைமைப் பொறுப்பாளர் பதவி அவருக்கு ஒதுக்கப்படலாம் என்று எதிர்பார்க்கப்படுகிறது. சக்தி கேந்திரா என்பது பாஜகவின் தேர்தல் அமைப்பு வலுவாக்கும் மிக முக்கியமான பிரிவாகும். இது முதன்மையாக வாக்குச்சாவடி அளவிலான அடித்தளப் பணிகளை மையமாகக் கொண்டு செயல்படுகிறது.

தமிழகம் முழுவதும் உள்ள லட்சக்கணக்கான வாக்குச்சாவடிகளை ஒருங்கிணைத்து, அவற்றை வலுப்படுத்துவது இதன் முதன்மை நோக்கம். கட்சி அமைப்பில், மாநிலம், மாவட்டம், மண்டல அளவிலான நிர்வாகிகளுக்கு கீழ் வாக்குச்சாவடி கிளை அமைப்புகள் உள்ளன. இதில், ஒவ்வொரு 3 வாக்குச்சாவடிகளுக்கும் ஒரு சக்தி கேந்திரா பொறுப்பாளர் நியமிக்கப்படுகிறார்.

இவர்கள் தங்கள் பொறுப்பில் உள்ள வாக்குச்சாவடிகளின் பொறுப்பாளர்களை ஒருங்கிணைத்து, வாக்காளர்களை திரட்டி, தேர்தலில் அதிகபட்ச வாக்குப்பதிவை உறுதி செய்யும் பணியை மேற்கொள்கின்றனர். இதனால், தேர்தல் வெற்றிக்கு இந்த பிரிவு மிகவும் முக்கியத்துவம் வாய்ந்ததாகக் கருதப்படுகிறது. தமிழக பாஜகவில் தற்போது சுமார் 25,000 பேர் வரை சக்தி கேந்திரா பொறுப்பாளர்களாக பணியாற்றி வருவதாக தகவல்கள் உள்ளன.

அண்ணாமலை இந்த பதவியை ஏற்றால், அவர் இந்த 25,000-க்கும் மேற்பட்ட பொறுப்பாளர்களை கண்காணித்து, அவர்களுக்கு வழிகாட்டுதல், ஆலோசனை வழங்குதல், பயிற்சி அளித்தல் போன்ற பணிகளை மேற்கொள்வார். இது கட்சியின் அடித்தள வலுவை மேலும் அதிகரிக்கும் என எதிர்பார்க்கப்படுகிறது. இந்த புதிய பொறுப்பு அறிவிப்பு, வரும் பிப்ரவரி 14-ஆம் தேதி மத்திய உள்துறை அமைச்சர் அமித் ஷா சேலத்துக்கு வருகை தரும் நிகழ்வுடன் தொடர்புடையதாக இருக்கலாம் என்றும் கூறப்படுகிறது.

அண்ணாமலையின் அனுபவமும், அமைப்பு திறமையும் இந்த பதவியில் பயன்படுத்தப்படுவது, தமிழகத்தில் பாஜகவின் தேர்தல் உத்திகளுக்கு புதிய வலுவை அளிக்கும் என அரசியல் வட்டாரங்கள் தெரிவிக்கின்றன. இந்த மாற்றம், கட்சியின் உள் இயக்கங்களையும், 2026 தேர்தல் தயாரிப்புகளையும் மேலும் சுவாரஸ்யமாக்கியுள்ளது. 

இதையும் படிங்க: பாஜகவால் அதிமுகவின் வாக்கு வங்கி சிதையும்! காஞ்சிபுரத்தில் கார்த்தி சிதம்பரம் எம்.பி பேட்டி!