ஓயாத பட்டினப்பாக்கம் பிரச்சனை..! மக்களுக்கு ஒரு சட்டம்... அரசுக்கு ஒரு சட்டமா.? சீமான் தாக்கு.!

சென்னை பட்டினப்பாக்கத்தில் 21.37 ஏக்கர் நிலத்தை வணிகப் பயன்பாட்டு மண்டலமாக மாற்ற சென்னை பெருநகர வளர்ச்சிக் குழுமம் அளித்த ஒப்புதல் கடும் கண்டனத்திற்குரியது என்று நாம் தமிழர் கட்சியின் தலைமை ஒருங்கிணைப்பாளர் சீமான் தெரிவித்துள்ளார்.இடநெருக்கடி மிகுந்த பட்டினப்பாக்கத்தில் தலைமைச் செயலகம் அமைப்பதற்கு மீனவ சமூகத்தினரும், பொதுமக்களும், அரசியல் கட்சிகளும் தொடர்ந்து எதிர்ப்பு தெரிவித்து வரும் நிலையில், நிலப்பயன்பாடு மாற்ற நடவடிக்கைகளை தமிழ்நாடு அரசு முன்னெடுப்பது மக்களின் உணர்வுக்கும் உரிமைக்கும் மதிப்பளிக்காத ஆணவப்போக்கை வெளிப்படுத்துவதாக அவர் குற்றம்சாட்டினார்.

குடியிருப்பு, பொழுதுபோக்கு மற்றும் திறந்தவெளி வகைப்பாடுகளில் இருந்த நிலத்தை இடைத்தேர்தல் முடிந்த அடுத்த நாளே வணிகப் பயன்பாட்டிற்கு மாற்ற வேண்டிய அவசியம் என்ன என்று அவர் கேள்வி எழுப்பினார். தமிழ்நாடு அரசுக்கு உண்மையில் துணிவு இருந்திருந்தால் இடைத்தேர்தலுக்கு முன்பே இதைச் செய்திருக்க வேண்டும் என்றும் அவர் சுட்டிக்காட்டினார்.ஒருபுறம் நீலாங்கரை, ஈஞ்சம்பாக்கம், உத்தண்டி உள்ளிட்ட பகுதிகளில் கடற்கரை விதி மீறல் என்று கூறி மக்கள் கட்டிய 129 கட்டிடங்களை காலி செய்ய மாநகராட்சி நடவடிக்கை எடுத்து வருகிறது. மறுபுறம் கடற்கரை பகுதியான பட்டினப்பாக்கத்தில் மக்களின் எதிர்ப்பையும் மீறி தலைமைச் செயலகம் கட்ட அரசே வேகமாக முயல்வது நியாயமா என்று அவர் கேட்டார். கடற்கரையைப் பாதுகாக்க வேண்டிய பொறுப்பு மக்களுக்கு மட்டும்தானா, அரசுக்கு இல்லையா என்றும் அவர் வினவினார்.

மக்களுக்கு ஒரு நீதி, அரசுக்கு வேறு நீதி என்பது நீதியல்ல; அது பெரும் அநீதி என்று அவர் வலியுறுத்தினார்.தனியார் கட்டடங்களுக்குக் கடலோரப் பாதுகாப்பு விதிகளைச் சுட்டிக்காட்டும் அரசு, தனது திட்டத்திற்கான கடலோர ஒழுங்குமுறை அனுமதிகள், சுற்றுச்சூழல் ஆய்வுகள் மற்றும் பாதுகாப்பு மதிப்பீடுகளை மக்களின் பார்வைக்கு முன்வைக்க வேண்டும் என்றார் அவர். நிலப்பயன்பாட்டின் பெயரை மாற்றிவிட்டால் மட்டும் கடற்கரையின் இயற்கைத் தன்மையும் மக்களின் வாழ்வாதாரத் தேவைகளும் மாறிவிடாது என்றும் அவர் தெரிவித்தார்.பட்டினப்பாக்கம் அரசின் வரைபடத்தில் குறிக்கப்பட்ட வெறும் நிலப்பரப்பு அல்ல. அது மீனவ மக்களின் வாழ்வோடும் தொழிலோடும் பண்பாட்டோடும் பின்னிப்பிணைந்த உயிர்நாடி பகுதி. எனவே கடலுக்குச் செல்லும் வழிகள், படகுகளை நிறுத்தும் இடங்கள், மீன்பிடித் தொழிலுக்கான தேவைகள், பொதுமக்களின் கடற்கரை அணுகல் ஆகியவை உறுதியாகப் பாதுகாக்கப்பட வேண்டும். அதைப் பாதிக்கும் எதையும் ஒருபோதும் அனுமதிக்க முடியாது என்று அவர் வலியுறுத்தினார்.

இதையும் படிங்க: தேர்தல்களை ரத்து செய்யுங்க..! தொடரும் ஞானேஷ் குமார் பிரச்சனை... சீமான் காட்டம்.!!

மக்களின் தேவைகளை நிறைவேற்றுவதற்காகவே ஆட்சியும் அதிகாரமும் வழங்கப்படுகின்றன. அவர்களின் எதிர்ப்பைப் புறந்தள்ளி, வாழ்விடத்தையும் வாழ்வாதாரத்தையும் பாதிக்கும் திட்டங்களைத் திணிப்பதற்காக அல்ல. மக்கள் கொடுத்த ஆட்சியை வைத்துக்கொண்டு மக்களையே வஞ்சிப்பது மாபெரும் துரோகம் என்று அவர் குறிப்பிட்டார்.ஆகவே, பட்டினப்பாக்கத்தில் தலைமைச் செயலகம் அமைப்பதற்கான நடவடிக்கைகளை நிறுத்தி, அந்நிலத்தை வணிகப் பயன்பாட்டு மண்டலமாக மாற்றும் ஒப்புதலை உடனடியாகத் திரும்பப் பெற வேண்டும் என நாம் தமிழர் கட்சி சார்பாக வலியுறுத்துவதாக அவர் தெரிவித்தார். இல்லையென்றால் மீனவ சமூகத்தினரின் துணையுடன் மாபெரும் எதிர்ப்புப் போராட்டத்தை நாம் தமிழர் கட்சி முன்னெடுக்கும் என்றும் அவர் எச்சரித்தார்.அரசுக் கட்டடத்தின் பிரம்மாண்டத்தைவிட மக்களின் வாழ்வும் உரிமைகளுமே உயர்ந்தவை. மக்களை வஞ்சிக்கும் வளர்ச்சியை நாம் தமிழர் கட்சி ஒருபோதும் ஏற்காது என்று சீமான் தெரிவித்தார்.

இதையும் படிங்க: திரை கவர்ச்சி மங்கும், இன கவர்ச்சி பொங்கும்: தவெக, திமுக, அதிமுகவுக்கு எதிராக சீமான் ஆவேசம்!